Psalm 18 - Edo Bible (E Baibol Ẹdo) Version 1996

Ihuan Akhọnmiotọ Ọghe Devid

¹ A miẹn vbene I ho ẹmwẹ ruẹn hẹ Nọyaẹnmwa, wẹ ọrọre ọmwa ne ọ gbinna mẹ.

² Nọyaẹnmwa ọrọre ne ọ degue mwẹ, rẹn ọrọre owa ọkhẹ mwẹ ne ọ wegbe. Osanobua mwẹ ọrọre ne ọ rhie mwẹ lẹre I gha rre ehe ne ọ ye, ẹbe ighi rrọ mẹ. Ọ degue mwẹ zẹ vbe asa. Ọ gbinna mẹ, ọ keghi wan ẹbe yo mẹ.

³ I tu tie Nọyaẹnmwa, ọ keghi fan mwẹ vbe obọ avbe eghian mwẹ. Wa rho e Nọyaẹnmwa.

⁴ Ebe ọghe uwu te wa lẹga mwẹ nẹ, amẹ ọfuan te lẹ rhu mwẹ,

⁵ Ebe ọghe uwu te lẹga mwẹ nẹ idin keghi te rhuẹ ifi khẹ mwẹ,

⁶ vbe uwu ibaro mwẹ, I da tie Nọyaẹnmwa, I da tie Nọyaẹnmwa ne ọ do yọmwẹ obọ. Ọ họn urhu mwẹ vbe uwu Ọgua Osa ẹre. Ọ họn ẹn vbe I da tie ẹre ne ọ do yọmwẹ obọ.

⁷ Ẹghẹ nii, agbọn keghi mu rueghe, ọ guọe zẹzẹzẹ. Ẹyotọ avbe oke hia kpẹngiẹn ọ kegha mian. Rhunmwuda ighe ohu mu Osanobua.

⁸ Ighogho vẹ ke uvun ihue ẹre ladian, aranmwẹ erhẹn ne ọ giẹn emwi uan kevbe ogiọnmwẹ erhẹn ne ọ giẹn, keghi ke unu ẹnrẹn ladian.

⁹ Ọ valọ iso ua, ọ keghi tuorre. Ikpakpa iso ne ọ siere, keghi rre ototọ owẹ ọre.

¹⁰ Ọ keghi giẹgiẹ ye emwi ne a yi ọghọe ne ọ mwẹ ifuẹn, tin kpao; ọ keghi lele ifuẹn ẹhoho gha rriẹ okhian.

¹¹ Ọ ya ebiebi gue egbe ẹre, ikpakpa iso ne ọ mwẹ imi kevbe ne ọ vuọn ne amẹ, keghi lẹga ẹre.

¹² Isan avan kevbe erhẹn ne ọ kpannọ kua keghi ke ayan ne ọ rre odaro ẹre ladian, ọ keghi la ikpakpa iso nekhui nii wan uwanmwẹ gberra.

¹³ Ẹkpo nii, e Nọyaẹnmwa keghi van avan ke iso rre. A keghi họn urhu Ne ọ yo sẹẹ Ehia.

¹⁴ Ọ fi ifẹnmwẹ ọnrẹn, ọ keghi zagha avbe eghian rẹn kua, ọ na ye awanwan ayan zẹ iran khu.

¹⁵ A keghi gie emwa miẹn ototọ okun nọkhua, a keghi vbe rhie ẹyotọ agbọn maa vbe ẹghẹ ne u na gu avbe eghian ruẹn gui Nọyaẹnmwa. U na van yan iran vbe izohu ruẹ.

¹⁶ E Nọyaẹnmwa ke odukhunmwu niẹn obọ rre, ọ keghi da mwẹ yi, ọ na si mwẹ ladian hin uwu ogiamẹ rre.

¹⁷ Ọ miẹn mwẹ fan vbe obọ avbe eghian mwẹ ni wegbe kevbe iran ni khuiwu mwẹ, iran te wegbe sẹ mwẹ gbe.

¹⁸ Ugbẹn vbe I rre uwu ọlọghọmwa, iran kegha gunmwẹ gbinna sokpan, Nọyaẹnmwa keghi degue mwẹ.

¹⁹ Ọ yọ mwẹ obọ la hin uwu ẹbe rre ọ miẹn mwẹ fan rhunmwuda, ẹko ẹre rhiẹnrhiẹn ghe mwẹ.

²⁰ E Nọyaẹnmwa san mwẹ ẹse, rhunmwuda I ru emwi ne ọ kere, ọ fiangbe mwẹ rhunmwuda ighe I ma rria abe.

²¹ Mẹ mu uhi e Nọyaẹnmwa sẹ nẹ, I ma fi iyeke gbe Osanobua mwẹ.

²² I ru nẹ zẹ vbene uhi ẹre hia khare I ma de iyi ẹre rhọkpa.

²³ Rẹn rẹnrẹn wẹ abakuru i rrọ mẹ kevbe wẹ, I bi egbe hin abakuru rre.

²⁴ Rhunmwuda ọnii, ọ san mwẹ ẹse, rhunmwuda I ru vbene ọ kei yi. Rhunmwuda, rẹn rẹnrẹn wẹ I ma rria abe.

²⁵ Nọyaẹnmwa, wẹ guobọ iran ni guobọ ruẹ, u kevbe wa maa fo ne iran ne ọ fo na.

²⁶ Wẹ re ọmwa ne ọ huanrẹn ne iran ne ọ huanrẹn sokpan, u keghi khọ mu iran ni re emwa dan.

²⁷ Wẹ miẹn iran ni mu egbe rriotọ fan sokpan, te uwẹ si iran ni tọn egbe mu kẹ otọ.

²⁸ E Nọyaẹnmwa, wẹ rhie uwanmwẹ mẹ u keghi khu ebiebi mwẹ fua.

²⁹ U rhie ẹtin mẹ ne I ya gu avbe eghian mwẹ gbinna ke ẹtin ne I ya guọghọ emwi ne iran ya khẹ egbe.

³⁰ Osanobua na, wẹ miẹn vbe emwi ne ọ ru khuia fo hẹ! Wẹ miẹn vbe ẹmwẹ ọnrẹn gie a mu ẹtin yan hẹ! Te irẹn ye vbe asa, ne iran hia ni le gbinna ẹẹn.

³¹ E Nọyaẹnmwa ọkpa ọrọre Osanobua, Osanobua ọkpa ọrọre ne ọ gbinna ma.

³² Rẹn ọrọre Osanobua ne ọ ya mwẹ wegbe ne ọ viọ ẹbe hin urodẹ mwẹ rre.

³³ Ọ ya owẹ mwẹ khẹ ye egbe vbe ọ ghe ẹrhuẹ, ọ keghi ya mwẹ gha rrọọ vbe ai mwẹ ẹbe, vbe uhunmwu oke.

³⁴ Ọ ma mwẹ vbene a khọn okuo hẹ sẹrriọ ne I na sẹtin lo uhanbọ ne ọ wegbe sẹẹ.

³⁵ Nọyaẹnmwa, wẹ ọ re ọ degue mwẹ u na vbe miẹn mwẹ fan vbe u ya gbe aro ghe mwẹ ya mwẹ khian nọkhua. Ẹtin ruẹn ya mwẹ gha rrọọ vbe ai mwẹ ẹbe.

³⁶ We ọ re ọ ma gie obọ gba mwẹ, mẹ ma he de ẹdẹ.

³⁷ I khu avbe eghian mwẹ, obọ mwẹ keghi vba iran I ma dobọyi I ke fuẹn iran an.

³⁸ I gbele iran ku otọ, iran i ghi sẹtin kpao iran lovbiẹ vbe odaro vbene obọ mwẹ na gba iran.

³⁹ U rhie ẹtin mẹ ya khọn nene okuo kevbe akhọnmiotọ vbe uhunmwu eghian mwẹ.

⁴⁰ U gie avbe eghian mwẹ lẹ mẹ, I fuẹn iran ni khuiwu mwẹ uan.

⁴¹ Iran tu nọ iyobọ sokpan, a ma miẹn ne ọ miẹn iran fan iran da tie Nọyaẹnmwa, sokpan, ọ ma khuẹnniẹn.

⁴² I rẹnkhẹn iran an iran na do yevbe ebubẹ ne ẹhoho kpolo rriẹ. I ya owẹ rri iran ginna otọ zẹ vbe ọrho vbe adesẹ ore.

⁴³ U miẹn mwẹ fan vbe obọ avbe isọtẹ u keghi ya mwẹ khian ne ọ khaemwisẹ yan avbe uhunmwu ẹvbo. Avbe emwa ne imẹ ma rẹn, khian ni ga gun mwẹ.

⁴⁴ Avbe orhunmwuyẹn ghi gha diguẹ mẹ. Iran gha họn urhu mwẹ iran ghi gha ru vbene I khare.

⁴⁵ Te afianma ghi fian iran, iran ke ehe ne avbe owa ọkhẹ ye gha dee. Iran gha guọ zẹzẹzẹ.

⁴⁶ E Nọyaẹnmwa rrọọ, wa rho e nọhuanrẹn mẹ, wa mu ẹmwẹ u kpọlọ mwẹ ọnrẹn go, ighe Osanobua nọ miẹn mwẹ fan.

⁴⁷ Ọ rhie akhọnmiotọ mẹ vbe uhunmwu avbe eghian mwẹ, ọ gbe avbe uhunmwu ẹvbo uhunmwu kotọ mẹ.

⁴⁸ Ọ keghi miẹn mwẹ fan vbe obọ avbe eghian mwẹ. Nọyaẹnmwa, u gunmwẹ khọn eghian mwẹ muotọ u keghi miẹn mwẹ fan vbe obọ emwa dan.

⁴⁹ Rhunmwuda ọnii, mẹ keghi rho ruẹ vbe uwu ẹbu avbe uhunmwu ẹvbo I so ihuan urhomwẹ ghe ruẹ.

⁵⁰ Osanobua rhie akhọnmiotọ ne ọba ẹre, ọ rhie aho ẹmwẹ ọmwa ne ẹi beghe maa, ghe ọmwa ne irẹn hannọ zẹ ghe Devid kevbe ivbi uniẹn ọnrẹn ẹdẹdẹmwẹdẹ.