Psalm 119 - Edo Bible (E Baibol Ẹdo) Version 1996Uhi E Nọyaẹnmwa 1 Afiangbe ọrọre ọghe iran ne uyinmwẹ ọnrẹn gbae, ni vbe yin zẹ vbene uhi e Nọyaẹnmwa khare. 2 Afiangbe ọrọre ọghe iran ni lele iyi ẹre ni họn ẹmwẹ ne ẹẹn kekhọekekhọe. 3 Iran i ba emwi ku ru; iran khian vbe odẹ e Nọyaẹnmwa. 4 Nọyaẹnmwa, wẹ rhie uhi ruẹ ne ima nẹ, u na wẹ ne ima gha ya ẹe ru emwi ekhọe kekhọe. 5 Vbọrrọ akpawẹ ekhọe mwẹ gha sẹtin mu ẹẹn sẹ, ne I wa gha ruẹe zẹ vbe ne u ru igiodẹ ọre. 6 A deghẹ I rhie ekhọe lele uhi ruẹ hia, ẹghẹ ni a i ghi ra fa mwẹ uan. 7 Zẹ vbene I ruẹ ibuohiẹn ẹmwata ruẹ I gha ya ekhọe ne ọ rriẹe rho ruẹ. 8 I gha mu uhi ruẹn sẹ; ghẹ he mwẹ ye otọ ẹdẹ! A Ya Uhi E Nọyaẹnmwa Ru Emwi 9 Vbe igbama gha ya sẹtin ya uyimwẹ ọnrẹn khian nọgbae hẹ? Vbekpa ne ọ na ya uhi ruẹ ru emwi. 10 Mẹ hia ne I ye ekhọe mwẹ hia gha ga a; ghẹ gun mwẹ de iyi ruẹ. 11 Mẹ rhie uhi ruẹ ye ekhọe mwẹ, ne I ghẹ miẹn ehe na rukhọ ghe ruẹ. 12 I rho ruẹ, Nọyaẹnmwa, gie odẹ ruẹ ma mwẹ. 13 Mẹ gha mu ehia go ighe avbe uhi hia ne u wẹ rhie rre. 14 Ẹko mwẹ rhiẹnrhiẹn ye ne I gha lele iyi ruẹ sẹ ne I gha mwẹ ẹfe nibun. 15 I ruẹ igiodẹ ruẹ, I vbe ghe emwi ne u ma emwa re ghe. 16 Avbe uhi ruẹ sẹ mwẹ ọyẹnmwẹ mẹ i ra vbe mianmian iyi ruẹ. Ẹko Ne Ọrhiẹnrhiẹn Vbe Uwu Uhi E Nọyaẹnmwa 17 Gha ru imẹ ne ọguọmwadia ruẹn ẹse ne I miẹn ehe na gha rre agbọn ne I vbe gha ru vbene u ma mwa re. 18 Rhan mwẹ aro, ne I miẹn ehe na bẹghe ne I miẹn ehe na bẹghe ẹmwata ọyunnuan ni rre uhi ruẹ. 19 Ovbi ẹghẹ kherhe ọ re I ya rre agbọn na, ghẹ rhie iyi ruẹ lẹre mẹ. 20 Te udu mwẹ ghi fi ye ne I na rhie aro ye odẹ, I ho ne I rẹn ibuohiẹn ruẹn vbe ẹghẹ hia. 21 Wẹ gu emwa ni tọn egbe mu gui; te a fi iran unu ighe iran ni de iyi ruẹ. 22 Fan mwẹ vbe obọ ihẹn kevbe ozan iran, rhunmwuda, mẹ rhie uhi ruẹ lẹre. 23 Iran ni khaemwisẹ miegbe, iran ke khuan khẹ mwẹ, sokpan, mẹ gha ruẹ emwi ne u ma mwa re! 24 Igiodẹ ruẹ ya ẹko rhiẹnrhiẹn mwẹ; iran ọrọre ne ọ bu mwẹ ude. A Mu Egbe Ne A Ya Uhi E Nọyaẹnmwa Ru Emwi 25 I lovbiẹ ye uwu ebubẹ ne a gbe mwẹ fi, huẹn mwẹ zẹ vbene u yan rẹn. 26 I miẹn emwi ne I he ru hia kue, wẹ keghi họn urhu mwẹ, ma mwẹ odẹ ruẹ. 27 Ru iyobọ mẹ, ne I ya rẹn otọ uhi ruẹ, mẹ gha vbe gha mu emwi ọyunnuan ne u ma mwa re ro. 28 Akhiẹ gbe mwẹ fi otọ, rhie orhiọn yọmwẹ iwu, zẹ vbene u yan rẹn. 29 Ma mwẹ re ne I ghẹ bibi odẹ. Vbe uwu umamwẹ ruẹn ma mwẹ uhi ruẹ. 30 I khare wẹ 1 gha wa gha họn ẹmwẹ I vbe kakabọ ghe ibuohiẹn ruẹn. 31 Nọyaẹnmwa, igiodẹ ruẹ mẹ lele khian, ghẹ gi ekhue mu mwẹ. 32 Mẹ gha ya isasegbe mu uhi ruẹ sẹ, rhunmwuda, u gha rhie irẹnmwi mẹ sayọ. Erhunmwu Ne A Gha Rẹn Otọ Emwi 33 Nọyaẹnmwa, ma mwẹ otọ uhi ruẹ, mẹ gha vbe gha mu iran sẹ vbe ẹghẹ hia. 34 Rhan otọ uhi ruẹ ma mwẹ, mẹ gha vbe ya ẹe gha ru emwi vbe ẹghẹ hia, I gha ya ekhọe mwẹ hia, ya ẹe ru emwi. 35 Gunmwẹ gha mu uhi ruẹ sẹ, rhunmwuda I miẹn ẹko rhiẹnrhiẹnmwẹ vbe uwu iran. 36 Gie ekhọe mwẹ gha ho ne ọ mu uhi ruẹn sẹ, sẹẹ ne I do gha re ne ọ fee. 37 Rhie mwẹ aro hin emwi oya rre, gha ru mwẹ ẹse vbene u yan rẹn. 38 Mu eyan ruẹn sẹ ne imẹ ne ọguọmwadia ruẹ, eyan ne u yan ne iran ni họn ẹmwẹ ne uẹn. 39 Miẹn mwẹ fan vbe obọ ihẹn ne ohan rẹn mu mwẹ, u miẹn vbe ibuohiẹn ruẹn re ọyunnuan hẹ! 40 I ho ne I gha mu iyi ruẹ sẹ rhie arrọọ ọgbọn mẹ, rhunmwuda, ọmwata ọ re uwẹ khin. Ne A Gha Mu Ẹtin Yan Uhi E Nọyaẹnmwa 41 Nọyaẹnmwa, rhie ma mwẹ vbene u ho ẹmwẹ mwẹ sẹ hẹ, ne u vbe miẹn mwẹ fan, zẹ vbe eyan ruẹn. 42 Ẹghẹ nii, mẹ gha sẹtin zẹ ẹmwẹ wanniẹn iran ni rhovbiẹ mwẹ, rhunmwuda I mu ẹtin yan ẹmwẹ ruẹn. 43 Gun mwẹ sẹtin gha ta ẹmwata vbe ẹghẹ hia, rhunmwuda, ibuohiẹn ruẹn ọ re idaehọ mwẹ ye. 44 Mẹ gha ya uhi ruẹ gha ru emwi vbe ẹghẹ hia, ẹdẹdẹmwẹdẹ. 45 Mẹ gha rrọọ, zẹ vbe ọmwa ne ọ yan egbe ẹre rhunmwuda mẹ hia ne I gha mu iruẹmwi ruẹn sẹ. 46 Mẹ gha na iyẹn iyi ruẹ ma avbe ọba ekhue i ra vbe mu mwẹ. 47 Iyi ruẹ ne a mu sẹ ya ẹko rhiẹnrhiẹn mwẹ, rhunmwuda iran wa yẹ mwẹ. 48 I ya ọghọ ne iyi ruẹ, I vbe hoẹmwẹ ọnrẹn, I gha mu igiodẹ ruẹ roro. A Mu Ẹtin Yan Uhi E Nọyaẹnmwa 49 Ye eyan ne u yan ne imẹ nẹ ọguọmwadia ruẹ rre, ọ rhie idaehọ mẹ nẹ. 50 Ọ fu mwẹ ẹko rre ya sẹ egbe ẹghẹ ne I na gha rre uwu ibaro rhunmwuda, eyan ruẹn rhie arrọọ mẹ. 51 Ẹghẹ hia iran ni tọn egbe mu ya zan mwẹ, sokpan, mẹ ma he beghe lahin uhi ruẹ rre. 52 I ya ohiẹn ne u buru ẹkpo nẹdẹ rre iran keghi fu mwẹ ẹko rre Nọyaẹnmwa. 53 I gha bẹghe avbe emwa dan vbe iran rra uhi ruẹ ohu ghi gha mu mwẹ sọsọsọ. 54 Vbe ovbi ẹghẹ kherhe ne I ya ẹe vbe agbọn te I ya avbe iyi ruẹ gha so ihuan. 55 I ye ruẹ rre vbe asọn, Nọyaẹnmwa, I ghi vbe mu ẹmwẹ uhi ruẹ roro. 56 Uhi ruẹ ne a mu sẹ ọ re ọ ya ẹko rhiẹnrhiẹn mwẹ. A Mu Aro Ye Ẹmwẹ Uhi E Nọyaẹnmwa 57 Wẹ okpa ọ re I ho Nọyaẹnmwa, I yan rẹn ighe I gha mu uhi ruẹ sẹ. 58 Ekhọekekhọe mwẹ hia ọ re I ya rinmwian an, wẹ ne u tohan mwẹ, zẹ vbene u yan rẹn! 59 I mu ẹmwẹ uyinmwẹ mwẹ ro nẹ, mẹ yan rẹn ighe I gha lele igiodẹ ruẹ. 60 Vbe ne ai na rhọ eghẹrẹ ẹgiẹgiẹ ọ re I ya ye iyi ruẹ ru emwi. 61 Iran ne emwa dan khuẹn ifi khẹ mwẹ sokpan, mẹ ma mianmian uhi ruẹ. 62 Vbe ogiasọn, mẹ rhiọrre ne I rho ruẹ ye ibuohiẹn ẹmwata ruẹ. 63 Ọse iran hia ni gaa ọ re imẹ khin, iran hia ni ya uhi ruẹ ru emwi. 64 Nọyaẹnmwa, agbọn vuọn ne aho ẹmwẹ ọmwa ruẹn ne ẹ i beghe, ma mwẹ iyi ruẹ. Umamwẹ Uhi E Nọyaẹnmwa 65 Nọyaẹnmwa, wẹ ru nẹ zẹ vbene u yanrẹn, wẹ keghi vbe maa ne imẹ ne ọguọmwadia ruẹ. 66 Rhie ẹwaẹn kevbe irẹnmwi mẹ, rhunmwuda, mẹ mu ẹtin yan iyi ruẹ. 67 Vbe u te do gbe mwẹ hin ọkhọ rre, te I te ba odẹ ku, sokpan, banbanna nian, te I ghi họn ẹmwẹ ne uẹn. 68 A miẹn vbene u maa hẹ! A miẹn vbene u mwẹ itohan hẹ, ma mwẹ iyi ruẹ. 69 Iran ni tọn egbe mu ba mwẹ ohoghe, sokpan, ekhọekekhọe mwẹ hia, ọ re I ya ru vbene u khare. 70 Avbe emwa na i mwẹ irẹnmwi, sokpan, ọyẹnmwẹ uhi ruẹ sẹ mwẹ. 71 Ọ ma mẹ vbe a gbe mwẹ hin ọkhọ rre, rhunmwuda, ọ ya mwẹ ruẹ iyi ruẹ. 72 Uhi ne uwẹ rhie ne emwa vuọn mwẹ aro ẹsẹse sẹ igho ni rre agbọn na hia. Vbene Uhi E Nọyaẹnmwa Re Ọghe Emwata Hẹ 73 Wẹ ọ re ọ yi mwẹ, u kevbe rhie mwẹ lẹre; rhie irẹnmwi mẹ, ne I sẹtin ruẹ uhi ruẹ. 74 Ọyẹnmwẹ gha sẹ iran ni ya ọghọ ne uẹn, vbe iran a dẹghe mwẹ, rhunmwuda, mẹ mu ẹtin yan avbe eyan ruẹn. 75 Mẹ rẹnrẹn wẹ, ẹmwata ọ re avbe ibuohiẹn ruẹn khin Nọyaẹnmwa, kevbe wẹ, te u gia mu ẹtin yan, ọ re u na gbe mwẹ hin ọkhọ rre. 76 Gie ahoẹmwọmwa ruẹn ne ẹ i beghe fu mwẹ ẹko rre zẹ vbene u yan ma imẹ ne ọguọmwadia ruẹ. 77 Tohan mwẹ, mẹ gha rre agbọn, rhunmwuda, uhi ruẹ sẹ mwẹ ọyẹnmwẹ. 78 Te ekhue gha mu iran ni tọn egbe mu ne iran na ba mwẹ ohoghe. Zẹ vbe ọghomwẹ, mẹ gha mu ẹmwẹ igiodẹ ruẹ roro. 79 Gie iran ni ya ọghọ ne uẹn hu mwẹ gha dee, iran hia ni rẹn iyi ruẹ. 80 Gun mwẹ sẹtin gha ya iyi ruẹ ru emwi fo ne a ghẹ gie obọ gba mwẹ. Erhunmwu Imiẹnfan 81 Egbe wa wọ mwẹ Nọyaẹnmwa, ne I ya diakhẹ ruẹ ne u do miẹn mwẹ fan, I mu ẹtin yan ẹmwẹ ruẹn. 82 Aro vbo mwẹ ne I ya rhie aro ye odẹ gha khẹ eyan ne u yan rẹn, I keghi gha nọ wẹẹ, “De ẹghẹ ne u gha ya miẹn mwẹ fan?” 83 Te I ghi khian ọ rhiae, I ye vbe ẹkpo ne ọ yanghaẹn ne a mu fua, sevba, I ma he ye mianmian iyi ruẹ. 84 Vbia gha ye mudia kpee sẹ hẹ yi? De ẹghẹ ne u gha ya rria iran ni kpokpo mwẹ ikhi? 85 Iran ni tọn egbe mu ni i ya uhi ruẹ ru emwi, iran fian uvun ye otọ ya khuẹn ifi khẹ mwẹ. 86 Uhi ruẹ hia gia mu ẹtin yan, emwa ye ohoghe gun mwẹ gbinna, ru iyobọ mẹ. 87 Ekherhe ọ kere ne iran te gbe mwẹ uan sokpan, I ma fi iyeke gbe iyi ruẹ. 88 Rhunmwuda ahoẹmwọmwa ruẹn ne ẹ i beghe, gha ru mwẹ ẹse, ne I miẹn ehe na gha ya uhi ruẹ ru emwi. A Mu Ẹtin Yan Uhi E Nọyaẹnmwa 89 Ẹmwẹ ruẹn gha rrọọ ẹdẹdẹmwẹdẹ Nọyaẹnmwa; etẹbitẹ nọ vbe ẹrinmwi. 90 Ẹmwata ruẹ rrọọ ke orre ya sẹ orre; wẹ ọ re ọ mu agbọn gbọ ye ihe okpa ọ kevbe de ziẹn. 91 Emwi hia rrọọ do sẹ ẹdẹnẹrẹ na, rhunmwuda iyi ruẹ, rhunmwuda eguọmwadia ruẹ ọ re ehia khin. 92 Akpawẹ ẹ i re ne uhi ruẹ na ya ọyẹnmwẹ sẹ mwẹ, I gha wu ye usẹ ne ọ sẹ mwẹ nẹ. 93 Mẹ i fi iyeke gbe igiodẹ ruẹ ẹdẹ, rhunmwuda, iran ọ re u ya da mwẹ yi ye agbọn. 94 Ọwuẹ ọ re imẹ khin, miẹn mwẹ fan! I wa hia nẹ ne I rhie iyi ruẹ mwẹ. 95 Emwa dan mudia khẹ mwẹ, ne iran gbe mwẹ uan, sokpan, mẹ gha mu ẹmwẹ uhi ruẹ roro. 96 I gualọ ẹe miẹn nẹ wẹ emwi hia mwẹ okhiẹ sokpan, ne ọ gba fo ọ re iyi ruẹ khin. Aho Ghe Uhi E Nọyaẹnmwa 97 A miẹn vbene I ho ẹmwẹ uhi ruẹ hẹ, te I wa mu ẹẹn ro ne ebi ro. 98 Iyi ruẹ rrọ mwẹ ekhọe vbe ẹghẹ hia, ọ keghi ya mwẹ wan sẹ avbe eghian mwẹ. 99 I rẹn otọ emwi sẹ iran ni ma mwẹ emwi hia, rhunmwuda, te I mu igiodẹ ruẹ roro. 100 I mwẹ ẹwaẹn sẹ avbe eniwanrẹn, rhunmwuda, te I mu iyi ruẹ hia sẹ. 101 I lẹ ne avbe uyinmwẹ dan hia, rhunmwuda I ho ne I gha ya ẹmwẹ ruẹn ru emwi. 102 I ma fi iyeke gbe igiodẹ ruẹ, rhunmwuda, wẹ tobọ ruẹ ọ re ọ ma mwẹ emwi. 103 A miẹn vbe igiodẹ ruẹ rhiẹnrhiẹn hẹ, ọ gele wa rhiẹnrhiẹn sẹẹ owọn. 104 I miẹn ẹwaẹn ruẹ vbe uhi ruẹ, rhunmwuda ọnii, uyinmwẹ dan rhọkpa i ghi yẹ mwẹ. Uwanmwẹ Kevbe Uhi E Nọyaẹnmwa Rre 105 Ukpa ne ọ ma mwẹ odẹ ọ re ẹmwẹ ruẹn khin, kevbe uwanmwẹ ne ọ rre odẹ mwẹ. 106 I gha mu eyan mwẹ sẹ wẹ, I gha lele igiodẹ ruẹ ọghe ẹmwata hia. 107 Usẹ ne amerhẹn ọ re ọ sẹ mwẹ Nọyaẹnmwa, gunmwẹ gha rre agbọn, zẹ vbe eyan ruẹn. 108 Miẹn erhunmwu ekpọnmwẹ mwẹ Nọyaẹnmwa, ne u vbe ma mwẹ iyi ruẹ. 109 I mu egbe vbe ẹghẹ hia ne I wu ba ẹre, I ma he mianmian uhi ruẹ. 110 Avbe emwa dan khuẹn ifi khẹ mwẹ, sokpan, I ma he de iyi ruẹ. 111 Iyi ruẹ, ẹfe etẹbitẹ mwẹ nọ, emwi ọyẹnmwẹ uwa ọ re ọ khin mwẹ re. 112 I tae nẹ ighe te I ra gha lele iyi ruẹ ya sẹ ẹdẹ ne I gha wu. Ai mwẹ Ẹbe Ne Ọ Rre Uwu Uhi 113 Ohu iran ni ma guobọ ruẹ fo mu mwẹ, sokpan, I ho ẹmwẹ uhi ruẹ. 114 Wẹ ọrọre ne ọ gbinna mẹ, ke ne ọ degue mwẹ, uwu eyan ruẹn ọ re I na mwẹ idaehọ. 115 Wa kpao vbe ehe ne I ye rre, emwa orukhọ, I gha lele iyi Osanobua mwẹ. 116 Rhie ẹtin mẹ vbene u khare, mẹ gha rre agbọn ghẹ gie idaehọ mwẹ hiẹ mwẹ. 117 Da mwẹ yi, I gha rrọ vbe ai mwẹ ẹbe, mẹ gha mu ẹmwẹ iyi ruẹ ro vbe ẹghẹ hia. 118 Wẹ he iran hia ni fi iyeke gbe uhi ruẹ yotọ; kẹkan ọ re emwamwa erẹrẹ iran khin. 119 Te uwẹ ghe emwa dan hia zẹ vbe iku, rhunmwuda ọnii, igiodẹ ruẹ yẹ mwẹ. 120 Ohan mu mwẹ rhunmwuda ruẹ, ohan gba mwẹ ẹko rhunmwuda ibuohiẹn ruẹn. A Ru Zẹ Vbene Uhi E Nọyaẹnmwa Khare 121 Mẹ ru nọgbae kevbe nọkere nẹ, ghẹ sẹ mwẹ rae ye avbe eghian mwẹ obọ. 122 Yan wẹ u gha ye ọguọmwadia ruẹ obọ; ghẹ gie emwa ni hio hiẹnhiẹn yan mwẹ! 123 Te aro ghi vbo mwẹ ne I ya khẹ imiẹn fan ẹsọhẹ ruẹ, imiẹn fan ni ne uwẹ yan ye otọ. 124 Ya obọ aho ẹmwẹ ọmwa ruẹn ne ẹ i beghe mu mwẹ, ne u vbe ma mwẹ iyi ruẹ. 125 Ọguọmwadia ruẹ mẹ khin; rhie irẹnmwi mẹ, ne I miẹn ehe na rẹn otọ iruẹmwi ruẹn. 126 E Nọyaẹnmwa, ẹghẹ sẹe nẹ nian ne u ru emwi eso, rhunmwuda, emwa wa rra iyi ruẹ. 127 iho ẹmwẹ iyi ruẹ sẹẹ igoru, sẹ igoru ne ọ mose sẹ ehia. 128 Rhunmwuda ọnii, mẹ lele igiodẹ ruẹ hia; I keghi vbe sọnnọ odẹ ne ọ ma gba hia. A Ho Ne A Ya Uhi E Nọyaẹnmwa Gha Ru Emwi 129 Ọyunnuan ọ re iruẹmwi ruẹn khin, ekhọe mwẹ hia ọ re I ya mu ẹẹn sẹ. 130 Irhanotọ iruẹmwi ruẹn rhie uwanmwẹ rre, ọ vbe ma iran ni ma rẹn emwi ẹwaẹn. 131 Vbe uwu ne I na gualọ iyi ruẹ khian, te I ghi rhan unu ye otọ gha hẹwẹ fuẹnfuẹn. 132 Werriegbe ghe mwẹ, ne u tohan mwẹ, zẹ vbene u ru ghe iran ni ho ẹmwẹ ruẹn hia. 133 Da mwẹ yi ne I ghẹ de, zẹ vbene u khare; ghẹ gie ọkhọ siẹn yan mwẹ ginna otọ. 134 Fan mwẹ vbe obọ iran ni zẹ mwẹ kpokpo, ne I miẹn ehe na gha rhie avbe uhi ruẹ mwẹ. 135 Ya a gu ọmwa rrọọ ọwuẹ fiangbe mwẹ, ne u ma mwẹ avbe uhi ruẹ. 136 Ameve mwẹ lẹ kua zẹ vbe ẹzẹ, rhunmwuda ne emwa i na ya uhi ruẹ ru emwi. Uhunmwu ẹmwẹ Uhi E Nọyaẹnmwa 137 Ọmwata ọ re uwẹ khin, Nọyaẹnmwa, ẹmwata ọ re uhi ruẹ hia vbe khin. 138 Ilele ne u mu ye otọ, ọ kere, ọ vbe gba. 139 Ohu ne ọ mu mwẹ tọn vbe erhẹn vbe uwu imẹ, rhunmwuda, avbe eghian mwẹ i zẹye iyi ruẹ. 140 U miẹn vbe eyan ruẹn de ziẹn hẹ, u miẹn vbe ọ yẹ mwẹ hẹ. 141 Ọmwa ne a zan ke ne ai ka yọ mẹ khin, sokpan, I ma fi iyeke gbe iruẹmwi ruẹn. 142 Emwata ọ re uhi ruẹ khin ẹghẹ hia. 143 Mẹ vuọn ne ohawa kevbe ukpokpo, sokpan, iyi ruẹ ya ọyẹnmwẹ sẹ mwẹ. 144 Emwata ọ re igiodẹ ruẹ khin vbe ẹghẹ hia, rhie irẹnmwi mẹ, mẹ gha rre agbọn. Erhunmwu Afanvbirri 145 Ekhọe mwẹ hia ọ re I ya kpe tie ruẹ, Nọyaẹnmwa, zẹ ẹmwẹ wanniẹn mwẹ, mẹ gha rhie iyi ruẹ mwẹ. 146 Mẹ da tie ruẹ, miẹn mwẹ fan, I gha rhie uhi ruẹ mwẹ. 147 Vbe owẹn te yan rre, I da tie ruẹ nẹ wẹ ne u yọmwẹ obọ, eyan ruẹn ọ re imẹ na mwẹ idanmwehọ. 148 Te I rhan aro ua ye ukpo ne ẹdẹ gbe, ne I ya gha mu ẹmwẹ iyi ruẹ ro. 149 Họn urhu mwẹ Nọyaẹnmwa, rhunmwuda ahoẹmwọmwa ruẹn ne ẹ i bẹghe, rhie itohan ruẹn maa, ne u rhie orhiọn mwẹ lẹre! 150 Iran ne ekhọe dan, ni khu mwẹ khian, wa sikẹ mwẹ sayọ, avbe emwa ni i rhie uhi ruẹ mwẹ. 151 Sokpan, wẹ sikẹ mwẹ Nọyaẹnmwa, iyi ruẹ hia, etẹbitẹ nọ. 152 Ọ kpẹre ne I ghi rẹn igiodẹ ruẹ, te uwẹ ru iran, ne iran gha rrọ ẹdẹdẹmwẹdẹ. Erinmwian Ne Iyobọ 153 Ghe usẹ ne ọ sẹ mwẹ ne u miẹn mwẹ fan, rhunmwuda, mẹ ma yangbe uhi ruẹ. 154 Gbinna mẹ, ne u fan mwẹ fua; miẹn mwẹ fan, zẹ vbene u khare. 155 A i ra miẹn emwa dan fan, rhunmwuda, iran i ya uhi ruẹ ru emwi. 156 Sokpan, itohan ruẹn kpọlọ Nọyaẹnmwa; rhie itohan ruẹn maa, ne u miẹn mwẹ fan! 157 Eghian mwẹ kevbe iran ni kpokpo mwẹ bun, sokpan mẹ i de iyi ruẹ. 158 I gha bẹghe avbe ọgueva nii, ẹko ghi gha hu mwẹ, rhunmwuda, iran i ya iyi ruẹ ru emwi. 159 Ghe vbene igiodẹ ruẹ yẹ mwẹ hẹ Nọyaẹnmwa, ahoẹmwọmwa ruẹn i fiwerriẹ, rhunmwuda ọnii, miẹn mwẹ fan. 160 Udu uhi ruẹ ọrọre ẹmwata, ibuohiẹn ẹmwata ruẹ hia, etẹbitẹ nọ. A Mu Aro Ye Ẹmwẹ Uhi Ruẹ 161 Iran ni mwẹ ẹtin gha gunmwẹ khọn vbe ai mwẹ otọ, sokpan, te imẹ lohan uhi ruẹ. 162 U miẹn vbe ẹko rhiẹnrhiẹn mwẹ ye eyan ruẹn hẹ, ọ ye vbe ọyẹnmwẹ ne ọ sẹ ọmwa, ne ọ miẹn ako otọ emwi ighobioye nẹ, ne ọ lẹre. 163 Te ohoghe ye ẹko hu mwẹ rhunmwuda, ọ sọnnọ mwẹ, sokpan, uhi ruẹ yẹ mwẹ. 164 Igba ihinrọn ọ re I kpọnmwẹ ọn vbe ẹdẹ, rhunmwuda ibuohiẹn ẹmwata ruẹ. 165 Iran ni ho ẹmwẹ uhi ruẹ fe vbe ẹbe fẹẹrẹ, emwi ne ọ gha sẹtin mu iran gbotọ i rrọ. 166 Nọyaẹnmwa, I diakhẹ ruẹ ne u miẹn mwẹ fan, emwi ne u yi ẹre iyi ọ re imẹ ru. 167 Mẹ lele iruẹmwi ruẹn, ekhọe mwẹ hia ọ re I ya ho ẹmwẹ iran. 168 Mẹ lele iyi kevbe igiodẹ ruẹ, wẹ vbe bẹghe emwi hia ne I ru. Erhunmwu Iyobọ 169 Gie utumwẹ ne I ya nọ iyobọ, sẹ ehọ ruẹ Nọyaẹnmwa, rhie irẹnmwi mẹ zẹ vbene u yanrẹn. 170 Họn erhunmwu mwẹ, ne u miẹn mwẹ fan zẹ vbene u yan rẹn! 171 Mẹ gha rho ruẹ vbe ẹghẹ hia, rhunmwuda, u ma mwẹ uhi ruẹ. 172 I gha ya uhi ruẹ so ihuan, rhunmwuda, nọgbae ọ re iyi ruẹ khin. 173 Mu egbe ne u ya yọmwẹ obọ vbe ẹghẹ hia, rhunmwuda, iyi ruẹ mẹ lele. 174 Ghe vbene I rhie aro ye odẹ gha khẹ ẹsọhẹ imiẹnfan ruẹn Nọyaẹnmwa, I miẹn ẹkorhiẹnrhiẹnmwẹ vbe uhi ruẹ. 175 Rhie arrọọ mẹ ne I sẹtin gha rho ruẹ, ne igiodẹ ruẹ vbe gha yọmwẹ obọ. 176 I gha bibi yo bibi rre, zẹ vbe ohuan ne ọ wiri, rhunmwuda ọnii, do gualọ mwẹ, mẹ ne ọguọmwadia ruẹ rhunmwuda, I ma fi iyeke gbe uhi ruẹ. |
@ The Bible Society of Nigeria, 1996
United Bible Societies