Psalm 103 - Edo Bible (E Baibol Ẹdo) Version 1996

Ahoẹmwọmwa Osanobua

¹ Rho e Nọyaẹnmwa, wẹ ekhọe mwẹ! emwi hia ni rre uwu imẹ, wa rho eni ẹnrẹn ne ọ huanrẹn!

² Rho e Nọyaẹnmwa wẹ ekhọe mwẹ, ghẹ vbe mianmian vbene ọ mwẹ itohan hẹ.

³ Ọ ya orukhọ mwẹ hia bọ mwẹ, ọ vbe mu mwẹ egbe rran hin emianmwẹ hia.

⁴ Ọ ma gunmwẹ la idin, ọ keghi ye aho ẹmwẹ ọmwa kevbe itohan fiangbe mwẹ.

⁵ Ọ ya emwi ni maa vuọn ẹdẹ agbọn mwẹ, sẹrriọ wẹ te imẹ ye ye gbain I keghi ye bọlọzọ zẹ vbe oghohọn.

⁶ Ọmwa ne a zẹ kpokpo, ọre Nọyaẹnmwa bu ohiẹn na, ọ ghi vbe gie emwi ne ọ khẹ ke iran sẹ iran obọ.

⁷ Ọ ta emwi ne irẹn khian ru ma Mosis ọ vbe gie ivbi Izrẹl miẹn iwinna irẹn nọkhua.

⁸ E Nọyaẹnmwa mwẹ itohan ọ mwẹ aho ẹmwẹ ọmwa, ẹ i rherhe mu ohu, ọ vuọn ne aho ẹmwẹ ọmwa ne ẹ i beghe.

⁹ Ẹ i gu ọmwa gui ẹzọ ne ẹ i fo vbotọ, ẹ i vbe mu ohu ne ai mu ye otọ.

¹⁰ Ẹ i rri ima oya ne ọ ma mwa, ra ne ọ ru ima emwi ba ẹmwẹ orukhọ kevbe abakuru mwa.

¹¹ Zẹ vbe ne iso yo rrei ne otọ erriọ ọre aho ẹmwẹ ọmwa rẹn kpolo ghe iran ni ya ọghọ ne ẹẹn.

¹² Zẹ vbe ne ahọ rrei ne orrie, erriọ rẹn vbe mu orukhọ mwa khian rrei ne ima.

¹³ Zẹ vbene erha tohan ivbi ẹre, erriọ e Nọyaẹnmwa tohan iran ni ya ọghọ ne ẹẹn.

¹⁴ Ọ rẹn emwi ne a ya yi mwa ọ yerre wẹ, ekẹn ma khin.

¹⁵ Zevbe ọghomwa te ẹdagbọn mwa ye vbe irunmwu, ma ghi wan, a ghi miotọ zẹ vbe obobo oha.

¹⁶ Ẹhoho ghi guọnmwẹ ọẹn ọghọe fo vbotọ, ọmwarhọkpa i ghi miẹn ọẹn ọvbehe.

¹⁷ Sokpan, zẹ vbe ọghe iran ni ho ẹmwẹ Nọyaẹnmwa, aho ẹmwẹ ọmwa rẹn rrọ ẹdẹdẹmwẹdẹ, umamwẹ ọnrẹn vbe sun khian la orre hia fẹẹrẹ.

¹⁸ Vbe uwu iran ni ru vbene uhi ẹre khare, kevbe ni ye ekhọe ẹmwata ẹmwata mu uhi ẹre sẹ.

¹⁹ E Nọyaẹnmwa mu ẹkete ẹre ye ẹrinmwi, rẹn ọrọre ọba yan ehia.

²⁰ Wa rho e Nọyaẹnmwa, wa ne avbe odibo nekhua kevbe ni mwẹ ẹtin, ni mu uhi ẹre sẹ, ni vbe danmwehọ ẹmwẹ ne ọ guan.

²¹ Wa rho e Nọyaẹnmwa, wa ne avbe ẹtin ẹrinmwi, wa ne eguọmwadia ẹre, ni ru iho ẹre.

²² Wa rho e Nọyaẹnmwa, wa ne emwi ne irẹn yi hia, ni rre ehe hia ne irẹn gbearoghe, rhie urhomwẹ ne Nọyaẹnmwa, wẹ ekhọe mwẹ!