Psalm 35 - Edo Bible (E Baibol Ẹdo) Version 1996

Erhunmwu Iyobọ

¹ E Nọyaẹnmwa, mu aro da iran ni mu aro da mwẹ gu iran ni gunmwẹ gbinna, gbinna.

² Mu asa kevbe ẹwu okuo ruẹ ne u do wọlọ mwẹ ladian.

³ Viọ asoro kevbe ogala ruẹ ladian ne u mu aro da iran ni khu mwẹ khian tama mwẹ wẹẹ u gha miẹn mwẹ fan.

⁴ Iran ni ho ne iran gbe mwẹ uan, te obọ gha ke ukhunmwu ne iran, ne a fa iran an. Iran ni si uma ẹkhokho khuan khẹ mwẹ, te a gha khu iran werriegbe ne iro han iran.

⁵ Te iran gha ye vbe ẹbe nọkakae ne ẹhoho hoho khian ne odibosa e Nọyaẹnmwa gha khu iran khian.

⁶ Te odẹ iran gha so ebiebi, ne ọ gha miọnghọn, ne odibosa e Nọyaẹnmwa gbele iran ku otọ.

⁷ Vbene ẹi na mwẹ otọe, iran khuẹn ifi khẹ mwẹ, iran tọn uye ne ọ dinmwi, ne iran ya mu mwẹ.

⁸ Sokpan, ọkhọ gha rruan iran vbe iran te rẹn, ifi ne iran khuẹn gha munọ iran. Iran ghi ya uhunmwu mu emwi ne iran mwamwaẹn.

⁹ Ẹkpo nii, ọyẹnmwẹ e Nọyaẹnmwa gha sẹ mwẹ. Ẹko gha rhiẹnrhiẹn mwẹ rhunmwuda rẹn miẹn mwẹ fan.

¹⁰ Me gha ye ekhọekekhọe mwẹ tama Nọyaẹnmwa wẹẹ, “Ọmwa ne a ya gie ruẹ i rrọ, wẹ ne ọ fan nọ ma wegbe yotọ vbe obọ ọmwa ẹtin kevbe ovbiogue vbe obọ ne ọ zẹ ọe kpokpo.”

¹¹ Avbe emwa dan sẹ osẹe gbe mwẹ iran ba mwẹ ifi ẹzọ vbe I ma rẹn ọkpa I ma rẹn eva.

¹² Iran ya oghodan kpọnmwẹ mwẹ ẹse, egbe keghi wa wọ mwẹ ye otọ.

¹³ Vberriọ, ẹghẹ ne egbe ma na rran iran, ukpọn akhiẹ ọ re I gha rhuan. I kegha ya ohanmwẹ rri egbe, I na gbe uhunmwu kotọ na erhunmwu.

¹⁴ Zẹ vbene I gha na erhunmwu ne osẹ mwẹ ra ọtẹn mwẹ. Akhiẹ keghi so mwẹ uke, vbe ọmwa ne ọ khiẹ iye ẹe.

¹⁵ Sokpan, mẹ ghi rre uwu ọlọghọmwa nian, iran kegha ghọghọ, iran kegha gbe ẹbu ya mwẹ gbogiẹ. Avbe orhunmwuyẹn gbe mwẹ iran kegha liki mwẹ.

¹⁶ Iran keghi gọn aro ikhuiwu ghe mwẹ zẹ vbe emwa ni ye uke gbogiẹ.

¹⁷ Vbe u a ra hunwan gha ghe ọna sẹ hẹ yi Nọyaẹnmwa? Wọlọ mwẹ hin ugbemwẹ iran rre, miẹn orhiọn mwẹ fan hin obọ avbe oduma na.

¹⁸ Ẹghẹ nii, mẹ gha kpọnmwẹ ọn vbe uwu iko avbe emwa ruẹn. I gha rho ruẹ vbe ehe ne iran hia ye.

¹⁹ Ghẹ gie iran ne eghian mwẹ, avbe ọhọn ohoghe nii, ghọghọ mwẹ wẹ obọ vba mwẹ. Ghẹ gie iran ni khuiwu mwẹ vbe ai mwẹ otọ, ye igiogio gbe mwẹ ye akhiẹ mwẹ.

²⁰ Iran i gu ọmwa guan ẹmwẹ osẹ, sokpan, iran ghi gha vin ovinzẹ ye avbe ọmẹhẹ egbe.

²¹ Iran ba mwẹ ifi ẹzọ, vbene iran na go wẹẹ, “Ma miẹn emwi ne u ru nẹ.”

²² Sokpan, wẹ miẹn ọna nẹ Nọyaẹnmwa, rhunmwuda ọnii, ghẹ hunwan Nọyaẹnmwa. Ghẹ vbe khian rrei ya gha rre urria.

²³ Guọnmwegbe kpaegbe Nọyaẹnmwa, ne u do gbinna mẹ. Osanobua mwẹ, kpaegbe ne u mu ẹzọ mwẹ gui.

²⁴ Ọmwata ọ re uwẹ khin Nọyaẹnmwa, rhunmwuda ọnii, bu ohiẹn mẹ. Ghẹ gie avbe eghian mwẹ ghọghọ mwẹ.

²⁵ Ghẹ gie iran tama egbe iran wẹẹ, “Ma miẹn ẹre uhunmwu nẹ, erriọ ma ho ẹre yi zẹẹ.”

²⁶ Iran ni gbe igiogio ye usẹ ne ẹse mwẹ, te obọ gha vba iran, ne iro han iran. Iran ni wẹ iran maa sẹ mwẹ, emwiekhue kevbe efaa, ọ re ọ gha gba iran egbe.

²⁷ Iran ni ho ne a bu ohiẹn mẹ, te iran gha wee ne oghọghọ, ne iran vbe gha tae khian wẹẹ, “U miẹn vbe Nọyaẹnmwa kpọlọ hẹ! Ẹko rhiẹnrhiẹn ọẹn vbe ọ gha dunna ne eguọmwadia ẹre.”

²⁸ Rhunmwuda ọnii, mẹ gha mu ẹmwata ruẹ go I gha vbe rho ruẹ ne ebi ro.