Psalm 106 - Edo Bible (E Baibol Ẹdo) Version 1996

Umamwẹ Osanobua Ne Emwa Rẹn

¹ Wa rho e Nọyaẹnmwa! Wa rhie ekpọnmwẹ ne Nọyaẹnmwa, rhunmwuda ọ maa, etẹbitẹ ọre aho ẹmwẹ ọmwa rẹn khin.

² Gha ọ gha sẹtin na iyẹn, iwinna ọyunnuan hia ne ọ he winna ẹn? De ọmwa ne ọ gha sẹtin rho ẹre zẹ vbe ne ọ ke yi?

³ Afiangbe ọrọre ọghe iran, ni mu iyi ẹre sẹ, iran ni ru emwi ne ọgbae vbe ẹghẹ hia.

⁴ Nọyaẹnmwa, u gha ye emwa ruẹn obọ, u gha miẹn iran fan, u ghi rhie mwẹ ba ẹre Nọyaẹnmwa.

⁵ Gunmwẹ miẹn ọẹn vbe agbọn a maa emwa ruẹn, ne I vbe ghae vbe ọ yẹnmwẹ ruẹ, vbe ọyẹnmwẹ ne ọre ọghe emwa ruẹn.

⁶ Ma rukhọ, zẹ vbene avbe erha mwa odede vbe ru, ma ru emwi dan, ma vbe mwẹ ekhọe dan.

⁷ Avbe erha mwa odede ni gha rre Igipt, ma rẹn otọ iwinna ọyunnuan, ọghe Osanobua. Iran mianmian ẹghẹ nibun, ne ọ na rhie aho ẹmwẹ ọmwa rẹn ma iran, iran keghi sọtẹ ghe Oghodua, vbe Okun ne Nọbaa.

⁸ Sokpan, ọ miẹn iran fan zẹ vbene ọ yan rẹn, ne ọ miẹn ehe na rhie ẹtin ẹnrẹn nọkhua, ne a miẹn.

⁹ Ọ gu Okun ne Nọbaa guan, ọ keghi ka sẹ otọ; ọ keghi viọ emwa nii fian ẹẹn rra vbe otọe ne ọ kae.

¹⁰ Ọ miẹn iran fan vbe obọ iran ni khuiwu iran; ọ keghi yuo iran hin obọ eghian iran rre.

¹¹ Sokpan ẹzẹ gbele avbe eghian iran, ọkpa ne ọ miẹn uhunmwu vbọ i rrọọ.

¹² Ẹghẹ nii, emwa rẹn keghi ye eyan ne ọ yan rẹn yi, iran na so ihuan ya rho ẹre.

¹³ Sokpan, banbanna, iran vbe mianmian iwinna ne ọ winna ẹn nẹ, iran na gha ru emwi, vbe ne ai na dia khẹ vbene ọ kha hẹ.

¹⁴ Iran keghi vuọn ne orriarria vbe uwu ato, iran na gha danmwẹ Osanobua ghe.

¹⁵ Ọ keghi rhunmwuda ọnii rhie emwi ne iran nọ rẹn ne iran, sokpan, ọ keghi vbe mu emianmwẹ dan ku iran.

¹⁶ Vbe uwu ato nii, iran kegha gbọvo e Mosis kevbe Errọn eguọmwadia ni huanrẹn e Nọyaẹnmwa.

¹⁷ Ẹre otọe na rhan unu an, ọ na mi Datan re, ọ keghi vbe re Abiram ke eẹ kevbe ẹgbẹe ọre.

¹⁸ Erhẹn ke ẹrinmwi de yan irogho iran, ọ keghi vbe giẹn emwa dan ni uan.

¹⁹ Iran na ma ẹmila igoru vbe Sainai iran na gha gho amazẹ ni.

²⁰ Iran keghi fi uyi Osanobua werriẹ ghe ọghe ama aranmwẹ ne ọ rri irunmwu.

²¹ Iran mianmian Osanobua ne ọ miẹn iran fan vbekpa iwinna nekhua ne ọ winna ẹn vbe Igipt.

²² U miẹn emwi ọyunnuan ne ọ ru vbe evba u miẹn emwi ọyunnuan ne ọ ru vbe Okun ne Nọbaa.

²³ Ugbẹn vbe Osanobua khare ighe rẹn ra fuẹn emwa irẹn uan, e Mosis ne ọguọmwadia ẹre ne ọ hannọ zẹ keghi degbe Osanobua odẹ ọ ma gie ohu ẹre fuẹn iran an.

²⁴ Ẹghẹ nii, iran keghi he otọ esi ni, rhunmwuda iran ma ya eyan Osanobua yi.

²⁵ Iran keghi tota ye owa ukpọn iran gha zuyọn iran ma zẹ ye Nọyaẹnmwa ẹre.

²⁶ Rẹn keghi rhunmwuda ọnii ya obọ sekhae ne iran bu iran ude, wẹ rẹn gha gie iran wulo vbe uwu ato.

²⁷ Rẹn ghi vbe zagha ivbi iran gba ẹbu avbe ni ma yayi, ọ ghi vbe gie iran wulo ye ẹvbo ẹrrẹe.

²⁸ A ghi sẹ Peọ, emwa Osanobua keghi yegbe ba iran ni gho e Bal, iran keghi vbe re vbe emwi ne a ya zọ ese ghe amazẹ ne ẹ i mwẹ arrọọ.

²⁹ Iran keghi ya uyinmwẹ iran na, gu izohu Osanobua kpao, emianmwẹ dan keghi la uwu ẹbu iran.

³⁰ Sokpan, e Finihaz kpaegbe ọ keghi rri iran ni ru emwi khọ oya, egboghogbogho ni keghi dobọyi.

³¹ Te a ghi ya emwi na so eni ẹnrẹn ne ọ maa, ke ẹghẹ ni gha dee erriọ ọre ọ khian gha ye khian vbe otọ.

³² Vbe ovbi ẹzẹ e Mẹriba emwa ni keghi vbe ya ohu mu e Nọyaẹnmwa, e Mosis keghi la ẹmwẹ rhunmwuda iran.

³³ Iran keghi ya ohu mu ẹẹn sẹrriọ wẹ ọ na wa gha talọ vbe ne ẹ i na zẹdẹ ka roro ẹe.

³⁴ Iran ma gbele avbe nigẹbọ ni uan zẹ vbene Nọyaẹnmwa tama iran.

³⁵ Sokpan, iran keghi gba gha ya ọmọ ne egbe iran na gha yin uyinmwẹ igẹbọ iran.

³⁶ Emwa Osanobua kegha gho amazẹ ọ na ọre ọ si ọfuan ye iran egbe.

³⁷ Iran ye ivbi iran nikpia kevbe nikhuo gha zọ ese ne avbe ẹbọ Kenan.

³⁸ Iran gbele emọ ni ma rẹn okpa ọma rẹn eva nii, avbe uyinmwẹ izigha na keghi mu awua la ẹvbo.

³⁹ Iran keghi lekpa uyinmwẹ iran ya egbe iran khian ne ọ ma huan, iran ma gie Osanobua mu ẹtin yan.

⁴⁰ Rhunmwuda ọnii Osanobua mu ohu ghe emwa irẹn, ẹmwẹ iran keghi khan irẹn.

⁴¹ Ọ keghi sẹ iran rae ye obọ ẹtin enigẹbọ avbe eghian iran keghi gha kha yan iran.

⁴² Avbe eghian iran zẹ iran kpokpo, iran keghi wa viọ obọ yan iran uhunmwu fẹẹrẹ.

⁴³ Ẹghẹ nibun, ọ re e Nọyaẹnmwa ya rhan emwa irẹn ye otọ, sokpan, iran na wẹ te iran ra gha sọtẹ ghe ẹre, iran na dọlegbe gha ziẹn la uwu orukhọ.

⁴⁴ Sokpan, ugbẹn vbe iran ghi vbe tu ladian, e Nọyaẹnmwa keghi vbe họn urhu eve iran, ọ keghi vbe mu ẹmwẹ usẹ ne iran ye roro.

⁴⁵ Ọ rhunmwuda iran ye ile ẹre rre, rhunmwuda ne ọ na kakabọ ho ẹmwẹ iran ọ keghi gbe ibiẹ rriẹ.

⁴⁶ Ọ keghi ru ẹe ne agiẹngiẹn iran la ekhọe iran ni zẹ iran kpokpo.

⁴⁷ Miẹn ima fan, Nọyaẹnmwa Osanobua mwa, ne u viọ ima werriegbe ke uwu ẹbu avbe uhunmwu ẹvbo ladian, ne ima miẹn ehe na kpọnmwẹ ẹse ne a rho eni ruẹn ne ọ huanrẹn.

⁴⁸ Wa rho e Nọyaẹnmwa ne Osanobua Izrẹl, wa rho ẹre nian kevbe ẹdẹdẹmwẹdẹ! Wa gie emwa hia kha wẹẹ, “Ise!” Wa rho e Nọyaẹnmwa.