Psalm 105 - Edo Bible (E Baibol Ẹdo) Version 1996

Osanobua Kevbe Emwa Rẹn

¹ Wa rhie ekpọnmwẹ ne Nọyaẹnmwa, wa ta ẹmwẹ ukpọlọmwẹ ọnrẹn ladian, wa ta iwinna ne ọ winnaẹn, ma avbe uhunmwu ẹvbo.

² So ihuan urhomwẹ ghe Nọyaẹnmwa wa na iyẹn iwinna ọyunnuan ne ọ winna ẹn.

³ Wa gha ghọghọ wẹ ọghọe ma khin, wa gie emwa ni ga ẹe hia gha ghọghọ.

⁴ Wa bu e Nọyaẹnmwa wẹ ne ọ ru iyobọ ne uwa, ne uwa vbe ga ẹe vbene ai na dobọyi.

^5-6 Wa ne ivbi uniẹn Ebraham, ọguọmwadia ẹre; wa ne ivbi uniẹn Jekọb, ọmwa ne irẹn hannọ zẹ; wa ye iwinna ọyunnuan ne Osanobua winna ẹn rre, kevbe avbe ohiẹn ne ọ buru.

⁷ E Nọyaẹnmwa ọrọre Osanobua mwa; iyi ne ọ yi, ọghe otọ agbọn hia nọ.

⁸ Ọ gha rhie ile ẹre mwẹ ẹdẹdẹmwẹdẹ, kevbe eyan rẹn ne orre arriaisẹn.

⁹ Ọ gha mu ile ne irẹn vbe Ebraham gba ta sẹ, kevbe eyan ne irẹn yan ma Aizik.

¹⁰ E Nọyaẹnmwa gu e Jekọb ta ile nẹ, egbe ne ọ gha rrọọ rhinrin ẹdẹ.

¹¹ “I gha mu otọe Kenan nuẹn ọ ghi gha re ọwuẹ.” Erriọ ọre ọ khare.

¹² Ibozẹghẹ ọre emwa Osanobua gha khin iran kegha re ọrriọvbe vbe otọe Kenan.

¹³ Iran kpolugho ke ẹvbo okpa ya sẹ ọvbehe, ke arriọba okpa ya sẹ ọvbehe.

¹⁴ Sokpan, Osanobua ma gie ọmwaikọmwa wọ iran uhunmwu; ne ọ miẹn ehe na tan obọ gue iran, ọ keghi tama avbe ọba wẹẹ,

¹⁵ “Wa ghẹ kuan eguọmwadia ne I zẹẹ egbe, wa ghẹ ya obọ kan avbe akhasẹ mwẹ.”

¹⁶ E Nọyaẹnmwa keghi gie ukhunmwu gha rre ẹvbo iran, ọ keghi viọ evbare iran hia kpao.

¹⁷ Sokpan, ọ keghi gie ọmwa ke odaro ne iran, e Josẹf ne a khiẹn ẹre ọviẹn.

¹⁸ A keghi rrọ ọgiọrọ ye ọre owẹ, a kevbe gba urọnghọn ematọn ye ọre urhu.

¹⁹ A te do miẹn wẹ emwi ne ọ ta ye otọ sunu, ẹmwẹ e Nọyaẹnmwa keghi rhie ma ighe ẹmwata ọre ọ ta.

²⁰ Ẹ i re ọba Igipt na wẹ ne a rhan ẹnrẹn, ne ọ gbe aro ghe avbe uhunmwu ẹvbo, a keghi faẹn fua.

²¹ Ọ rhie ẹre ye ne ọ gbearoghe arriọba ẹre ọ keghi ya ẹe ru enọkhaemwisẹ yan otọe ni.

²² Deba asẹ vbe uhunmwu avbe ewọe ọba, kevbe asẹ wẹ, ne ọ gha gie odẹ ma iran, ne ọ gu irẹn zẹ iro.

²³ Ẹre Jekọb na gha rriẹ Igipt, ọ na ya yin ẹvbo ni.

²⁴ E Nọyaẹnmwa keghi viọ emọ nibun ne emwa rẹn, ọ keghi gie iran wegbe vbe egbe sẹ eghian iran.

²⁵ Ọ gie ivbi Igipt gha khuiwu emwa rẹn, ọ kegha mu eguọmwadia ẹre rẹrẹ.

²⁶ Ẹre rẹn na gie eguọmwadia ẹre, ighe Mosis kevbe Errọn ne irẹn zẹe.

²⁷ Iran winna iwinna nọkhua ọghe Osanobua, iran keghi vbe winna iwinna ọyunnuan vbe Igipt.

²⁸ Osanobua keghi gie ebiebi la ẹvbo ni, sokpan, ivbi Igipt ma ya uhi ẹre ru emwi.

²⁹ Ọ ye ẹzẹ iran khian esagiẹn, ọ keghi gbele ehẹn ni rrọ hia.

³⁰ A tue ẹkirẹ yan ẹvbo iran, ẹguae tobọ ẹre keghi vuọn ne iran.

³¹ Osanobua guan rẹn, ikian kevbe ẹkhunkhun, keghi hihiẹ gba ehe hia vbe ẹvbo ni.

³² Ọ gie avan nukhunmwu, kevbe ayan ye otọe ni, ye ihe amẹ ne ọ rhọ.

³³ Ọ dunmwu erhan azara kevbe erhan ohọ, ọ keghi bunnọ avbe erhan ni rrọọ ku otọ.

³⁴ Ọ guan rẹn, avbe irhiso keghi rre, inuẹbo ne ai sẹtin ka.

³⁵ Iran rri erhan ni rre otọe ni hia, iran rri emwiokọ hiaa.

³⁶ Ọ gbele emọ ikpia ni re emọdiọn, ọghe ẹgbẹe ni rre otọe Igipt hia.

³⁷ Iyekọni, ọ keghi viọ ivbi Izrẹl ladian, iran viọ esiliva kevbe igoru, egbe wa rran iran hia, iran keghi vbe wegbe vbe egbe.

³⁸ Ohan iran kegha mu ivbi Igipt, iran keghi ghọghọ ua vbe iran kpao.

³⁹ Osanobua keghi mu okuku amẹ, ye odukhunmwu emwa irẹn, kevbe erhẹn vbe asọn, ne ọ gha rhie uwanmwẹ ne iran.

⁴⁰ Iran nọ rẹn ọ keghi viọ ukobozo gie iran, ọ rhie evbare gie iran ke ẹrinmwi rre ne ọ gie ẹko vuọn iran.

⁴¹ Ọ kie okuta nọkhua, amẹ na vẹ kua ọ keghi lẹ la ato gberra zẹ vbe ẹzẹ.

⁴² Ọ ye ile ne ọ gu Ebraham ne ọguọmwadia ẹre ta rre.

⁴³ Erriọ ọre ọ na su avbe emwa rẹn, ne ọ hannọ zẹ ladian, iran so ihuan, iran kegha we uwemwẹ oghọghọ.

⁴⁴ Ọ mu otọe emwa ọvbehe ne iran ọ na vbe gie iran munọ ugbo iran.

⁴⁵ Ne avbe emwa rẹn, miẹn ehe na gha ya uhi ẹre ru emwi ne iran vbe rhie iyi ẹre hia mwẹ. Wa rho e Nọyaẹnmwa!