Psalm 135 - Edo Bible (E Baibol Ẹdo) Version 1996

Ihuan Urhomwẹ

¹ Wa rho e Nọyaẹnmwa, wa rho eni ẹnrẹn, wa ne eguọmwadia e Nọyaẹnmwa.

² Ni mudia vbe owa e Nọyaẹnmwa, vbe Ọgua Osa ọghe Osanobua mwa.

³ Rho e Nọyaẹnmwa, rhunmwuda rẹn maa, wa so ihuan urhomwẹ ghe eni ẹnrẹn, rhunmwuda, ọ mwẹ itohan.

⁴ Ọ zẹ Jekọb ne egbe ẹre, ivbi Izrẹl ne iran gha re ọghe irẹn.

⁵ Mẹ rẹnrẹn wẹ Osanobua mwa kpolo, ọ kpọlọ sẹ avbe ẹbọ hia.

⁶ Emwi ne ọ khọn rẹn ọre ọ ru, vbe ẹrinmwi kevbe agbọn, vbe uwu okun kevbe avbe odin ni rre ototọ ẹre.

⁷ Ọ mu okpẹhoho okuku amẹ ke ehe ne agbọn sẹe gha dee, ọ ru ayan ne okpẹhoho, ọ kevbe kie okpẹhoho ke uwu aza ẹre ladian.

⁸ Ọ gbele emọdiọn ni rre Igipt hia, ọghe emwa nagbọn kevbe ọghe avbe aranmwẹ.

⁹ Evba ọ re ọ na winna iwinna ama kevbe ọyunnuan, ne ọ ya rri ọha kevbe ekhaẹmwẹ ọnrẹn hia oya.

¹⁰ Ọ rẹnkhẹn uhunmwu ẹvbo nibun uan ọ kevbe gbele avbe ọha ni mwẹ ẹtin.

¹¹ E Saihọn ne ọba ivbi Amọri, kevbe Ọg ọba ivbi Basian, kevbe avbe ọba ni rre Kenan hia.

¹² Ọ mu otọ iran ne emwa irẹn, ọ mu ẹẹn ne ivbi Izrẹl.

¹³ E Nọyaẹnmwa, te a gha go wan ruẹn tie ruẹ Osanobua ẹdẹdẹmwẹdẹ, orre hia ọre ọ gha ye ruẹ rre.

¹⁴ E Nọyaẹnmwa gha gbinna ne emwa rẹn, ọ gha vbe tohan eguọmwadia ẹre.

¹⁵ Esiliva kevbe igoru, ọ re a ya mannọ ẹbọ avbe uhunmwu ẹvbo, obọ emwa nagbọn ọ re a ya mannọ iran.

¹⁶ Iran mwẹ unu sokpan iran i sẹtin guan, kevbe aro, sokpan iran i sẹtin bẹghe,

¹⁷ iran mwẹ ehọ sokpan iran i họn ẹmwẹ, iran i kue sẹtin hiọnrọn.

¹⁸ Te iran ni ru iran, kevbe iran ni mu ẹtin yan iran, gha a ye vbe ne amazẹ ne iran maẹn ye.

¹⁹ Wa rho e Nọyaẹnmwa, wa ne ivbi Izrẹl, wa rho ẹre wa ne avbe ohẹn Osanobua!

²⁰ Wa rho e Nọyaẹnmwa, wa ne avbe Livai, wa rho ẹre, wa hia ni ga ẹe.

²¹ Wa rho e Nọyaẹnmwa vbe Zaiọn, vbe Jerusalẹm ne owa ẹre. Wa rho e Nọyaẹnmwa!