Psalm 139 - Edo Bible (E Baibol Ẹdo) Version 1996

Osanobua Ne Ọ Rẹn Fo, Ne Ọ Su Ọmwa

¹ E Nọyaẹnmwa, wẹ danmwẹ mwẹ ghe nẹ, u vbe rẹn mwẹ nẹ.

² U rẹn emwi ne I ru hia, urria gban an ọ re u na rẹn iro ekhọe mwẹ hia.

³ Wẹ bẹghe mwẹ, dẹghe te I winna ra te I hẹwẹ, u rẹn emwi ne I ru hia.

⁴ Uhin vbe I te guan ladian; u rẹn ẹmwẹ ne I ra ta nẹ.

⁵ Te u wa lẹga mwẹ khinkhian vbe egbe hia; u keghi ya ẹtin ruẹn degue mwẹ.

⁶ Vbene u rẹnmwẹ dinmwi gbe, ọ gberra ne I gha sẹtin rẹn otọ ẹre.

⁷ De ehe ne 1 gha yo, ne I gha na lẹ fe uẹ? De ehe ne I gha na sẹtin lẹ hin ehe ne u ye rre?

⁸ De ghẹ I hin odukhunmwu la ẹrinmwi, wẹ gha rre evba; a deghẹ I ya lovbiẹ ye ehe ne iran ni wulo nẹ ye, wẹ gha rre evba.

⁹ A deghẹ te I tin fua gberra owẹn owiẹ ra ehe ne ọ ghi rrei sẹ vbe orrie,

¹⁰ wẹ gha rre evba ne u su mwẹ u gha rre evba ne u yọmwẹ obọ.

¹¹ I sẹtin tama ebiebi ne ọ rhie mwẹ lẹre, ra ne uwanmwẹ ne ọ rre ehe ne I ye khian ebiebi,

¹² sokpan ebiebi i so vbe ehe ne u ye, te asọn ye gboo zẹ vbe ogiavan. Ebiebi kevbe uwanmwẹ, ọkpa eveva khin nuẹn.

¹³ Wẹ ọ re ọ yi egbe mwẹ hia, wẹ ọ re ọ si mwẹ koko vbe ẹko iye mwẹ.

¹⁴ I rho ruẹ, rhunmwuda, ọmwa ne ọ kere ne a muohan rẹn ọ re uwẹ khin, emwi ne u ru hia lughaẹn, ọyunnuan nọ. I wa rẹn ọna kekhọekekhọe mwẹ hia.

¹⁵ Ẹghẹ ne a na gha mwamwa ugboloko mwẹ, vbe a hẹko si iran koko vbe uwu ẹko iye mwẹ, ẹghẹ ne I na gha hẹko do wan vbe evba, wẹ rẹn nẹ wẹ I rre evba.

¹⁶ U bẹghe mwẹ nẹ a ke biẹ mwẹ, inu ẹdẹ ne a ghae mẹ, a gbẹnnẹ ehia ye otọ nẹ vbe uwu ebe ruẹ, vbe erhọkpa ma he suẹn.

¹⁷ E Nọyaẹnmwa, a miẹn vbe ẹwaẹn ekhọe ruẹ lọghọ mẹ he! U miẹn vbene iran wa bun hẹ!

¹⁸ I gha wẹ ne I ka iran, iran gha bun sẹ ikpekhae ne otọ. I gha rhiọrre, ehe ne u ye ọre I ye ye.

¹⁹ Osanobua, vbọ rrọ akpawẹ u gha gbele emwa dan an; vbọrrọ akpawẹ emwa ọkhọ gha rhie obọ hin mwẹ ẹkun rre!

²⁰ Ẹmwẹ dan ọ re iran talọ vbe ekpa ruẹ, iran vbe ta ẹmwẹ dan ghe eni ruẹn.

²¹ Nọyaẹnmwa, u miẹn vbe ohu iran ne ẹ i ho ẹmwẹ ruẹn mu mwẹ hẹ! U miẹn vbe iran ni sọtẹ ghe ruẹ sọnnọ mwẹ hẹ!

²² Te I wa khu iwu iran ọghe banmwẹ banmwẹ! Te I wa ka iran ba eghian mwẹ.

²³ Gualotọ mwẹ Nọyaẹnmwa, ne u rẹn vbene ekhọe mwẹ ye hẹ; danmwẹ mwẹ ghe, ne u rẹn iro ekhọe mwẹ.

²⁴ Gualotọ ẹre miẹn, a deghẹ emwi dan rre uwu imẹ, ne u su mwẹ la odẹ etẹbitẹ.