Psalm 145 - Edo Bible (E Baibol Ẹdo) Version 1996

Ihuan Urhomwẹ

¹ I gha ta ọta ukpọlọmwẹ ruẹn, Osanobua mwẹ kevbe ọba mwẹ, I gha kpọnmwẹ uwẹ ẹdẹ kevbe ẹdẹdẹmwẹdẹ.

² Mẹ gha kpọnmwẹ ọn ẹdẹgbegbe, I gha rho ruẹ ẹdẹ kevbe ẹdẹdẹmwẹdẹ.

³ E Nọyaẹnmwa kpolo, ọmwa ne a kakabọ rho ẹre vbe nọ, ukpọlọmwẹ ọnrẹn gberra ne ọ gia rẹn otọ ẹre.

⁴ A gha tian emwi ne u he ru, ke orre ọkpa ya sẹ ne ọ lele ẹe, iran gha ta ọta iwinna nekhua ruẹ.

⁵ Iran gha ta ọta uyi ruẹ, kevbe uyi ọba ne ọ gue uwẹ, mẹ gha vbe mu ẹmwẹ avbe iwinna ọyunnuan rẹn ro.

⁶ Emwa gha ta ọta avbe iwinna ọyunnuan ruẹn, mẹ gha vbe ta ọta ọghe ukpọlọmwẹ ruẹn.

⁷ Iran gha ta ọta umamwẹ ruẹn hia, iran ghi gha ya itohan ruẹn so ihuan.

⁸ E Nọyaẹnmwa mwẹ ahoẹmwọmwa kevbe ẹnina ẹ i rherhe mu ohu, ọ vuọn ne ahoẹmwọmwa ne ẹ i beghe.

⁹ Te irẹn wa maa ne emwa hia, ọ vbe tohan emwi hia ne irẹn yi.

¹⁰ Emwi ne u yi hia gha rho ruẹ Nọyaẹnmwa, emwa ruẹn hia gha vbe kpọnmwẹ ọn.

¹¹ Iran gha ta ọta uyi kevbe ẹtin ọba ne ọ gue uẹ, iran gha ta ẹmwẹ ẹtin ruẹn.

¹² Ne emwa hia sẹtin rẹn iwinna nekhua ne u winna ẹn, kevbe uyi ẹtin ọba ọghe otọe arriọba ruẹ.

¹³ Te uwẹ khaemwisẹ ẹdẹdẹmwẹdẹ, ọba etẹbitẹ ọ re uwẹ khin, te Nọyaẹnmwa wa ru zẹ vbene ọ yanrẹn, emwi ne irẹn ru hia ọ re ọ wa maa.

¹⁴ Ọ ru iyobọ ne iran ni rre uwu ibaro, ọ munọ iran ni dele kpaegbe.

¹⁵ Obọ ruẹ ọ re emwi ni rre agbọn hia ghe, wẹ ghi vbe rhie evbare ne iran, vbe ohanmwẹ a gha gbe iran.

¹⁶ Wẹ rhie ne iran sẹ ọmwa, u keghi vbe gie ẹko vuọn iran.

¹⁷ Ọmwata ọ re Nọyaẹnmwa khin vbe emwi ne ọ ru hia, ọ vuọn ne itohan vbe iwinna rẹn hia.

¹⁸ Ọ sikẹ iran ni kpe tie ẹre, iran ni ya ẹko ata kpe tie ẹre.

¹⁹ Ọ viọ emwi ne iran i mwẹ ne iran ni ya ọghọ ne ẹẹn, ọ họn utumwẹ iran, ọ keghi miẹn iran fan.

²⁰ Ọ degue ọmwaikọmwa ne ọ ho ẹmwẹ irẹn, sokpan, ọ gha fuẹn emwa dan an.

²¹ Mẹ gha rho e Nọyaẹnmwa vbe ẹghẹ hia, wa gie emwi ne ayi hia rho eni ẹnrẹn ne ọ huanrẹn ẹdẹdẹmwẹdẹ.