Psalm 143 - Edo Bible (E Baibol Ẹdo) Version 1996

Erhunmwu Iyobọ

¹ Nọyaẹnmwa, họn erhunmwu mwẹ! Họn erinmwian mwẹ, rhunmwuda ẹmwata ruẹ!

² Ghẹ danmwẹ imẹ ne ọguọmwadia ruẹ ghe; a i miẹn ọmwa ne ọ fo na vbe odaro ruẹ.

³ Oghian mwẹ ru ọbafi mwẹ rre, obọ ẹre keghi gba mwẹ fẹẹrẹ. Ọ khui mwẹ ye uwu ẹwẹdọ ne ọ so ebiebi, te I ghi ye vbe ọmwa ne ọ wu ẹghẹ ne ọkpẹre.

⁴ Rhunmwuda ọnii, te I ghi ra zẹ ukpọn obọ, egbe emwi hia wa wọ mwẹ fẹẹrẹ.

⁵ I ye avbe ẹdẹ ni gberra rre, mẹ vbe roro avbe emwi hia ne u he ru, I ye iwinna ruẹn hia rre.

⁶ I viọ obọ mwẹ da odukhunmwu na erhunmwu ghe ruẹ, ovbamẹ ruẹn gbe ekhọe mwẹ, zẹ vbe otọe ne ọ kae.

⁷ Zẹ ẹmwẹ wanniẹn mwẹ nian, Nọyaẹnmwa, egbe fu mwẹ nẹ, ghẹ ghi rhie aro lẹre mẹ ne I ghẹ do ya khian okpa vbe uwu iran, ni tuorre rrie ehe ne iran ni wulo nẹ ye.

⁸ Gha ye mwẹ ẹre rre owiẹ owiẹ ighe ẹmwẹ ahoẹmwọmwa ruẹn ne ẹ i beghe, rhunmwuda, wẹ ọ re imẹ mu ẹtin mwẹ yan. Erhunmwu mwẹ hin odukhunmwu bu ruẹ dee, ma mwẹ odẹ ne I gha la.

⁹ Te imẹ rre do lẹ gbinna an, Nọyaẹnmwa, fan mwẹ vbe obọ avbe eghian mwẹ.

¹⁰ Wẹ ọrọre Osanobua mwẹ, ma mwẹ ẹre ne I gha ru iho ruẹ. Gha ru mwẹ ẹse, ne u vbe gha dia mwẹ, la odẹ ne ẹbe i ye.

¹¹ Fan mwẹ ye otọ Nọyaẹnmwa, zẹ vbene u yan rẹn; vbe uwu iruemwiẹse ruẹ, yuo mwẹ hin ibaro mwẹ hia rre.

¹² Rhunmwuda ne u na ho ẹmwẹ mwẹ, gbele avbe eghian mwẹ hia a, vbe fuẹn iran ni zẹmwẹ kpokpo ua, rhunmwuda, ọguọmwadia ruẹ mẹ khin.