Psalm 141 - Edo Bible (E Baibol Ẹdo) Version 1996

Erhunmwu Ota

¹ I kpe tie ruẹ Nọyaẹnmwa, yọmwẹ obọ nian! Danmwehọ mwẹ vbe I a gha kpe tie ruẹ.

² Rhan obọ miẹn erhunmwu mwẹ zẹ vbe eturari, obọ ne I viọ ghe okhunmwu zẹ vbe izọ ese ota.

³ E Nọyaẹnmwa, rhie ọkhẹ yọmwẹ unu, kevbe abodẹ ye onurho akhuarhamwunu mwẹ.

⁴ Ghẹ gunmwẹ gha ho ne I ru emwi ne ọ ma gba, ra ne I deba emwa dan vbe uyimwẹ ọkhọ iran. I i gha gu iran rri evbare kugbe ẹdẹ.

⁵ Ọmwa esi sẹtin gbe mwẹ hin ọkhọ rre, kevbe ne ọ vbe gunmwẹ gui vbe itohan, sokpan, mẹ i ra rhan obọ miẹn emwi ne emwa dan ya mu ọghọ yọmwẹ egbe, rhunmwuda, ekhọe hia mẹ ya mu erhunmwu kọ emwi dan ne iran ru.

⁶ A gha sua avbe iran ni khaemwisẹ yan iran, kevbe oke okuta gbe otọ nẹ, emwa nii gha miẹnkue wẹ ẹmwata ọ re I tae.

⁷ Zevbe erhan ne a sọre, ne avbe giẹgiẹ ye otọ, erriọ ọ re ugboloko iran zagha lele ọkpẹn idin.

⁸ Sokpan, te imẹ ye mu ẹtin yan ruẹn khian, Nọyaẹnmwa, Osanobua mwẹ. Wẹ ọre I lẹgbinna, ghẹ gun mwẹ wu.

⁹ Degue mwẹ, hin obọ ifi ne iran khuẹn khẹ mwẹ, hin obọ akobẹ emwa dan nii.

¹⁰ Te emwa dan gha dele ye ifi iran tobọ iran, vbene imẹ gha na la evba gberra hẹnnẹdẹn.