Psalm 25 - Edo Bible (E Baibol Ẹdo) Version 1996

Erhunmwu Adegue Ọmwa,

¹ E Nọyaẹnmwa, wẹ ọ re I na erhunmwu mwẹ ghe.

² Osanobua mwẹ, wẹ ọ re I mu ẹtin yan. Miẹn mwẹ fan hin obọ; efaa ọghe a mu ọmwa gbotọ, ghẹ gie avbe eghian mwẹ ghọghọ mwẹ.

³ A i mu emwa ni mu ẹtin yan ruẹn gbotọ sokpan iran ni zẹgiẹgiẹ sọtẹ ruẹ.

⁴ Ma mwẹ odẹ ruẹ Nọyaẹnmwa ya iran khian ne a rẹnrẹn mẹ.

⁵ Ma mwẹ re ne I gha ya ẹmwata ruẹ ru emwi rhunmwuda, wẹ ọ re Osanobua mwẹ, ne ọ miẹn mwẹ fan. I mu ẹtin yan ruẹn vbe ẹghẹ hia.

⁶ E Nọyaẹnmwa, ye rre, itohan kevbe aho ẹmwẹ ọmwa ruẹn ne ẹi beghe, ne uwẹ rhie maa ke ẹkpo nii gha dee.

⁷ Ya orukhọ kevbe abakuru ẹghẹ ọvbokhan mwẹ bọ mwẹ, vbe umamwẹ kevbe ahoẹmwọmwa ruẹn ne ẹi beghe, ye mwẹ rre Nọyaẹnmwa.

⁸ Rhunmwuda ighe ọmwata kevbe ne ọ maa ọ re Nọyaẹnmwa khin. Ọ ma avbe emwa orukhọ odẹ ne iran gha lele.

⁹ Ọ su ọmẹhẹ, vbe odẹ ẹmwata, ọ kevbe ma iran iho ẹre.

¹⁰ A gia mu ẹtin yan, kevbe aho ẹmwẹ ọmwa, ọ re ọ ya su iran ni rhie iyi ẹre mwẹ, kevbe ni vbe ya uhi ẹre ru emwi.

¹¹ Mu eyan ruẹn sẹ Nọyaẹnmwa, ne u ya orukhọ mwẹ bọ mwẹ rhunmwuda iran wa bun.

¹² Iran ni họn ẹmwẹ ne Nọyaẹnmwa, gha ruẹ emwi vbe ehe ne ọ ye odẹ ne ọ kere ne iran lele.

¹³ Agbọn gha ma iran ẹghẹ hia, ivbi iran gha vbe yan otọe nii.

¹⁴ Ọse iran ni họn ẹmwẹ ne ẹẹn, ọ re Nọyaẹnmwa khin. Ọ ghi gha so igie ye ile ne ọ gu iran ta.

¹⁵ Aro e Nọyaẹnmwa ọ re imẹ ghe ne iyobọ vbe ẹghẹ hia. Ọ kevbe gha miẹn mwẹ fan vbe ẹbe.

¹⁶ Nọyaẹnmwa, ghe mwẹ ne u tohan mwẹ rhunmwuda mẹ ma wegbe, I vbe rre uwu ohioro.

¹⁷ Mu ohawa mwẹ hin mwẹ uhunmwu rre. Ne u vbe fan mwẹ vbe ibaro mwẹ hia.

¹⁸ Roro usẹ kevbe oya mwẹ ne u vbe ya orukhọ mwẹ hia bọ mwẹ.

¹⁹ Ghe vbene eghian ne I mwẹ bun hẹ, ghe vbene iran vbe khuiwu mwẹ hẹ.

²⁰ Degue mwẹ ne u miẹn mwẹ fan; ghẹ gie obọ gba mwẹ. Wẹ ọ re imẹ lẹgbinna.

²¹ Gie umamwẹ kevbe a ta ẹmwata mwẹ rhie mwẹ lẹre, rhunmwuda, I mu ẹtin yan ruẹn.

²² Osanobua, miẹn ivbi Izrẹl fan, vbe uwu ọlọghọmwa iran hia.