Psalm 149 - Edo Bible (E Baibol Ẹdo) Version 1996

Ihuan Urhomwẹ

¹ Wa rho e Nọyaẹnmwa! Wa so ihuan ọgbọn ghe Nọyaẹnmwa; wa rho ẹre vbe uwu iko emwa rẹn ni ya ẹe yi!

² Izrẹl gha ghọghọ, rhunmwuda Ayi ne ọ yi uẹ; wa gha ghọghọ wa ne ivbi e Zaiọn, rhunmwuda ọba uwa!

³ Wa ya iku rho eni ẹnrẹn, wa kpe ema kevbe akpata ya gha rho ẹre.

⁴ E Nọyaẹnmwa sẹ ọyẹnmwẹ ye ẹmwẹ emwa irẹn, ọ ye akhọnmiotọ ye ọghọ ne emwa irẹn ni mu egbe rriotọ.

⁵ Wa gie emwa Osanobua gha ghọghọ ye akhọnmiotọ iran, ne iran vbe so ihuan ne ọ rhiẹnrhiẹn ne ẹdẹgbe.

⁶ Wa gie iran kakabọ go ladian, vbe iran a gha rho Osanobua, iran ghi vbe viọ umozo iran ni mu mwẹ obọ.

⁷ Ne iran ya khọn avbe uhunmwu ẹvbo muotọ, ne iran vbe rri avbe emwa ni oya.

⁸ Ne iran ya ọgiọrọ rro avbe ọba iran, kevbe avbe olotu iran, ọgiọrọ ematọn.

⁹ Ne iran rri avbe uhunmwu ẹvbo oya zẹ vbene Osanobua gie ọnọna ọrọre akhọnmiotọ ọghe emwa Osanobua. Wa rho e Nọyaẹnmwa!