Psalm 29 - Edo Bible (E Baibol Ẹdo) Version 1996

Urhu E Nọyaẹnmwa Vbe Uwu Okpẹhoho

¹ Wa rho e Nọyaẹnmwa, wa ne avbe ighele ẹrinmwi.

² Wa rho eni uyi ọghe Nọyaẹnmwa gbe uhunmwu ke otọ ne Ne ọ huarẹn ọghọe vbe ọ gha ya egbe ladian.

³ A họn urhu e Nọyaẹnmwa vbe uhunmwu avbe okun, Osanobua uyi davan, urhu ẹre keghi migbo la okun hia gba.

⁴ A họn urhu e Nọyaẹnmwa, vbe uwu ẹtin kevbe uyi ẹre hia.

⁵ Urhu e Nọyaẹnmwa guọghọ avbe sida rua, avbe isida e Lebanọn.

⁶ Ọ ya avbe oke Lebanọn gha san vbe ogho, ọ keghi vbe ya Oke Hẹmọn gha san vbe ovbi ẹmila.

⁷ Urhu e Nọyaẹnmwa ye ayan yan.

⁸ Urhu ẹre mu otọ rueghe ọ mu ẹgbo Kedẹs rueghe.

⁹ Urhu e Nọyaẹnmwa rueghe okan ọ kevbe bọnmwẹ ẹbe hin erhan nii rre. Vbene emwa ni rre Ọgua Osa ẹre na go kha wẹẹ, “Uyi nọ ne Osanobua.”

¹⁰ E Nọyaẹnmwa ọ re ọ kha yan avbe ogiamẹ, rẹn khaemwisẹ zẹ vbe Ọba ẹdẹdẹmwẹdẹ.

¹¹ E Nọyaẹnmwa ọ re ọ rhie ẹtin ne emwa rẹn, ọ keghi ya ọfumwegbe fiangbe iran.