Psalm 36 - Edo Bible (E Baibol Ẹdo) Version 1996

Urhiamwẹ Ọmwanagbọn

¹ Orukhọ gu ọmwa dan guan vbe uwu ekhọe ẹre, ọ he Osanobua ye otọ, ẹi vbe ya ọghọ ne ẹẹn.

² Rhunmwuda ukpo ne ọ yo ne ọ ro egbe ẹre yi, rẹn ro wẹ, Osanobua i ra miẹn otọ orukhọ ẹre, ne ọ bu abe gbẹe.

³ Ẹmwẹ dan ọ re ọ ke unu ẹnrẹn rre, ohoghe ọ re ehia vbe khin. Ẹi ghi ru emwi ẹwaẹn ra ne ọ maa.

⁴ Ọ ghi gha zẹ iro emwi dan a i ghi miẹn emwiọkpa ne ọ maa ne ọ ru. Rẹn i vbe fieghe uhunmwu ye emwi dan.

Umamwẹ Osanobua

⁵ Nọyaẹnmwa, ahoẹmwọmwa ruẹn ne ẹ i beghe sẹ ẹrinmwi. A gia mu ẹtin yan ọwuẹ sẹ aro iso.

⁶ Umamwẹ ruẹn gbe ogege vbe oke ne ọ yo. Ẹmwata ruẹ yevbe orinmwiamẹ okun, wẹ ọ re ọ gbe aro ghe emwa nagbọn kevbe avbe aranmwoha.

⁷ Osanobua, ighobioye ọ re ahoẹmwọmwa ruẹn ne ẹi beghe khin. Ototọ aghọnghọn ifuẹn ruẹn ọ re ima lẹre yi.

⁸ Evbare ọrhẹnrhẹn ne u hẹ ma ọ re ima re; u kevbe gie ima vbe gha wọn vbe ẹzẹ iruemwiẹse ruẹ.

⁹ Ehe ne u ye ọ re arrọọ hia ke rre, uwanmwẹ ruẹn ọ re ima ya bẹghe.

¹⁰ Ye gha ho ẹmwẹ iran ni rẹn ruẹn ne u vbe gha ru iran ne ẹmwata emwi esi.

¹¹ Ghẹ gie iran ni tọn egbe mu gunmwẹ gbinna, ra ne emwa dan si ulẹ yọmwẹ egbe.

¹² Wa do ghe ehe ne emwa dan dele yi, iran rre otọe vbe vba, iran ma sẹtin kpaegbe.