Psalm 130 - Edo Bible (E Baibol Ẹdo) Version 1996

Erhunmwu Iyobọ

¹ Vbene iro wa ya han mwẹ, ọ re I ya kpe tie ruẹ Nọyaẹnmwa.

² Nọyaẹnmwa, họn eve mwẹ, họn vbene I tu nọ iyobọ hẹ.

³ Wẹ gha wẹ ne u ka orukhọ mwa ye ima owẹ, de ọmwa okpa ne ai ra bu abe gbe?

⁴ Sokpan, te uwẹ ya bọ mwa, ne ima gha ya imuegberriotọ họn ẹmwẹ ne uẹn.

⁵ I wa rhie aro, ye odẹ diakhẹ iyobọ e Nọyaẹnmwa, ẹmwẹ ọnrẹn ọre imẹ vbe mu ẹtin yan.

⁶ Mẹ rhie aro ye odẹ gha khẹ Nọyaẹnmwa sẹẹ vbene avbe abodẹ khẹ ne ẹdẹ kue gbe.

⁷ Izrẹl, wa mu ẹtin yan e Nọyaẹnmwa, rhunmwuda, aho ẹre i fiwerriẹ, ọ vbe mu egbe ne ọ ya miẹn ọmwa fan vbe ẹghẹ hia.

⁸ Ọ gha miẹn Izrẹl ne emwa rẹn fan, hin uwu orukhọ iran rre.