Psalm 102 - Edo Bible (E Baibol Ẹdo) Version 1996

Erhunmwu Igbama Ne Ọ Mwẹ Ọlọghọmwa

¹ Rhie ehọ ye erhunmwu mwẹ Nọyaẹnmwa, vbe họn urhu mwẹ vbe I nọ iyobọ.

² I gha rre uwu ọlọghọmwa, ghẹ fi iyeke gbe mwẹ! U ghi danmwehọ mwẹ, ne u zẹmwẹ wanniẹn mwẹ ẹgiẹgiẹ vbe I a gha tie!

³ Agbọn mwẹ wa hoho ua khian vbe ighogho, ikinnegbe mwẹ wa giẹn vbe erhẹn.

⁴ A rẹnkhẹn mwẹ ginna otọ vbe ẹbe ne ọ kakae, evbare i ghi khọn mwẹ hiehiere.

⁵ Te I ghi rriakọn ne emwa hia họn, I i ghi mwẹ egbe gberra ohian vbe uvẹ.

⁶ Te I ghi ye vbe ahianmwẹ oha vbe uwu ato, zẹ vbe esughusughu vbe itowa.

⁷ I gha lovbiẹ I i miẹn ovbe, I yevbe ahianmwẹ okhiọnkpa vbe ẹrhunrhun owa.

⁸ Te avbe eghian mwẹ ghi ya ẹbọ viẹ mwẹ ne ebi ro, eni mwẹ ọre iran ni giẹ mwẹ ghi ya tie ẹbọ.

^9-10 Rhunmwuda ohu kevbe okuosu ruẹ, emuẹn ọre ọ ghi re evbare mwẹ, ameve mwẹ ghi gha kharha gua amẹ ne I wọn. U gua mwẹ rhie, u ke fi mwẹ fua.

¹¹ Agbọn mwẹ yevbe aghọnghọn ota; I yevbe irunmwu ne ọ kakae.

¹² Sokpan, Nọyaẹnmwa, wẹ ọrọre ọba ẹdẹdẹmwẹdẹ; orre hia gha ye ruẹ rre.

¹³ Wẹ gha kpaegbe, u ghi tohan Zaiọn, ẹghẹ sẹ nẹ ne a gha na tohan rẹn; ẹghẹ ne ọ ke yi ọre ọna khin.

¹⁴ Avbe eguọmwadia ruẹ ho ẹmwẹ ọnrẹn, egbe ne a rhe ya fuẹn ọnrẹn uan, iran ye tohan rẹn, a gha rhe miẹn wẹ itowa ore ghi nọ.

¹⁵ Avbe uhunmwu ẹvbo gha mu ohan e Nọyaẹnmwa, avbe ọba agbọn hia gha mu ohan ẹtin ẹnrẹn.

¹⁶ Ẹghẹ ne Nọyaẹnmwa gha na dọlegbe bọ e Zaiọn, ọ gha rhie ukpọlọmwẹ irẹn maa.

¹⁷ Ọ gha họn ọghe emwa rẹn ne ọ sẹrae, ọ gha danmwehọ erhunmwu iran.

¹⁸ Wa gbẹnnẹ iwinna ne Nọyaẹnmwa winnaẹn ye otọ, ne avbe orre ni dee, vbene emwa ne a ma he biẹlẹ, gha na rho ẹre.

¹⁹ E Nọyaẹnmwa ke ehe ne ọ huanrẹn, ọghọe ne ọ yo gbe aro ghe otọe, ọ ke ẹrinmwi gbe aro ghe otọe.

²⁰ Ọ họn eve ikhiẹkhiegbe ọghe iran ni rre ẹwẹdọ ọ na fannọ iran ne a bu ohiẹn uwu gbe kua.

²¹ Rhunmwuda ọnii, a gha go wan eni ẹnrẹn vbe Zaiọn, a gha vbe rho ẹre vbe Jerusalẹm.

²² Vbe avbe uhunmwu ẹvbo kevbe arriọba a si koko iran ghi ya uhunmwu rhanmwotọ ne Nọyaẹnmwa.

²³ E Nọyaẹnmwa ya ugboloko mwẹ wọn ẹvbi, vbe I he rre ọvbokhan ọ fian utọmwẹ mwẹ kanmwa.

²⁴ Osanobua, ghẹ rhie mwẹ kpao ẹghẹ na, vbe ẹ i re te I khian ọmaẹn nẹ. O Nọyaẹnmwa, wẹ rrọ ẹdẹdẹmwẹdẹ.

²⁵ Vbe ẹghẹ ne ọ kpẹ fua, u keghi yi agbọn na, obọ ruẹ ọre u vbe ya yi ẹrinmwi.

²⁶ A gha ho iran bẹkun, sokpan, wẹ gha rrọọ, ehia gha rẹnhuan zẹ vbe ukpọn, a gha ho iran bẹkun.

²⁷ Sokpan, abọ ọkpa ni wẹ ye ẹdẹ, ẹdagbọn ruẹn i vbe mwẹ ọfo.

²⁸ Avbe ivbi mwa gha rrọọ vbe ai mwẹ ẹbe, kevbe wẹ, rhunmwuda ighe wẹ ọre ọ tan obọ gue iran avbe ivbi iran gha rrọọ zẹ vbe emwa ne ẹkun sẹ ọre otọ.