Psalm 17 - Edo Bible (E Baibol Ẹdo) Version 1996

Erhunmwu Ọmwa Ne Ọ Ma Rukhọ

¹ Nọyaẹnmwa, danmwehọ erinmwian ne I rinmwian wẹ, ne a bu ohiẹn ẹmwata mẹ; zẹ ye utumwẹ ne I tu ne I ya nọ iyobọ, danmwehọ erhunmwu akekhọerre mwẹ.

² We gha bu ohiẹn mẹ, rhunmwuda wẹ rẹn emwi ne ọ kere.

³ U gba ekhọe mwẹ. Wẹ ka bu mwẹ rre yi vbe asọn, u gualọ otọ mwẹ fo fẹẹrẹ. U ma vbe miẹn iho emwi dan vbe uwu ekhọe mwẹ, I ma ta ẹmwẹ dan.

⁴ Zẹ vbene emwa eso ru I ru zẹ vbene u yi ẹre iyi I ma vbe khian vbe odẹ ọkhọ.

⁵ Odẹ ruẹ ọ re I la khian ẹdẹ, I ma he bibi odẹ hin rre ẹdẹ.

⁶ Rhunmwuda ne u na họn urhu mwẹ, ọ re I na na erhunmwu ghe ruẹ Osanobua; rhunmwuda ọnii nian, werriẹ aro rre ne u danmwehọ ẹmwẹ mwẹ.

⁷ Rhie ahoẹmwọmwa ọyunnuan ruẹn maa, ne u miẹn ima fan. Me gha rre ehe ne u ye, mẹ fe vbe obọ avbe eghian mwẹ.

⁸ Degue mwẹ, zẹ vbene u gha ru aro ruẹ, rhie mwẹ lẹre, ye aghọnghọn ifuẹn ruẹn.

⁹ Hin adekun ọmwa ọghe emwa dan. Eghian ni ho ọmwa uwu lẹga mwẹ,

¹⁰ iran i mwẹ itohan, iran wa vbe rhuọ.

¹¹ Iran wa lẹga mwẹ nian, vbe ehe ne I rhirhi a mu aro da. Iran gha gualọ ehe ne iran gha na si mwẹ gbotọ.

¹² Iran ye vbe oduma, iran gha khẹ mwẹ, iran gha khẹ ne iran yanghan mwẹ ukhiọnmwẹ ukhiọnmwẹ.

¹³ Gha dee, Nọyaẹnmwa, gu avbe eghian mwẹ gbinna, ne u khọn miẹn iran otọ, ya umozo ruẹ fan mwẹ hin obọ iran, ne emwa dan;

¹⁴ fanmwẹ ye otọ vbe obọ iran ne emwi agbọn na ne iran ho hia, sẹ ọre obọ. Ya usẹ ne u ghae ye otọ khẹ iran rri iran oya. Te ọ gha vbe sẹ avbe ivbi iran obọ vbọ ne a ye vbe sẹ eso rae khẹ eyẹ iran.

¹⁵ Sokpan, mẹ gha miẹn uwẹ aro, rhunmwuda, I ma ru khọ. I gha rhiọrre, ẹko mwẹ gha vuọn ne oghọghọ rhunmwuda ighe wẹ rre evba.