Psalm 101 - Edo Bible (E Baibol Ẹdo) Version 1996

Eyan Ọba

¹ Ihuan mwẹ re ọghe a ya ekhọe ga kevbe ohiẹn ẹmwata, wẹ ọre imẹ so ẹe na Nọyaẹnmwa.

² Uyinmwẹ mwẹ gha re ne ẹ i mwẹ abaku, de ẹghẹ ne u gha ya bu mwẹ rre? I gha yin uyinmwẹ ne ọ khuiae vbe owa mwẹ.

³ Mẹ i ra vbe rhie otọ ne emwi ọkhọ, I khuiwu uyinmwẹ emwa ni fi iyeke gbe Osanobua me i ra gu iran mu obọ.

⁴ Mẹ i ra zẹ okeke, mẹ i ra vbe gu ọkhọ mu otu.

⁵ Mẹ gha gia miẹn ufomwẹ ọmwaikọmwa, ne ọ ta ewẹwẹwẹ dan vbe ekpa ọmwa ọvbehe; mẹ i ra rhie otọ ne ọmwa ne ọ tọn egbe mu ke ne ọ hio.

⁶ Mẹ gha guan ẹse ye ọghe iran ni rhie ekhọe lele Osanobua, I gha gie iran gha rre ẹguae mwẹ. Iran ne ẹ i mwẹ okeke hiehiere I gha gie iran gha ru eguọmwadia mwẹ.

⁷ Ọhọn ohoghe i ra di ẹguae mwẹ ya, ọmwa ne ọ fian yan egbe i ra mudia ye odaro mwẹ.

⁸ Ke ẹdẹ dinna ẹdẹ, mẹ gha fuẹn iran, ighẹ avbe emwa dan ni rre otọe mwa, I gha khulo emwa ọkhọ hia, hin ore nọkhua ọghe Nọyaẹnmwa rre.