Psalm 118 - Edo Bible (E Baibol Ẹdo) Version 1996

Erhunmwu Ekpọnmwẹ Akhọnmiotọ

¹ Wa rhie ekpọnmwẹ ne Nọyaẹnmwa, rhunmwuda, ọ maa, etẹbitẹ ọ re ahoẹmwọmwa rẹn vbe khin.

² Wa gie Izrẹl ne emwa rẹn kha wẹẹ, “Etẹbitẹ ọ re aho ẹmwẹ ọmwa rẹn khin.”

³ Wa gie avbe ohẹn Osanobua kha wẹẹ, “Etẹbitẹ ọ re aho ẹmwẹ ọmwa rẹn khin.”

⁴ Wa gie iran hia ni ga ẹe kha wẹẹ, “Etẹbitẹ ọ re aho ẹmwẹ ọmwa rẹn khin.”

⁵ Vbe uwu ibaro mwẹ, I kpe tie Nọyaẹnmwa ọ họn urhu mwẹ, ọ kevbe fan mwẹ fua.

⁶ E Nọyaẹnmwa rrọọ yaba mwẹ, ohan i ghi mu mwẹ de emwi ne ọmwaikọmwa gha miẹn ru mwẹ re?

⁷ E Nọyaẹnmwa ọ re ọ yọmwẹ obọ aro mwẹ gha sẹ ọe vbe obọ a gba avbe eghian mwẹ.

⁸ Ọ kere ne a mu ẹtin yan e Nọyaẹnmwa, sẹẹ ne a mu ẹtin yan ọmwa.

⁹ Ọ kere ne a mu ẹtin yan Nọyaẹnmwa, sẹ ne a mu ẹtin yan avbe ọkaolotu ne emwa nagbọn kẹkan.

¹⁰ Eghian nibun ọ re ọ te lẹga mwẹ; sokpan, I ye ẹtin e Nọyaẹnmwa fuẹn iran hia a!

¹¹ Te iran te lẹ khin khian mwẹ; sokpan, I ye ẹtin e Nọyaẹnmwa fuẹn iran hia a!

¹² Iran te ma rhu mwẹ zẹ vbe owọn, sokpan, iran giẹn uan vbe imọ. I ya eni e Nọyaẹnmwa fuẹn iran hia a.

¹³ Te iran te wa yan rre, obọ iran te ra gba mwẹ fo, sokpan, e Nọyaẹnmwa keghi yọmwẹ obọ.

¹⁴ E Nọyaẹnmwa ya mwẹ gha mwẹ ẹtin I keghi vbe wegbe ọ miẹn mwẹ fan nẹ.

¹⁵ Gha họn vbene emwa we uwemwẹ akhọnmiotọ hẹ, vbe agọ emwa e Nọyaẹnmwa: “Ẹtin nọkhua ọghe Nọyaẹnmwa ọ re ọ ru ẹẹ.

¹⁶ Ẹtin ẹnrẹn ọ re ọ rhie akhọnmiotọ ne ima ẹtin ẹnrẹn nọkhua nii ne ọ ya khọn okuo!”

¹⁷ I i wu, sokpan, te I ra gha rre agbọn I ghi gha na iyẹn emwi ne Nọyaẹnmwa ru mẹ.

¹⁸ Ọ gbe mwẹ ne obọ da mwẹ, hin ọkhọ rre sokpan ọ ma wa gbe mwẹ uan.

¹⁹ Wa kie urho Ọgua Osa ye otọ mẹ I gha la uwu ẹre ne I ya kpọnmwẹ e Nọyaẹnmwa.

²⁰ Onurho ọghe Nọyaẹnmwa ọ re ọ na khin avbe ẹmwata ọkpa ọ re a gie ẹe la rọ.

²¹ I rho ruẹ Nọyaẹnmwa, rhunmwuda u họn urhu mwẹ nẹ, rhunmwuda, u rhie akhọnmiotọ mẹ nẹ.

²² Okuta ne iran ni bọ owa he ighe ẹ i maa, keghi werriegbe do khian amamiẹn a i ru ne ọ rrọọ.

²³ E Nọyaẹnmwa ọ re ọ ru ọna, u miẹn vbene ọ yan ọmwa unu an hẹ!

²⁴ Ẹdẹ akhọnmiotọ e Nọyaẹnmwa ọ re ọna khin wa gie ima gha ghọghọ, wa gie ima titi ẹe!

²⁵ Miẹn ima fan Nọyaẹnmwa miẹn ima fan! Gie ẹe dunna ne ima, Nọyaẹnmwa!

²⁶ Te Osanobua gha fiangbe ọmwa ne ọ dee vbe eni e Nọyaẹnmwa! Ma rhie afiangbe ne uẹn, ke uwu Ọgua Osa ọghe Nọyaẹnmwa gha dee.

²⁷ E Nọyaẹnmwa ọrọre Osanobua ọ wa vbe ru ima ẹse dee ẹdẹ wa viọ abọ erhan mwẹ obọ ne uwa suẹn emwi ukpo nii ne uwa gbe ukpukpẹ lẹga ogiukpo.

²⁸ Wẹ ọrọre Osanobua mwẹ mẹ vbe rhie ekpọnmwẹ ne uẹn, I gha na iyẹn ukpọlọmwẹ ruẹn.

²⁹ Wa rhie ekpọnmwẹ ne Nọyaẹnmwa rhunmwuda rẹn maa etẹbitẹ ọ re ahoẹmwọmwa rẹn vbe khin.