Psalm 104 - Edo Bible (E Baibol Ẹdo) Version 1996

Urhomwẹ Ayi Ne Ọ Yi Emwi Hia

¹ Rhie urhomwẹ ne Nọyaẹnmwa wẹ ekhọe mwẹ, e Nọyaẹnmwa Osanobua mwẹ, a miẹn vbene uwẹ kpọlọ hẹ! Orrirri ọba kevbe uyi ọre a rhuan uwẹ re zẹvbe ukpọn.

² Wẹ ye uwanmwẹ gue egbe ruẹ hia, u tan ẹrinmwi zẹ vbe ibọkpọ.

³ U keghi bọ owa ruẹ yan amẹ ne ọ rre odukhunmwu, u ye okuku amẹ ru ikẹkẹ okuo ruẹ, u keghi hin khian vbe ifuẹn ẹhoho.

⁴ U ya ẹhoho ru ne u gie ẹre uhunmwu kevbe asan ọghe ayan, zẹ vbe eguọmwadia ruẹ.

⁵ U mu agbọn gbọ ye ẹyotọ ẹre gbain ai vbe mu ẹẹn hin rre ẹdẹdẹmwẹdẹ.

⁶ U mu okun rhu ẹe zẹvbe ẹwu, amẹ keghi gue avbe oke muotọ.

⁷ U gu avbe amẹ gui, iran khirhi lẹ kua, vbe u zọkan gu iran guan.

⁸ Iran lẹ la oke gberra la iya, gha rrie ehe ne u mwa ye otọ ne iran.

⁹ U mwa uwu yọ, iran i sẹtin gberra evba, ne a ghẹ gie iran ya dọlegbe rhu agbọn ginna otọ.

¹⁰ U gie ẹzẹ gha lẹ vbe uwu iya, ẹzẹ kegha lẹ la avbe oke.

¹¹ Iran rhie amẹ ne avbe aranmwẹ oha, evba nii ọre avbe emẹ oha yo, ne iran ya gha gbe ovbamẹ iran.

¹² Avbe ahianmwẹ bọlọ oko, ye erhan ni rre ọkpẹn ọnrẹn, iran keghi gha so ihuan.

¹³ U gie amẹ ke iso gha rriẹ uhunmwu avbe oke, a keghi ye afiangbe ruẹ vuọn agbọn.

¹⁴ U gie avbe irunmwu zọ ne ẹmila, kevbe ivbi erhan ne ọmwa nagbọn gha lo ne ọ miẹn ehe na gbe ugbo emwiokọ ẹre.

¹⁵ Ọ ghi vbe ru ayọn ne ọ ya ẹko ẹre rhiẹnrhiẹn, ofigbọn oliv ne ọ ya ekhọe ẹre rhiẹnrhiẹn, kevbe ebrẹd ne ọ rhie ẹtin ne ẹẹn.

¹⁶ Amẹ rhọ yan isida e Lebanọn ẹsẹse, erhan ọghe Nọyaẹnmwa ne irẹn tobọre kọe.

¹⁷ Evba nii ọre avbe ahianmwẹ bọ oko yi, uhunmwu erhan okan ore ọlọkọmwọrhu bọ oko ẹre yi.

¹⁸ Uhunmwu oke ni yo ọre avbe ẹwe oha dia, uvun okuta ọre avbe edi dia.

¹⁹ Wẹ yi uki ne a ya gha ka uki, owẹn vbe rẹn ẹghẹ ne ọ ya defua.

²⁰ Wẹ ọre ọ yi asọn, uwu ebiebi ọre avbe aranmwẹ aranmwoha na ladian.

²¹ Ivbi oduma ghi gha vanhiẹn vbe iran a gha ru ohuẹ, iran gha gualọ evbare ne Osanobua kpehe ẹre.

²² Ovẹn gha ghi yanrre, iran ghi werriegbe, iran ghi lovbiẹ ye uvun okuta iran.

²³ Ẹghẹ nii, emwa ghi ladian ne iran ya winna iwinna iran, iran ghi gha winna rhinrin ọ te sẹ ota.

²⁴ Nọyaẹnmwa emwi ne u yi wa bun, a miẹn vbene u ya ẹwaẹn ru ehia hẹ! agbọn vuọn ne emwi ne uyi hia!

²⁵ Evba nii ọre okun ye, ne ọ kpọlọ ke ne ọ vbe vbẹ ehe ne emwi ne a yi ne ai sẹtin ka ye, ne ọ kpọlọ kevbe ne ọ kanmwa.

²⁶ Uhunmwu ẹnrẹn ọre avbe okọ na gua, uwu ẹre ọre eni amẹ na kuu, ugbogiorinmwi amẹ ne uwẹ yi.

²⁷ Aro ruẹ okpa ọre iran hia ghe, ne u rhie evbare ne iran, vbe ohanmwẹ a gha gbe iran.

²⁸ Wẹ ghi rhie ne iran, iran ghi re u ghi rhie evbare rre, ẹko ghi vbe vuọn iran.

²⁹ Wẹ gha fi iyeke gbe, ohan ghi gha mu iran, u gha miẹn iran uhiọnrọnmwẹ, iran ghi wulo, iran ghi dọlegbe ghe ekẹn ne iran ke rre.

³⁰ Sokpan, u gha rhie uhiọnrọnmwẹ ne iran, iran ghi khian ne a yi, wẹ ọre ọ rhie arrọ ọgbọn ne otọe.

³¹ Te uyi e Nọyaẹnmwa gha rrọ ẹdẹdẹmwẹdẹ! Te ọyẹnmwẹ emwi ne irẹn yi gha sẹ Nọyaẹnmwa!

³² Rẹn gbe aro ghe otọe, otọe kegha guọ, ọ ya obọ kan avbe oke, ehia keghi tue ighogho ladian.

³³ I gha so ihuan ghe Nọyaẹnmwa, vbe ẹdẹ agbọn mwẹ hia, inu ẹghẹ ne I gha ya vbe agbọn hia; I gha so ihuan urhomwẹ ghe Osanobua mwẹ.

³⁴ Te ihuan ne I so gha yẹ ọre, rhunmwuda, ehe ne irẹn ye, ọre orhiẹnrhiẹn mwẹ ke rre.

³⁵ Te a gha guọghọ avbe emwa orukhọ hin agbọn rre, ai ghẹ dọlegbe miẹn emwa dan ọvbehe. rho e Nọyaẹnmwa wẹ ekhọe mwẹ! Rho e Nọyaẹnmwa!