Psalm 16 - Edo Bible (E Baibol Ẹdo) Version 1996

Erhunmwu Ekhọe Ne Ọ Sẹ Otọ

¹ Rhie mwẹ lẹre Osanobua, rhunmwuda, wẹ ọ re I lẹgbinna.

² Mẹ tama Nọyaẹnmwa wẹẹ, “wẹ ọrọre Nọyaẹnmwa, ehe ne u ye, ọre ọma ne I mwẹ hia ke rre.”

³ Wẹ miẹn uyi ne ọ rre iran egbe. Ighe iran ni guobọ e Nọyaẹnmwa. Ne I gha rre uwu ẹbu iran, ọrọre ne ọ ghi sẹ mwẹ ọyẹnmwẹ sẹẹ.

⁴ Ọlọghọmwa nibun, ọ re iran si ye egbe iran egbe ighe iran ni khirhi lele ẹbọ khian. Mẹ ira ga ẹbọ iran.

⁵ Wẹ ọkpa ọre I mwẹ Nọyaẹnmwa, wẹ vbe viọ emwi ne I i mwẹ hia mẹ. Ẹdẹ nakhuẹ mwẹ, obọ ruẹ ọre ọ ye.

⁶ Okhekhe ọ re emwi ne u ya mẹ hia khin u miẹn vbe iran ma hẹ!

⁷ I rhie urhomwẹ ne Nọyaẹnmwa rhunmwuda, rẹn ọ re ọ dia mwẹ, ẹdẹ gha mu nẹ, ekhọe mwẹ ghi gha ya obọ sekhae mẹ.

⁸ Ẹghẹ hia mẹ ya rẹn wẹ, Nọyaẹnmwa rre emwa na. Ọ sikẹ mwẹ, emwi ne ọ gha mu mwẹ rueghe ighi rrọ.

⁹ Rhunmwuda ọnii, I kpọnmwẹ, I keghi vbe ghọghọ, ekhọe wa sẹ mwẹ otọ ẹsẹse

¹⁰ rhunmwuda wẹ degue mwẹ hin ẹtin uwu rre nẹ. Ọmwa ne uwẹ ho ẹmwẹ ọnrẹn nẹ, wẹ ira sẹ ọe rae ye otọe iran ni wulo nẹ.

¹¹ Wẹ gha ma mwẹ odẹ ne ọ rriẹ arrọọ, I vuọn ne ọyẹnmwẹ rhunmwuda ighe u rre emwa na, u vbe rhie oghọghọ mẹ ẹdẹdẹmwẹdẹ.