Psalm 19 - Edo Bible (E Baibol Ẹdo) Version 1996

Uyi Osa Vbe Emwi Ne Osa Yii

¹ U miẹn vbe iso rhie uyi Osanobua ma hẹ! Ọ na vbe rhie iwinna obọ ẹre ma fẹẹrẹ.

² Ẹdẹ ọkpọkpa ghi gha tae ma ne ọ lelẹe, asọn ọkpọkpa ghi vbe gha tae ma ne ọ lele ẹe.

³ Ẹi re te a guan ya tae ai vbe họn owogho vbọ

⁴ Sevba urhu iran ghi ya sẹ uhunmwu otọ agbọn hia a ghi vbe họn vbe ehe ne agbọn sẹe. Osanobua bọ owa ne owẹn vbe iso;

⁵ ọ ghi ladian vbe owiẹ zẹvbe ọdafẹn ọha ne ẹko ẹre rhiẹnrhiẹn zẹvbe ọmọ ne egbe sasa ne ulẹ ne a rhie wa khọn.

⁶ Ọ ghi suẹn vbe obọkpa vbe iso ọ ghi wa fiaẹn rra gha rriẹ obọ nọkpa. Emwi ọkpa i rrọ ne ọ sẹtin, rhie egbe lẹre ne owowo ẹre.

Uhi E Nọyaẹnmwa

⁷ Te uhi e Nọyaẹnmwa wa gba te ọ rhie ẹtin ọgbọn ye ọmwa iwu. Iyi e Nọyaẹnmwa gia mu ẹtin yan, te ọ rhie ẹwaẹn ne iran ne ẹi te mwẹ.

⁸ Emwi ne ọ kere ọre uhi e Nọyaẹnmwa khin, te ọyẹnmwẹ sẹ iran ni ya ẹe ru emwi. Emwi ne ọ kere ọre iyi e Nọyaẹnmwa khin te ọ ya ekhọe rẹn emwi.

⁹ Ugamwẹ e Nọyaẹnmwa maa te ọ khian gha rrọọ ẹdẹdẹmwẹdẹ. Ẹmwata ọ re avbe ibu ohiẹn e Nọyaẹnmwa khin; emwi ne a ru ẹse wa nọ ẹghẹ hia.

¹⁰ A rhie aro yọ sẹ igoru ne ọ ghi hian sẹẹ iran rhiẹnrhiẹn sẹ owọn ne ọ ghi hian sẹ.

¹¹ Iran rhie irẹnmwi ne imẹ ne ọguọmwadia ruẹ, i rri ere ẹre vbe i a ya ẹe ru emwi.

¹² A i miẹn ne ọ kha i ghẹ rẹn i gbe ẹse Nọyaẹnmwa, fan mwẹ ye otọ vbe obọ abakuru ẹkhokho!

¹³ Vbe fanmwẹ vbe obọ orukhọ ọmaru, ghẹ gie iran khaemwisẹ yan mwẹ. Ẹghẹ nii, I ghi do gha re ne ọ gbae, I gha fe vbe obọ ọkhọ orukhọ

¹⁴ Gie ẹmwẹ ne unu mwẹ, kevbe iziro ekhọe mwẹ, gha re ne uwẹ rhan obọ miẹn Nọyaẹnmwa ugue mwẹ kevbe Ọmiọnmwafan mwẹ.