Psalm 140 - Edo Bible (E Baibol Ẹdo) Version 1996

Erhunmwu A Degue Ọmwa

¹ Miẹn mwẹ fan vbe obọ emwa dan Nọyaẹnmwa, rhie mwẹ lẹre hin obọ emwa ọkhọ nii.

² Uma dan ọ re iran si vbe ẹghẹ hia, iran ghi gha si ẹmwẹ rre ugbugbẹhia.

³ Aranmwẹ iran yevbe obi ẹyẹn dan, ẹmwẹ unu iran yevbe obi ivbiẹkpo.

⁴ Degue mwẹ Nọyaẹnmwa, hin obọ ẹtin ọmwa dan, rhie mwẹ lẹre hin obọ emwa ọkhọ nii, ni khuan udemwẹ ye otọ khẹ mwẹ.

⁵ Iran ni tọn egbe mu khuẹn ifi khẹ mwẹ, iran rhuẹ akobẹ iran nẹ, iran khuẹnnẹ ifi lele odẹ, ne iran mu mwẹ.

⁶ Mẹ tama Nọyaẹnmwa wẹẹ, “Wẹ ọrọre Osanobua mwẹ.” Họn utumwẹ ne I ya nọ iyobọ Nọyaẹnmwa!

⁷ Nọyan, Osanobua mwẹ, ọmwa ne ọ wegbe ne ọ gbinna mẹ, u rhie mwẹ lẹre vbe ẹghẹ okuo.

⁸ Nọyaẹnmwa, ghẹ rhie emwi ne ọmwa dan ho ne ẹẹn, ghẹ gie uma dan ni iran si gba ne iran.

⁹ Ghẹ gie obọ eghian mwẹ ke ukhunmwu, gie eyan ne iran yan gun mwẹ degbe iran.

¹⁰ Te ogiọnmwẹ erhẹn ẹyin gha rhurhẹ yan iran, te iran gha dele ye uye, ne iran ghẹ ghi ladian.

¹¹ Ẹ i ghẹ dunna ne iran ni mu ẹmwẹ kuan ẹrrẹe, emwi dan ọ re ọ gha dekun emwa ọkhọ, ne ọ fuẹn iran an.

¹² E Nọyaẹnmwa, mẹ rẹnrẹn wẹ, wẹ ọ re ọ mu ẹzọ ovbiogue gui, kevbe emwi ne ọ khẹke ne ẹ i mwẹ.

¹³ Vbe ẹmwata, ẹmwata gha rho ruẹ; iran gha rro vbe odaro ruẹ.