Psalm 24 - Edo Bible (E Baibol Ẹdo) Version 1996

Ọba Nọkhua

¹ E Nọyaẹnmwa ọ re ọ yan agbọn na, kevbe emwi ni rre uwu ẹre hia. Rẹn ọ re ọ yan otọe agbọn kevbe iran ni rrọ hia.

² Ọ bọ ẹe yan odin amẹ ne ọ rre uwu otọ. Ọ kevbe gbe ẹyotọ ẹre yan orinmwi amẹ okun.

³ De ọmwa ne ọ kere nọ gha hin uhunmwu oke Nọyaẹnmwa? De ọmwa ne ọ gha lao Ọgua Osa ẹre ne ọ huanrẹn?

⁴ Iran ne emwa ni khuiae vbe emwi ne a ru kevbe iro ne a zẹ, iran ne ẹi ga ẹbọ, kevbe ne ẹi yan eyan ohoghe.

⁵ E Nọyaẹnmwa gha fiangbe iran, ọ ghi vbe miẹn iran fan. Osanobua gha kha ighẹ iran ma rria abe.

⁶ Iran na ọrọre emwa ni bu Osanobua dee, ni die odaro Osanobua Jekọb.

⁷ Wa bilo urho nii ye otọ gbodoo wa kie avbe ẹkhu arre ni uan, Ọba nọkhua gha la owa.

⁸ De ọmwa ne ọ re ọba nọkhua na? Rẹn nọ ighẹ e Nọyaẹnmwa ne ọ wegbe kevbe ne ọ mwẹ ẹtin. E Nọyaẹnmwa ne ọ khọnmiotọ vbe okuo.

⁹ Wa bilo urho nii ye otọ gbodoo, wa kie avbe ẹkhu arre nii uan. Ọba nọkhua gha la owa.

¹⁰ De ọmwa ne ọ re ọba nọkhua na? E Nọyaẹnmwa ne ọ khọnmiotọ rẹn ọrọre ọba nọkhua.