Psalm 22 - Edo Bible (E Baibol Ẹdo) Version 1996

Utumwẹ Obalọ Kevbe Ihuan Urhomwẹ

¹ Osanobua mwẹ, Osanobua mwẹ, vbọzẹ ne u na he mwẹ ye otọ? I wa kakabọ tu ya nọ iyobọ, sevba, ọ ma rre.

² Vbe ẹghẹ avan, mẹ datu tie ruẹ Osanobua mwẹ, sokpan, u ma khuẹnniẹn mwẹ. I tu tie vbe asọn, sokpan, I ma miẹn ikẹtin.

³ Sokpan, wẹ ọ re ọ rre ẹkete zẹvbe ọmwa Ne ọ Huanrẹn. Ọmwa ne Izrẹl rho.

⁴ Avbe erha mwa odede mu ẹtin iran yan ruẹn, iran mu ẹtin. iran yan ruẹn, wẹ keghi miẹn iran fan.

⁵ Iran tu tie ruẹ, iran keghi lẹ ẹbe fe. Iran mu ẹtin yan ruẹn, wẹ ma vbe hiẹ iran.

⁶ Sokpan, mẹ i ghi re ọmwa, ọkhọe mẹ khin, ne emwa hia zan, kevbe ne a kan fua.

⁷ Emwa ni miẹn mwẹ hia, ya mwẹ gbogiẹ, iran yuo aranmwẹ ladian, iran gha rueghe uhunmwu iran.

⁸ Iran wẹẹ, “Ẹre te u mu ẹtin yan e Nọyaẹnmwa, vbọzẹ ne ọ ma na ghi miẹn ruẹn fan nian? Adeghẹ Nọyaẹnmwa gele ho ẹmwẹ ruẹn, vbọzẹ ne ọ ma na yuẹ obọ?”

⁹ Wẹ ọ re ọ gie a biẹ mwẹ hẹnnẹdẹn. Ẹghẹ ne I na re ọmobọ, wẹ ọ re ọ rhie mwẹ lẹre.

¹⁰ Wẹ ọ re I mu ẹtin yan, ke ẹghẹ ne a ya biẹ mwẹ gha dee we ọ re ọ wa vbe gha re Osanobua mwẹ.

¹¹ Ghẹ khian rrei mẹ rhunmwuda, ibaro sikẹ mwẹ, ọmwa ne ọ gha yọmwobọ i rrọ.

¹² Eghian nibun lẹga mwẹ zẹvbe ẹkhuia ẹmila. Iran hia wa lẹga mwẹ zẹvbe ẹkhuia ẹmila ne ọ khọ, ne a miẹn vbe otọe Basian.

¹³ Iran rhan unu iran zẹvbe oduma, iran viọ ihiẹn da mwẹ.

¹⁴ Orhiọn mwẹ tin fua, ọ wirua zẹvbe amẹ ne a nọnọ ye otọ. Ugboloko mwẹ hia lahin akhuẹn rre, ekhọe mwẹ yevbe odan ne a ranraẹn.

¹⁵ Ẹho mwẹ kae zẹvbe ikpekhae, aranmwẹ mwẹ, keghi sikan mu ighehe mwẹ. U sẹmwẹ rae zẹvbe orinmwi ye uwu ebubẹ.

¹⁶ Otu emwa dan ghae ga mwẹ zẹvbe oghẹn ekita, iran mama rhu mwẹ. Iran yanghan mwẹ obọ kevbe owẹ.

¹⁷ Te a ghi bẹghe ugboloko mwẹ hia. Avbe eghian mwẹ yan aro gha ghe mwẹ.

¹⁸ Iran yan uta ye ukpọn mwẹ, iran kevbe gha ehia gba obọ.

¹⁹ E Nọyaẹnmwa, ghẹ khian rrei mẹ. Zẹgiẹgiẹ gha dee, ne u do miẹn mwẹ fan!

²⁰ Miẹn mwẹ fan hin umozo rre, vbe miẹn orhiọn mwẹ hin obọ avbe ekita na rre.

²¹ Yuo mwẹ hin obọ avbe oduma na rre; mẹ i sẹtin ru emwi rhọkpa, vbe ehe ne avbe ẹmila oha na ye.

²² I gha na iyẹn emwi ne u ru mẹ, ma emwa mwẹ. I gha rho ruẹ vbe uwu ẹbu iran:

²³ “Wa ne eguọmwadia e Nọyaẹnmwa, wa rho ẹre wa ya ọghọ ne ẹẹn, wa ne ivbi uniẹn Jekọb. Wa vbe ga ẹe, wa ne ivbi Izrẹl.

²⁴ Rẹn i mianmian ivbiogue, ra ne ọ fi aro a vbe iran rri oya, ẹi vbe fi iyeke gbe iran, sokpan, iran gha nọ iyobọ, ọ ghi khuẹnniẹn.”

²⁵ I gha rho ruẹ ye emwi ne u ru, vbe adesẹ iko ne ọ gbae, vbe sirra iran hia ni ga a, I gha zọ ese emwi ne I ve.

²⁶ Avbe ivbiogue gha re vbene iran ho, iran ni bu e Nọyaẹnmwa rre, gha rho ẹre, te agbọn gha ma iran ẹdẹdẹmwẹdẹ.

²⁷ Agbọn ẹvbo hia gha ye Nọyaẹnmwa rre, iran gha ke igienenẹ agbọn, bu ẹre rre. Ivbi ẹvbo ughughan gha rho ẹre.

²⁸ E Nọyaẹnmwa ọrọre ọba, rẹn ọ kha yan avbe uhunmwu ẹvbo.

²⁹ Emwa ni tọn egbe mu hia gha ya uhunmwu rhanmwẹ otọ ne ẹẹn. Emwa ne ọ sẹtin wu hia gha ya uhunmwu rhanmwẹ otọ ne ẹẹn.

³⁰ Avbe orre ni dee hia, gha ga ẹe, emwa gha na iyẹn Nọyaẹnmwa, ma avbe orre ni dee.

³¹ A gha tama emwa ne a ma he biẹ hia wẹẹ, “E Nọyaẹnmwa ọ re ọ miẹn emwa rẹn fan.”