Psalm 109 - Edo Bible (E Baibol Ẹdo) Version 1996

Ẹzọ Ọmwa Ne Ọ Rre Uwu Ọlọghọmwa

¹ I rho ruẹ Osanobua, ghẹ hunwan!

² Emwa dan kevbe avbe ọhọn ohoghe gha gun mwẹ gbinna, iran gha ba mwẹ ohoghe khian;

³ iran vbe ta ẹmwẹ dan vbe ekpa mwẹ, iran gunmwẹ gbinna vbe ne ẹ i na mwẹ otọ.

⁴ Iran ghi gha solo mwẹ owẹ, egbe ne a rhe ya miẹn wẹ, mẹ ho ẹmwẹ iran.

⁵ Iran ya ọkhọ ha ọmaa mẹ iran ya ikhuiwu ha osa ahoẹmwọmwa mẹ.

⁶ Zẹ ọbuohiẹn dan, ne ọ ya bu ohiẹn avbe eghian mwẹ, ne u gie okpa vbe uwu avbe eghian rẹn guẹe gui.

⁷ Te a gha bu ohiẹn ọnrẹn wẹ ọ rria abe; erhunmwu ne ọ na, te a gha kha ighẹ ai ghẹru ọre ọ ya ẹe ru!

⁸ Gie ufomwẹ ẹdagbọn rẹn zẹgiẹ rre; ne ọmwa ọvbehe rhie ihe ẹre vbe iwinna!

⁹ Te ivbi ẹre gha khian emọ ne ẹ i mwẹ erha, ne amwẹ ọnrẹn khian ẹgbẹe!

¹⁰ Te avbe ivbi ẹre gha khian enọkpolugho ni vbu evbare re; te a gha vbe khulo iran kua, vbe uwu itowa ne iran te vbe ye.

¹¹ Te iran ne ọ rri ọre osa gha viọ emwi ẹnrẹn hia, te ẹrrẹe gha viọ ekhuan ne ọ khuan ẹn hia.

¹² Ai gha miẹn ọmwa ne ọ gha tohan rẹn, ra ne ọ gha koko emọ ne ẹ i mwẹ erha ne ọ sẹrae.

¹³ Te ivbi uniẹn ọnrẹn hia gha wulo, te eni ẹnrẹn gha gbe ẹro, hin ọghe orre ni dee rre.

¹⁴ Te Nọyaẹnmwa gha ye orukhọ avbe erha odede ẹre rre, ẹ i gha ya orukhọ iye ẹe bọ ẹe.

¹⁵ Te Nọyaẹnmwa gha ye orukhọ iran rre rhinrin, sokpan, ta a gha wa mianmian iran tobọ iran fẹfẹẹfẹ!

¹⁶ Oko nii ma zẹdẹ rẹn wẹ a vbe tohan ọmwa hiehiere, ọ ghi gbele iran an.

¹⁷ Ihẹn ne a tie yẹ ọre, te ọ gha khian ne a fi ẹre unu! Ẹ i ho ẹmwẹ erhunmwu afiangbe, ai gha miẹn ọmwa ne ọ gha na erhunmwu ne ẹẹn.

¹⁸ Te ihẹn ne a tie ghi gua ẹre obọ ro, zẹ vbe ne ẹwu ne ọ yọ ye ne ẹẹn; te ihẹn ne ọ tie gha rọn la ẹre egbe zẹ vbe amẹ; kevbe la uwu ugboloko ẹre zẹvbe ofigbọn!

¹⁹ Zevbe ukpọn, ọ ghi gba ẹre egbe khinkhian zẹvbe ugbẹkun.

²⁰ E Nọyaẹnmwa, rria avbe eghian mwẹ ni ikhi vberriọ, iran ni wa ta egbe ẹmwẹ dan vberriọ ghe mwẹ!

²¹ Sokpan, Nọyaẹnmwa, Osanobua mwẹ, yọmwẹ obọ zẹ vbene u khare, ne u wọlọ mwẹ ladian rhunmwuda umamwẹ aho ẹmwẹ ọmwa ruẹn.

²² Ovbiogue kevbe ne ẹ i mwẹ, ọre imẹ khin; ẹko zughu mwẹ ya sẹ otọ ibiẹ.

²³ Te a ghi khian ho mwẹ bẹkun na zẹ vbe aghọnghọn ota a hoho mwẹ fua zẹ vbe ovbi atete.

²⁴ Te igbọn mwẹ ghi ye lughọlughọ rhunmwuda ohanmwẹ, I i ghi mwẹ egbe gberra uvẹ vbe ikpakpa.

²⁵ Emwa gha beghe mwẹ iran ghi fieghe uhunmwu ọsọre mẹ.

²⁶ Yọmwẹ obọ, Nọyaẹnmwa Osanobua mwẹ rhunmwuda aho ẹmwẹ ọmwa ne ẹ i beghe miẹn mwẹ fan.

²⁷ Gie avbe eghian mwẹ rẹn wẹẹ, wẹ ọrọre ọmwa ne ọ miẹn mwẹ fan.

²⁸ Iran sẹtin gha tie ihẹn mẹ, sokpan, wẹ gha fiangbe mwẹ. Te obọ gha vba iran ni zẹ mwẹ owẹ, ne imẹ ne ọguọmwadia ruẹn gha ghọghọ.

²⁹ Te a gha ye efa yọ iran ne eghian mwẹ ẹwu; te iran gha mu efa iran yọ zẹ vbe agbada ẹwu.

³⁰ I gha ya urhu ne ọ la kpọnmwẹ Nọyaẹnmwa; I gha rho ẹre vbe uwu ẹbu avbe emwa ni,

³¹ rhunmwuda, ọ gbinna ne ovbiogue ọ kevbe miẹn rẹn fan vbe obọ iran ni bu abe uwu gbee.