Psalm 37 - Edo Bible (E Baibol Ẹdo) Version 1996

Ẹmwẹ Agbọn Ọmwa Dan Kevbe Ọmwa Esi

¹ Ghẹ si osi ba ẹmwẹ ọmwa dan, ghẹ ye aro yi emwi ọmwa ne ọ rra iyi.

² A gha ho iran bẹkun wan, zẹvbe ẹbe nọkakae. Iran gha wulo, zẹvbe irunmwu ne ọ luẹluẹe.

³ Mu ẹtin yan e Nọyaẹnmwa ne u gha ru emwi ẹse, vbe gha yin otọe nii vbe ne ai na mwẹ ẹbe.

⁴ Gha gualọ ọyẹnmwẹ ruẹn vbe uwu e Nọyaẹnmwa; rẹn gha vbe rhie iho ekhọe ruẹ ne uẹn.

⁵ Rhie egbe ruẹ ne Nọyaẹnmwa mu ẹtin yan rẹn ọ gha yi uẹ obọ.

⁶ Ọ gha vbe ya ẹmwata ruẹ wan uwanmwẹ zẹvbe owẹn oghọghọ.

⁷ Zin egbe ne u rhie ẹghẹ ne Nọyaẹnmwa ya winna. Ghẹ si osi ye ẹmwẹ iran ne agbọn maa rẹn, ra ye emwa ne iro dan ne iran zẹ dunna na.

⁸ Ghẹ rhie otọ ne ohawa ra ohu, ọlọghọmwa ọ re iran si rre.

⁹ Iran ni mu ẹtin yan e Nọyaẹnmwa, ọ re ọ ra yan otọe ni, sokpan, a gha khulo avbe emwa dan ladian.

¹⁰ Vbe ọ ma he kpee wan, a gha ho emwa dan bẹkun. U gha gualọ iran sokpan u i ra miẹn iran.

¹¹ Sokpan avbe ọmẹhẹ ọ re ọ ra yan otọe nii iran ghi vbe gha ye ọfumwegbe zọmọ vbe uwu ẹre.

¹² Ọmwa dan khuan khẹ ọmwa esi ọ kevbe ye ikhuiwu gha ghe ẹre kọn-ọn.

¹³ Sokpan e Nọyaẹnmwa gha giẹ emwa dan rhunmwuda ọ rẹnrẹn ighe a gha fuẹn iran an ban.

¹⁴ Avbe emwa dan yuo umozo iran an, iran vbe si uhanbọ iran tua, ne iran ya gbe ovbiogue kevbe ne ẹi mwẹ ne iran lọkọ iran ni ru emwi ẹse.

¹⁵ Sokpan, umozo iran tobọ iran ọ re ọ ra gbele iran, a ghi vbiolo uhanbọ iran an.

¹⁶ Ive emwi kherhe ne ọmwata mwẹ, sẹ ẹfe emwa dan hia fẹẹrẹ,

¹⁷ rhunmwuda Nọyaẹnmwa gha ya ẹtin fo iran ne emwa dan, sokpan ọ ghi tan obọ gue emwa esi.

¹⁸ E Nọyaẹnmwa ọ re ọ gbearoghe iran ni họn ẹmwẹ ne ẹẹn, iran ọ re ọ khian yan otọe nii ẹdẹdẹmwẹdẹ.

¹⁹ Iran i ra sẹ usẹ vbe ẹghẹ emwi dan; iran gha mwẹ zẹ vbene iran ho vbe ẹghẹ ukhunmwu.

²⁰ Sokpan, avbe emwa dan gha wulo avbe eghian Nọyaẹnmwa gha hoho ua zẹ vbe obobo oha. A gha ho iran bẹkun zẹvbe ighogho.

²¹ Ọmwadan mọmọ emwi, sokpan ẹ i hae, sokpan, ọmwa esi ghi gha zẹ emwi obọ.

²² Iran ne Nọyaẹnmwa fiangbe ọ re ọ yan otọe nii. Sokpan, a gha khulo iran ne ọ fi ẹre unu ladian.

²³ E Nọyaẹnmwa ọ re ọ dia ọmwa ye odẹ ne ọ gha la, ọ ghi vbe gha degue iran ni ru vbene ọ yẹ ọre.

²⁴ Deghẹ iran de, iran i ra wa gha rre evba. Rhunmwuda e Nọyaẹnmwa gha silo iran kpaegbe.

²⁵ Ọmaẹn ọ re I ghi khin na, I kpe agbọn nẹ, sokpan I ma he miẹn wẹ, e Nọyaẹnmwa fi iyeke gbe ọmwa esi ẹdẹ ra ne ivbi ẹre gha vbu evbare re.

²⁶ Ẹghẹ hia ọ re ọ ya zẹ emwi obọ, ọ ghi vbe gha rhie ne emwa mọmọ. Afiangbe ọ re ivbi ẹre khin.

²⁷ Fi iyeke gbe ọkhọ, gha ru emwiesi, ivbi uniẹn ruẹn gha yin otọe nii rhinrin ẹdẹ.

²⁸ Rhunmwuda, e Nọyaẹnmwa ho ẹmwẹ emwi ne ọgbae, ẹi vbe he emwa ni guobọ ẹre yotọ, ọ degue iran rhinrin ẹdẹ. Sokpan, a gha khulo ivbi uniẹn emwa dan ladian.

²⁹ Ọmwata ọ re ọ ra yan otọe nii ọ ghi vbe yin ẹnrẹn rhinrin ẹdẹ.

³⁰ Ẹmwẹ ọmwa esi, ẹwaẹn nọ, ẹi vbe gbe ewanmwẹ ghe obọkpa.

³¹ Ọ ghi rhie uhi Osanobua ẹre ye ekhọe ẹi vbe bi egbe hin rre ẹdẹ.

³² Ọmwa dan ghi gha baba ọmwa esi, ọ ghi gha hia ne ọ gbẹe rua.

³³ Sokpan, e Nọyaẹnmwa i ra sẹ ọe rae ye obọ avbe eghian rẹn. Ra ne ọ gia bu abe gbe vbe a gha bu ohiẹn ọnrẹn.

³⁴ Hẹnhẹn idaehọ ruẹ yan e Nọyaẹnmwa gha mu uhi ẹre sẹ ọ gha mu otọe ni ne uẹn. Ne ọ ya mu ọghọ yuẹ egbe. U gha vbe miẹn ọẹn vbe a gha khulo emwa dan ladian.

³⁵ I rẹn ọmwa dan ọkpa ne akuobisi yi, ọ kevbe hin yan emwa hia zẹvbe isida e Lebanọn.

³⁶ Sokpan, I ghi la evba gberra vbe okiekie, ẹi ghi rre evba ọvbehe I gualọ ẹe, sokpan, I ma miẹn ọẹn.

³⁷ Yi ọmwa esi ẹro, gbe aro kotọ vbe egbe ọmwata ọmẹhẹ mwẹ ivbi igiogbe ọre,

³⁸ sokpan, te a wa fuẹn emwa orukhọ ua fẹẹrẹ ivbi uniẹn ọnrẹn ghi gbẹro.

³⁹ E Nọyaẹnmwa ọ re ọ miẹn ẹmwata fan ọ ghi degue iran vbe ẹghẹ orueghe.

⁴⁰ Ọ yi iran obọ, ọ ghi vbe miẹn iran fan ọ miẹn iran fan vbe obọ emwa dan rhunmwuda, rẹn ọ re iran lẹ gbinna.