Psalm 3 - Edo Bible (E Baibol Ẹdo) Version 1996

Erhunmwu Iyobọ Vbe Owiẹ

¹ Eghian ne I mwẹ bun ẹsẹse Nọyaẹnmwa, emwa nibun, ni viọ aro da mwẹ.

² Iran na iyẹn mwẹ khian wẹẹ, “Osanobua i ra yi ọre obọ.”

³ Sokpan, wẹ, Nọyaẹnmwa ọrọre asa mwẹ, vbe ẹghẹ ẹbe kevbe ẹghẹ hia. Wẹ ọ re ọ rhie akhọnmiotọ mẹ. U keghi vbe rhie orhiọn yọ mwẹ iwu.

⁴ I kpe tie Nọyaẹnmwa ne iyobọ. Ọ keghi wanniẹn mwẹ ẹmwẹ, ke oke ne ọ huanrẹn ọghọe gha dee.

⁵ Mẹ lovbiẹ, I keghi vbiẹ, e Nọyaẹnmwa keghi degue mwẹ la asọn hia fẹẹrẹ.

⁶ Ohan iran i mu mwẹ ighe avbe eghian mwẹ arriaisẹn, ni ghae lẹga mwẹ vbe odẹ hia.

⁷ E Nọyaẹnmwa, larre! Osanobua mwẹ do miẹn mwẹ fan. Rri avbe eghian mwẹ hia oya ne iran ghẹghi sẹtin kuan mwẹ egbe ọvbehe.

⁸ Ọghe Nọyaẹnmwa ọ re akhọnmiotọ ke rre. Te ọ gha fiangbe emwa rẹn.