Psalm 107 - Edo Bible (E Baibol Ẹdo) Version 1996

EBE NE OGISẸN Ne Urhomwẹ Umamwẹ Osanobua

¹ Wa rhie ekpọnmwẹ ne Nọyaẹnmwa, rhunmwuda ighe ọ maa, etẹbitẹ ọre aho ẹmwẹ ọmwa rẹn khin.

² Wa dọlegbe ta avbe ẹmwẹ na ya rho e Nọyaẹnmwa, wa hia ne ọ dẹe werriegbe, ọ miẹn uwa fan nẹ vbe obọ eghian uwa.

³ Ọ keghi vbe viọ uwa werriegbe ke ẹvbo ẹrrẹe gha dee, ke odẹ ahọ rre kevbe orrie ke okuọ rre kevbe odẹ ekẹn rre.

⁴ Eso kegha zozo lele ato ne odẹ i ye khian iran ma vbe miẹn odẹ la gha rriẹ ẹvbo ne iran gha dia.

⁵ Ohanmwẹ gbe iran, ohanmwẹ amẹ vbe gbe iran uwu ọre iran ghi te khẹ.

⁶ Ẹghẹ nii, vbe uwu ọlọghọmwa iran, iran keghi da tie Nọyaẹnmwa, ọ keghi miẹn iran fan hin usẹ iran rre.

⁷ Ọ keghi viọ iran la odẹ ọwara gha rriẹ ẹvbo ne ọ gha gie iran yin.

⁸ Ọ kere ne iran rho e Nọyaẹnmwa ye aho ẹmwẹ ọmwa rẹn ne ẹ i beghe kevbe emwi ọyunnuan ne ọ ru ne iran.

⁹ Ọ sa amẹ ne iran ne ohanmwẹ amẹ gbe wọn ọ keghi ya emwi ne ọ maa vuọn iran ne ohanmwẹ gbe ẹko.

¹⁰ Eso kegha rrọ vbe uwu akhiẹ kevbe ebiebi oleghan ni susẹ vbe ọgiọrọ,

¹¹ rhunmwuda ighe iran de iyi, ọghe Osanobua ne Udazi, iran keghi vbe mu odẹ ne ọ gie ma iran fua.

¹² Egbe wọ iran, rhunmwuda ẹsọn ne iran miẹn, iran gha de, a i miẹn ne ọ ru iyobọ.

¹³ Ẹre iran na kpe tie Nọyaẹnmwa vbe uwu ọlọghọmwa iran ni, ọ keghi miẹn iran fan hin usẹ iran rre.

¹⁴ Ọ viọ iran ke uwu akhiẹ kevbe ebiebi ladian, ọ keghi bunnọ ọgiọrọ iran hẹ kua.

¹⁵ Ọ kere ne iran rho e Nọyaẹnmwa, ye aho ẹmwẹ ọmwa rẹn ne ẹ i beghe, kevbe emwi ọyunnuan ne ọ ru ne iran.

¹⁶ Ọ guọghọ ẹkhu oze kua, ọ keghi vbe vbiolo avbe ogba ematọn kua.

¹⁷ Eso kegha re akpa vbọ, iran ni gha rri oya ba ẹmwẹ orukhọ iran, kevbe ba ẹmwẹ ọkhọ ne iran ru.

¹⁸ Ẹmwẹ evbare ma gie iran ya rẹn enegbe, iran keghi sikẹ uwu.

¹⁹ Ẹre iran na kpe tie Nọyaẹnmwa vbe uwu ọlọghọmwa iran, ọ keghi miẹn iran fan hin usẹ iran rre.

²⁰ Ọ kha ẹmwẹ ya mu iran egbe rran, ọ keghi sinmwi iran hin idin rre.

²¹ Ọ kere ne iran rho e Nọyaẹnmwa rhunmwuda aho ẹmwẹ ọmwa rẹn ne ẹ i beghe kevbe emwi ọyunnuan ne ọ ru ne iran.

²² Ọ kere ne iran zọ ese ya kpọnmwẹ ọẹn ne iran vbe ye ihuan oghọghọ, ta iwinna ne ọ winnaẹn hia.

²³ Eso ya okọ gua okun rraa, uwu okun ọre iran na khuan igho evbare iran.

²⁴ Iran miẹn emwi ne Nọyaẹnmwa gha sẹtin ru iwinna ọyunnuan rẹn vbe okun.

²⁵ Ọ guan rẹn, okpẹhoho keghi suẹn gha hoho, ọ keghi gua ubimwẹ amẹ ghe ukhunmwu.

²⁶ A tọn avbe okọ nekhua mu fi ẹhoho, a keghi vbe filo iran fi uwu odin, vbe egbe ẹbe vberriọ, avbe emwa ni mianmian udinmwẹ iran.

²⁷ Iran rrua owẹ te iran ghi zẹ owẹ ahanmwahan vbe ọdayọn iguemwi iran hia ma ghi gha mwẹ esa ne ọ ye.

²⁸ Ẹre iran na kpe tie Nọyaẹnmwa vbe uwu ọlọghọmwa iran, ọ keghi miẹn iran fan hin usẹ iran rre.

²⁹ Ọ dọ okpẹhoho ne ọ hoho ni yọ, ulẹmwẹ ẹzẹ keghi hunmwan zẹẹ.

³⁰ Iran ghọghọ ye ne emwi na furre ni, ọ keghi viọ iran sẹ eghute ne iran ho hẹnnẹdẹn.

³¹ Ọ kere ne iran kpọnmwẹ e Nọyaẹnmwa ye aho ẹmwẹ ọmwa rẹn ne ẹ i beghe kevbe emwi ọyunnuan ne ọ ru ne iran.

³² Ọ kere ne iran na iyẹn ukpọlọmwẹ ọnrẹn vbe iko emwa, kevbe ne iran vbe rho ẹre vbe odaro iko avbe ọkaolotu.

³³ Nọyaẹnmwa si avbe ẹzẹ ka fẹfẹẹfẹ, ọ keghi dobọ avbe uhunmwu ẹzẹ ni lẹ obọ yi.

³⁴ Ọ ya avbe otọ ni maa emwiokọ khian otọe umwẹ, ni la ọ rhie rriẹ, rhunmwuda uyimwẹ dan avbe emwa ni rrọọ.

³⁵ Ọ fi avbe ato werriẹ khian odighi amẹ, avbe otọe ni kae, khian ẹzẹ ni lẹẹ.

³⁶ Ọ gie avbe emwa ne ohanmwẹ gbe yin evba, iran keghi bu ẹvbo ne iran yin ẹnrẹn.

³⁷ Iran kọ emwi ye ugbo iran keghi vbe kọ avbe azara iran keghi rhọ emwiokọ wọrhọwọrhọ.

³⁸ Ọ fiangbe emwa rẹn iran keghi biẹlẹ emọ nibun ọ kevbe ruẹe ne emwirri iran ghẹ dibu.

³⁹ Iran gha khọn emwa rẹn miotọ iran na vbe ya ukpokpo kevbe usẹ hiẹnhiẹn yan iran,

⁴⁰ ọ ghi mu ohu ghe iran ni zẹ iran kpokpo, ọ ghi ye iran gha kpolugho vbe ato ne odẹ i ye.

⁴¹ Sokpan ọ yuo iran ne ẹ i mwẹ hin usẹ iran rre, ọ keghi ya ẹgbẹe iran gha muan yọ zẹ vbe oghẹn ohuan.

⁴² Emwa ẹmwata miẹn ọna, iran kegha ghọghọ sokpan, a keghi gue emwa dan hia unu.

⁴³ Wa gie avbe umẹwaẹn mu avbe emwi na roro, ne iran miẹn kue wẹ, aho ẹmwẹ ọmwa ne ẹ i beghe ọghe Nọyaẹnmwa gele rrọọ.