Psalm 38 - Edo Bible (E Baibol Ẹdo) Version 1996

Erhunmwu Ọmwa Ne Oya Re

¹ Nọyaẹnmwa, ghẹ rriọmwẹ oya vbe ohu ruẹ!

² U ya ifẹnmwẹ ruẹn kuan mwẹ nẹ, u gbe mwẹ fi otọ nẹ.

³ Uwu obalọ ọ re I ghi ye, rhunmwuda ighe ohu mu ẹẹn. Emianmwẹ gba mwẹ egbe hia. Rhunmwuda orukhọ mwẹ.

⁴ Ẹzẹ esagiẹn orukhọ mwẹ lẹ mwẹ rriẹ ihẹ ọre khua gberra ne a sẹtin mu.

⁵ Ẹtẹ mwẹ wia, ọ vbe kẹkẹ ua rhunmwuda ukọnmwẹ mwẹ.

⁶ Te I ghi hie fo vbe uhanbọ, a rẹnkhẹn mwẹ uan, te I ghi khiẹ ne ebi ro.

⁷ Emwirraro ye egbe mwẹ giẹn uan I sikẹ uwu fo.

⁸ I sin uan fo fẹẹrẹ, a rẹnkhẹn mwẹ uan ekhọe mwẹ hia tighi, te I ghi tu utumwẹ obalọ.

⁹ Nọyaẹnmwa, wẹ rẹn emwi ne I rhie aro yi, u vbe họn utumwẹ obalọ mwẹ hia.

¹⁰ Ẹkoko udu mwẹ gha ha ọka, orhiọn ni mwẹ nẹ, awanwan aro mwẹ lahin rre.

¹¹ Avbe osẹ kevbe ẹdogbo mwẹ i ghi sikẹ mwẹ, rhunmwuda ẹtẹ mwẹ, avbe etẹn mwẹ ne a rẹn egbe te iran ghi lẹ mẹ.

¹² Iran ni ho ne iran gbe mwẹ uan, khuẹn ifi khẹ mwẹ; iran ni ho ne iran kuan mwẹ gha yan wẹ te iran ra miẹn mwẹ uhunmwu. Iran i dobọ uma ne a si ghe mwẹ yi.

¹³ Te imẹ ye vbe ayin ehọ ne ẹi họn ẹmwẹ I ye vbe odin ne ẹi sẹtin guan.

¹⁴ I ye vbe ọmwa ne ọ ma khuẹnniẹn rhunmwuda ighẹ ọ yin ehọ.

¹⁵ Sokpan, wẹ ọ re I mu ẹtin yan Nọyaẹnmwa; wẹ ne Nọyaẹnmwa ne Udazi, gha zẹ ẹmwẹ wanniẹn mwẹ.

¹⁶ Ghẹ gie avbe eghian ye igiogio gbe usẹ ne ọ sẹ mwẹ. Ghẹ gie iran ye udemwẹ mwẹ gha rhuọ.

¹⁷ Te I ghi ra de, obalọ ọ re I ghi ye vbe ẹghẹ hia.

¹⁸ Imiẹn orukhọ mwẹ kue, iran i ghi gie orhiọn mwẹ sẹ otọ.

¹⁹ Egbe rran avbe eghian mwẹ iran vbe wegbe, iran ni khuiwu mwẹ vbe nẹi na mwẹ otọ wa bun.

²⁰ Iran ni ya ọkhọ san ẹse mu aro igbinna da mwẹ rhunmwuda, ighẹ I hia ne I gha ru vbene ọ kere.

²¹ Nọyaẹnmwa, ghẹ he mwẹ ye otọ. Osanobua mwẹ, ghẹ khian rrei mẹ!

²² Do yọmwobọ nian, e Nọyaẹnmwa ọmiọnmwafan mwẹ.