Psalm 144 - Edo Bible (E Baibol Ẹdo) Version 1996

Ọba Kpọnmwẹ Osanobua Ye Akhọnmiotọ

¹ Wa rho e Nọyaẹnmwa, ne ọ degue mwẹ! Ọ ma mwẹ vbene a gbinna vbe okuo hẹ, ọ keghi vbe ma mwẹ emwi ye otọ khẹ okuo.

² Rẹn ọrọre ne ọ degue mwẹ kevbe ne ọ gbinna mẹ ugue kevbe ọmiọnmwafan mwẹ, ọmwa ne imẹ mu ẹtin yan ne I fe hin ẹbe rre. O rhie mwẹ obọ yan uhunmwu ẹvbo nibun uhunmwu.

³ Nọyaẹnmwa de emwi ne ọmwa khin ne uwẹ na vbe bẹghe ẹre, ọmwa kẹkan, ne u vbe zẹ yọ ẹre re.

⁴ Te ọ yevbe oko ẹhoho, te ẹdagbọn rẹn yevbe aghọnghọn ne ọ rhie gberra khian.

⁵ E Nọyaẹnmwa, va iso ne u tuorre, ya obọ kan avbe oke ni yo, iran gha vbe tue ighogho ladian.

⁶ Gie ayan ọghe avannukhunmwu, ne u zagha avbe eghian ruẹn kua. Filo avbe ifẹnmwẹ ruẹn, ne u zẹ ulẹ ye iran egbe.

⁷ Niẹn obọ ke odukhunmwu rre, ne u miẹn mwẹ fan, miẹn mwẹ fan hin obọ ẹtin avbe erriọvbe,

⁸ emwa ni i zẹdẹ ta ẹmwata, ni yevbe ta ohoghe ye emwi ne iran vẹn ihẹn yi nẹ.

⁹ I gha so ihuan ọgbọn ne uẹn Osanobua, I gha kpe akpata, I ghi vbe so ihuan ne uẹn.

¹⁰ Wẹ ọ re ọ rhie akhọnmiotọ ne avbe ọba, u keghi vbe miẹn Devid ne ọguọmwadia ruẹ fan,

¹¹ Miẹn mwẹ fan vbe obọ eghian mwẹ ne ekhọe dan fan mwẹ hin obọ ẹtin avbe orhunmwuyẹn, emwa ni i zẹdẹ ta ẹmwata. Ni ye vbe ta ohoghe ye emwi ne iran vẹn ihẹn yi nẹ.

¹² Te ivbi ima nikpia vbe ẹghẹ igbama iran, gha yevbe erhan ni wanrẹn ni digiẹ. Ne ivbi ima nikhuo gha yevbe orre ọsughe, ne a ya te igiekẹn ẹguae.

¹³ Te a gha ye emwiokọ ughughan vuọn erru mwa, ne avbe ohuan ne ima rri gha biẹlẹ arriaisẹn vbe ihe igbe.

¹⁴ Te ẹmila mwa gha biẹlẹ gba erhan gba irri, vbene ẹ i na zọrua ra ne ọ wi. Ai gha vbe miẹn okuo eve vbe idunmwu mwa.

¹⁵ Afiangbe nọ ne ẹvbo nii ne avbe emwi na na re ẹmwata vbe ekpa ẹre, afiangbe ọrọre ọghe emwa ne Osanobua ẹre re Nọyaẹnmwa.