Psalm 26 - Edo Bible (E Baibol Ẹdo) Version 1996

Erhunmwu Ọmwa Esi

¹ Bu asẹ mẹ, Osanobua, rhunmwuda mẹ ru vbene ọ kei yi I keghi mu ẹtin yan ruẹn fẹfẹẹfẹ.

² Gualọ otọ mwẹ ne u vbe danmwẹ mwẹ ghe Nọyaẹnmwa, ne u vbe kha vbene I ho kevbe iziro ọghe ekhọe mwẹ ye hẹ.

³ Aho ẹmwẹ ọmwa ruẹn ne ẹi beghe ọ re ọ su mwẹ khian. A gia mu ẹtin yan ọwuẹ ọ re ọ ma mwẹ odẹ khian.

⁴ Mẹ i gu emwa ẹwobi mu obọ, mẹ i gu emwa ni fian yan egbe khian.

⁵ Ohu otu emwa dan mu mwẹ, I ghi vbe ya egbe lẹ ne ọmwa dan.

⁶ Nọyaẹnmwa, mẹ kpe obọ mwẹ nẹ, ya rhie ma ighe I ma rukhọ. Mẹ ghi vbe gbe ukpukpẹ lẹga Ogiukpo ruẹ zẹ vbe emwi ugamwẹ.

⁷ Mẹ so ihuan ekpọnmwẹ I ghi vbe na iyẹn iwinna ọyunnuan ruẹn hia.

⁸ Owa ne u ye wa yẹ mwẹ Nọyaẹnmwa, ehe ne uyi ruẹ ye.

⁹ Ghẹ fuẹn mwẹ uan ba avbe emwa orukhọ. Ghẹ gie emwi ne ọ rruan izigha rruan mwẹ.

¹⁰ Emwa ni wa ru emwi dan vbe ẹghẹ hia, ne ọ wa mu egbe ne iran ya rhie igho odieke.

¹¹ Zẹ vbe ọghomwẹ, emwi ne ọ khẹke ọ re I ru, tohan mwẹ ne u miẹn mwẹ fan.

¹² I fe vbe obọ ẹbe hia, I rho e Nọyaẹnmwa vbe uwu ẹbu iko emwa rẹn.