Psalm 30 - Edo Bible (E Baibol Ẹdo) Version 1996

Erhunmwu Ekpọnmwẹ

¹ I rho ruẹ Nọyaẹnmwa, rhunmwuda u miẹn mwẹ fan nẹ, u ma gie avbe eghian mwẹ ghọghọ mwẹ.

² Nọyaẹnmwa Osanobua mwẹ, I tu tie ruẹ nọ iyobọ. U keghi mu mwẹ egbe rran

³ u fan mwẹ vbe obọ idin. I te khian rriẹ ne vuun nẹ vbe uwu otọ u keghi dọlegbe rhie arrọ mwẹ mẹ.

⁴ Wa so ihuan urhomwẹ ghe Nọyaẹnmwa, wa ne emwa rẹn ni gia mu ẹtin yan. Wa yerre, emwi ne Ne ọ huanrẹn Nii ru ne uwa rhie ekpọnmwẹ ne ẹẹn.

⁵ Ovbi ẹghẹ kherhe ọre izohu ẹre ya umamwẹ ọnrẹn keghi re ọghe ẹdẹ agbọn hia. Ameve sẹtin gha rhọkua vbe, asọn sokpan oghọghọ dee vbe owiẹ.

⁶ Ugbẹn vbe I roro ẹẹ wẹ ẹkun sẹ mwẹ otọ nẹ, I keghi kha wẹẹ, “Obọ ọmwa i gba mwẹ ẹdẹ.”

⁷ Wẹ keghi wa gha ma mẹ Nọyaẹnmwa, u keghi degue mwẹ, zẹvbe oke ne a lẹre yi sokpan, ugbẹn vbe u ghi rhie egbe lẹre mẹ, ohan kegha mu mwẹ.

⁸ I keghi tu tie ruẹ Nọyaẹnmwa I keghi rinmwian iyobọ ruẹ:

⁹ “De ere ne ọ rrọ nuẹn deghẹ I wu? De ere ne ọ rrọ deghẹ I la idin? Avbe orinmwi vbe sẹtin rho ruẹ ra? Iran gha sẹtin mu itohan ruẹn ne ẹi fira go ra?

¹⁰ Họn urhu mwẹ Nọyaẹnmwa, ne u tohan mwẹ! E Nọyaẹnmwa, yọmwẹ obọ!”

¹¹ U ya eve mwẹ khian iku ọyẹnmwẹ nẹ. U mu akhiẹ hin mwẹ egbe rre u kevbe viọ oghọghọ lẹga mwẹ.

¹² Rhunmwuda ọnii, mẹ i ra hunwan I gha so ihuan urhomwẹ ghe ruẹ e Nọyaẹnmwa, wẹ ọrọre Osanobua mwẹ I gha rhie ekpọnmwẹ ne uẹn rhinrin ẹdẹ.