Psalm 34 - Edo Bible (E Baibol Ẹdo) Version 1996

Urhomwẹ Umamwẹ Osanobua

¹ I gha kpọnmwẹ Nọyaẹnmwa vbe ẹghẹ hia. Mẹ i ra dobọ urhomwẹ ọnrẹn yi ẹdẹ.

² 1 gha rho ẹre ye iwinna ne ọ winna ẹn. Wa gie emwa ne a zẹ kpokpo hia, damwehọ ne iran vbe gha ghọghọ.

³ Wa gunmwẹ wewe u kpọlọ mwẹ e Nọyaẹnmwa, wa gie ima koko rho eni ẹnrẹn.

⁴ I na erhunmwu ghe Nọyaẹnmwa, ọ keghi zẹ ẹmwẹ wanniẹn mwẹ; ọ kevbe fan mwẹ ye otọ vbe obọ ohan, ne ọ te mu mwẹ hia.

⁵ Iran ne a zẹ kpokpo ye aro kọe, iran keghi ghọghọ ua, ekhue i ra vbe mu iran ẹdẹdẹmwẹdẹ.

⁶ Iran ne ẹtin fo nẹ kpe tie ẹre, ọ keghi fannọ iran ye otọ vbe uwu ọlọghọmwa iran hia.

⁷ Avbe odibosa ẹre ọ re ọ gbearoghe iran ni ya ọghọ ne Nọyaẹnmwa, ọ ghi vbe miẹn iran fan vbe ẹbe.

⁸ Wẹ tobọ gualọ otọ ẹre miẹn vbene Nọyaẹnmwa maa hẹ. Afiangbe ọrọre ọghe iran ni lẹgbinna ẹẹn.

⁹ Wa gha ya ọghọ ne Nọyaẹnmwa, wa ne emwa rẹn hia, iran ni mu ẹtin yan rẹn, i ra vbabọ emwikemwi.

¹⁰ Avbe oduma sẹtin gha vbabọ evbare, sokpan iran ni họn ẹmwẹ ne Nọyaẹnmwa i ra vbabọ emwi nẹ Ọ maa rhọkpa.

¹¹ Wa larre, avbe igbama ne ọse mwẹ, ne uwa danmwehọ mwẹ, I gha ma uwa ẹre ne uwa gha ya ọghọ ne Nọyaẹnmwa.

¹² Wẹ ho ne u ya ẹdẹ ruẹ zọmọ ra? U ho utọmwẹ kevbe uwa ra?

¹³ Adeghẹ erriọ nọ, ghẹ gha ta ẹmwẹ dan, ghẹ gha ta ohoghe.

¹⁴ Fi iyeke gbe emwi dan, gha ru emwi esi, ye ekhọe kekhọe ruẹ hia, gha gbinna ye emwi ẹmwata.

¹⁵ E Nọyaẹnmwa, ọ re ọ su e nọ ru emwi ẹse khian ọ vbe danmwehọ utumwẹ iran.

¹⁶ Sokpan, ọ mu aro da iran ni ru emwi dan, sẹrriọ wẹ, iran gha wu, banbanna a mianmian iran nẹ.

¹⁷ Ẹmwata gha kpe tie Nọyaẹnmwa, ọ ghi vbe miẹn iran fan, vbe uwu ọlọghọmwa iran hia.

¹⁸ E Nọyaẹnmwa sikẹ iran, ne agbọn zẹ ọre ẹtin. Ọ vbe miẹn iran hia ne ẹtin emwi hia fo nẹ fan.

¹⁹ Ọlọghọmwa nibun, ọ re ọmwata miẹn, sokpan, e Nọyaẹnmwa ghi miẹn rẹn fan vbe uwu ehia fẹẹrẹ.

²⁰ Te Nọyaẹnmwa wa degue ẹre fo, a i vbe bun ọkpa vbe ugboloko ẹre.

²¹ Ọkhọ ọ ra gbe ọmwa dan. Obọ gha vba iran ni khuiwu ọmwata.

²² E Nọyaẹnmwa gha miẹn emwa rẹn fan emwi rhọkpa i ra ru iran ni lẹgbinna ẹn.