Psalm 33 - Edo Bible (E Baibol Ẹdo) Version 1996

Ihuan Urhomwẹ

¹ Wa hia ni re ẹmwata, wa gha we ne oghọghọ ye iwinna ne Nọyaẹnmwa winna ẹn. Wa rho ẹre, wa hia ni họn ẹmwẹ ne ẹẹn.

² Wa ye emwi ihuan ne ọ mwẹ irri so ihuan.

³ Wa so ihuan ọgbọn ghe ẹre, wa ya iguemwi kpe akpata nii, ne uwa wee ne oghọghọ.

⁴ Ẹmwata ọ re ẹmwẹ e Nọyaẹnmwa khin, iwinna rẹn hia gie a mu ẹtin yan.

⁵ E Nọyaẹnmwa ho ẹmwẹ emwi ẹmwata, kevbe ne ọ luro. Aho ẹmwẹ ọmwa ẹnrẹn ne ẹi beghe vuọn agbọn na.

⁶ Ẹmwẹ unu ọ re Nọyaẹnmwa ya yi avbe ẹrinmwi, ẹmwẹ ne ọ tae ọ re ọ yi owẹn, uki kevbe avbe orhọnmwẹ.

⁷ Ọ si avbe okun hia koko ye ihọkpa ọ keghi khui avbe odin amẹ okun ye aza ẹre.

⁸ Wa ya ọghọ ne Nọyaẹnmwa, wa ne otọ hia, wa ya ọghọ ne ẹẹn, wa ne emwa ne agbọn hia.

⁹ Rẹn guanrẹn, a keghi yii agbọn, vbe ẹmwẹ unu ẹnrẹn, emwi hia keghi ye egbe ladian.

¹⁰ E Nọyaẹnmwa ọ re ọ duẹ uma agbọn ẹvbo hia a, ẹi gie iran mu emwamwa iran sẹ.

¹¹ Sokpan, emwamwa irẹn rrọ ẹdẹdẹmwẹdẹ, iziro ọghọe rrọ etẹbitẹghori.

¹² Afiangbe ọrọre ọghe uhunmwu ẹvbo ne Nọyaẹnmwa re Osanobua ẹre. Afiangbe ọrọre ọghe emwa ne irẹn zẹ ya ru ọghọe.

¹³ E Nọyaẹnmwa gbearoghe otọe ke ẹrinmwi rre. Ọ keghi bẹghe emwa nagbọn hia.

¹⁴ Ehe ne ọ na khaemwisẹ ọ re ọ ke ghe otọe ghe emwa hia ni rre agbọn.

¹⁵ Rẹn mwamwa iziro ekhọe iran, ọ keghi rẹn emwi hia ne iran ru.

¹⁶ Ẹi re rhunmwuda iyokuo ẹre ne ọ wegbe, ọ re ọba na khọnmiotọ, ẹi re ekpa ẹtin obọ ẹre ọ re ovbiyokuo ya khọnmiotọ.

¹⁷ Avbe ẹsin okuo imwẹ asa vbe akhọnmiotọ, ẹtin iran nọkhua isẹtin miẹn ọmwa fan.

¹⁸ E Nọyaẹnmwa ọ re ọ gbearoghe iran ni ya ọghọ ne ẹẹn. Iran ni mu ẹtin yan ahoẹmwọmwa rẹn ne ẹi beghe.

¹⁹ Ọ miẹn iran fan vbe obọ uwu, ọ gie iran gha rre agbọn, vbe ẹghẹ ukhunmwu.

²⁰ Ma mu ẹtin mwa yan e Nọyaẹnmwa, rẹn ọrọre ne ọ degue mwa, kevbe ne ọ yi ima obọ.

²¹ Rhunmwuda irẹn ọ re ima na ghọghọ ma mu ẹtin yan eni ẹnrẹn ne ọ huanrẹn.

²² Gie ahoẹmwọmwa ruẹn ne ẹi beghe, gu ima gha rrọ, Nọyaẹnmwa, zẹ vbene idaehọ mwa rre uwu uwẹ.