Psalm 132 - Edo Bible (E Baibol Ẹdo) Version 1996

Ne A Ya Tian Ọgua Osa

¹ E Nọyaẹnmwa, ghẹ mianmian e Devid, kevbe usẹ ne ọ sẹ ọe hia.

² Nọyaẹnmwa, ye eyan ne ọ yan rẹn rre, emwi ne ọ ve uwẹ ne Osanobua Nọkhua ọghe Jekọb re wẹẹ:

³ “Mẹ i ra ye owa mwẹ ra ne I ya lovbiẹ,

⁴ mẹ i ra hẹwẹ ra ne I vbiẹ,

⁵ rhinrin mẹ te do miẹn ihe okpa ne Nọyaẹnmwa, owa ne Osanobua Nọkhua ọghe Jekọb.”

⁶ Ma họn ẹmwẹ Ẹkpẹti Ile vbe Bẹtlẹhẹm, ma keghi miẹn ọẹn vbe ugbo ọghe Jearim.

⁷ Ma keghi kha wẹẹ, “Wa gie ima gha rrie owa e Nọyaẹnmwa, wa gie ima ya ga vbe odaro ẹkete ẹre.”

⁸ Gha die Ọgua Osa Nọyaẹnmwa, yaba nene Ẹkpẹti Ile gha dee, ne ọ re ama ọghe ẹtin ruẹn ne u do gha rre emwa na ẹdẹdẹmwẹdẹ.

⁹ Te avbe ohẹn ruẹn ghaa ru vbene ọ ke yi vbe ẹghẹ hia, te avbe emwa ruẹn gha a wee ne oghọghọ.

¹⁰ U ve Devid ne ọguọmwadia ruẹ emwi, ghẹ he ọba ne u hannọ zẹ ye otọ Nọyaẹnmwa.

¹¹ Ekhọekekhọe ọ re u ya ve Devid emwi, ive ne uwẹ i ra siẹn wẹẹ, “I gha ya ọkpa vbe uwu avbe ivbuẹ nikpia rri ọba, rẹn gha vbe rri ọba lele uwẹ.

¹² A deghẹ avbe ivbi uẹ lele iyi mwẹ, kevbe avbe iyi ne I yi ne iran, ivbi iran gha vbe rri ọba lele uwẹ rhinrin ẹdẹ.”

¹³ E Nọyaẹnmwa hannọ e Zaiọn zẹ nẹ, ọ ho ne ọ ya ẹe ru owa ẹre,

¹⁴ “Ehe ne I ra gha ye ẹdẹdẹmwẹdẹ ọ re ọna khin, ehe ne I ho ne I na gha khaemwisẹ nọ.

¹⁵ I gha viọ emwi ne Zaiọn ho hia ne ẹẹn wọrhọwọrhọ, I gha ya evbare vuọn avbe ivbiogue ni rrọọ ẹko.

¹⁶ I gha fiangbe emwi ne avbe ohẹn ni rrọ ru hia, avbe emwa rẹn ghi gha wee, iran ghi gha so ihuan oghọghọ.

¹⁷ I gha ya ọkpa vbe uwu ivbi e Devid, ma ọba nọkhua vbe emwa na, emwa na ọ re I gha na rhie ẹre mwẹ, ighe irriegie ọghe ọba ne I hannọ zẹ.

¹⁸ I gha ye ekhue gbe avbe eghian rẹn egbe sokpan arriọba ẹre gha dunna ọ ghi vbe gha muan yọ.”