Psalm 20 - Edo Bible (E Baibol Ẹdo) Version 1996

Erhunmwu Akhọnmiotọ

¹ Te Nọyaẹnmwa gha họn urhu ruẹ vbe ẹdẹ ibaro. Te Osanobua Jekọb gha de gue ruẹ.

² Te ọ gha gie iyobọ guẹ, ke Ọgua Osa ẹre rre, ne ọ ye uwẹ ike ke Oke Zaiọn rre.

³ Te ọ gha rhan obọ miẹn emwi imuohan ruẹn hia, ne ẹko ẹre vbe rhiẹnrhiẹn ye izọ ese ruẹ hia.

⁴ Te ọ gha viọ emwi ne u ho hia nuẹn, ne ọ vbe gie emwamwa ruẹn hia dinnodẹ.

⁵ Ẹghẹ nii, ma gha wẹ uwemwẹ oghọghọ ye akhọnmiotọ ọwuẹ ma ghi vbe rho Osanobua ya do ugie arunagban ruẹn. Te Nọyaẹnmwa gha viọ emwi ne u nọrẹn hia nuẹn.

⁶ Eban nian, mẹ rẹnrẹn wẹ, e Nọyaẹnmwa rhie akhọnmiotọ ne ọba ne ọ hannọ zẹ. Ọ wanniẹn ọre ẹmwẹ, ke ẹrinmwi ne ọ huanrẹn ọghọe rre ọ ghi vbe ya ẹtin ẹnrẹn rhie akhọnmiotọ nekhua ne ẹẹn.

⁷ Arhin eso mu ẹtin yan ikẹkẹ okuo iran, eso vbe mu ẹtin yan ẹsin iran. Sokpan ma mu ẹtin yan ẹtin e Nọyaẹnmwa ne Osanobua ima.

⁸ Emwa vberriọ gha rrua owẹ, iran ghi dele, sokpan ma gha kpaegbe, ma ghi mudia kpasi.

⁹ Nọyaẹnmwa, gie ọba khọnmiotọ ne u họn urhu mwa vbe ima a gha tu tie ruẹ.