Psalm 108 - Edo Bible (E Baibol Ẹdo) Version 1996

Erhunmwu Iyobọ Hin Obọ Eghian

¹ Osanobua, ekhọe mwẹ wa sẹ otọ vbe ẹmwata, I gha so ihuan, I gha rho ruẹ! Rhiọrre, wẹ ekhọe mwẹ!

² Wa rhiọrre akpata kevbe ukusẹ mwẹ! I gha huẹn owẹn vbe ovbe.

³ Nọyaẹnmwa, me gha kpọnmwẹ ọn vbe ẹbu avbe uhunmwu ẹvbo I gha rho eni ruẹn vbe uwu ẹbu avbe emwa.

⁴ Aho ẹmwẹ ọmwa ruẹn ne ẹ i beghe yo gberra ẹrinmwi, a gia mu ẹtin yan ruẹn yo gberra iso.

⁵ Rhie ukpọlọmwẹ ruẹn ma vbe iso Osanobua, kevbe uyi ruẹ, yan uhunmwu otọ agbọn hia.

⁶ Ya ẹtin ruẹn miẹn mwa fan; họn erhunmwu mwẹ ne a miẹn ehe na fannọ emwa ruẹn ne u ho ẹmwẹ ọnrẹn ye otọ.

⁷ Osanobua guan ke uwu owa ẹre ne ọ huanrẹn rre wẹẹ, “Vbe uwu akhọnmiotọ, I gha ghae Siẹkẹm, I ghi vbe ghae Iya Sukọt ne emwa mwẹ.

⁸ Mẹ ọre ọ yan Giliad, erriọ Manasẹ vbe ye, Ifreim ọrọre ẹrhu mwẹ, e Juda ọrọre ọkpọ ọba mwẹ,

⁹ sokpan, I gha ya Moab ru uwawa akhuẹ mwẹ, Idọm, ọre I gha vbe bannọ ibata mwẹ yan. Ne I ya rhiema wẹ mẹ ọ re ọ yan rẹn. I gha gbe ọvẹ akhọnmiotọ yan a Filistin uhunmwu.”

¹⁰ Osanobua, de ọmwa ne ọ gha rhie mwẹ gha rriẹ ẹvbo ne a gbe odin gaa ni? De ọmwa ne ọ gha ma mwẹ odẹ gha rriẹ Idọm?

¹¹ Te uwẹ gele he ima fua vbe ẹmwata ra? Wẹ i ra lele okuo mwa ladian ra?

¹² Yi ma obọ gu avbe eghian khọn ma, kẹkan ọre iyobọ ọmwa nagbọn khin.

¹³ Ugbẹn vbe Osanobua yaba ima nẹ, ma gha khọnmiotọ; ọ gha khọn avbe eghian mwa miotọ nẹ ima.