Psalm 116 - Edo Bible (E Baibol Ẹdo) Version 1996

Ọmwa Ne A Miẹnfan Vbe Uwu, Rho E Nọyaẹnmwa

¹ Mẹ ho ẹmwẹ Nọyaẹnmwa, rhunmwuda, ọ họn urhu mwẹ; ọ rhie ehọ ye erhunmwu mwẹ.

² Ọ danmwehọ mwẹ, vbe ẹghẹ ne I rhirhi na ya kpe tie ẹre hia.

³ Ẹbe ọghẹ uwu te lẹga mwẹ; orrirri idin te lẹga mwẹ; ohan kevbe ohawa te ra gbe mwẹ uan.

⁴ Ẹghẹ nii, ọ re imẹ ne kpe tie Nọyaẹnmwa: “E Nọyaẹnmwa, lahọ, miẹn mwẹ fan!”

⁵ E Nọyaẹnmwa mwẹ itohan, ọ vbe maa, ọmwa ne ọ vuọn ne ẹnina, ọ re Osanobua mwa khin.

⁶ Osanobua ru iyobọ ne ne ẹ i mwẹ, ẹghẹ ne I na gha rre uwu ẹbe, ọ miẹn mwẹ fan.

⁷ Ghẹ ghi fian afianma, wẹ ekhọe mwẹ, rhunmwuda, e Nọyaẹnmwa ru mwẹ ẹse nẹ.

⁸ E Nọyaẹnmwa miẹn mwẹ fan hin uwu rre, ọ kaa mwẹ ameve, ọ ma gie a obọ gba mwẹ.

⁹ Rhunmwuda ọnii, ọ re imẹ na khian vbe odaro e Nọyaẹnmwa, vbe otọe iran ni rre agbọn.

¹⁰ I keghi ye yayi, egbe ne I rhe ya kha wẹẹ, “A rẹnkhẹn mwẹ uan nẹ.”

¹¹ Ya sẹ egbe ẹghẹ ne ohan na gha mu mwẹ, ne I na kha wẹẹ, “A i miẹn ọmwa ne ọ gia mu ẹtin yan.”

¹² De emwi ne imẹ gha rhie ne Nọyaẹnmwa rhunmwuda ẹse hia ne ọ ru mẹ?

¹³ I gha mu ayọn izọhẹ gie Nọyaẹnmwa, ne I ya kpọnmwẹ ọẹn ye ne ọ na miẹn mwẹ fan.

¹⁴ I gha hae ẹre emwi ne I ve ẹre re vbe ehe ne emwa rẹn hia gbe ẹbu yi.

¹⁵ Ọ kakabọ da e Nọyaẹnmwa vbe okpa vbe uwu avbe emwa rẹn a wu!

¹⁶ Ọguọmwadia ruẹ mẹ khin Nọyaẹnmwa, te imẹ ga uwẹ, zẹ vbene iye mwẹ vbe ru, wẹ miẹn mwa fan vbe obọ uwu nẹ.

¹⁷ I gha zọ ese ekpọnmwẹ ghe ruẹ I ghi vbe na erhunmwu mwẹ ghe ruẹ.

^18-19 Vbe ehe ne emwa ruẹn hia gbe ẹbu yi, vbe ehe ne ọ huanrẹn ọghe Ọgua Osa ruẹ vbe Jerusalẹm I gha ha emwi ne I ve ne uẹn. Wa rho e Nọyaẹnmwa!