Psalm 10 - Edo Bible (E Baibol Ẹdo) Version 1996

Erhunmwu Ibuohiẹn Ẹmwata

¹ Vbe u a na khian rrei sẹrriọ hẹ yi, Nọyaẹnmwa? Vbe u a ghi na rhie egbe lẹre hẹ yi? Vbe ima rre uwu ibaro?

² Iran ne emwa dan tọn egbe mu, iran gha zẹ ivbiogue kpokpo, ya ifi ne iran khuẹn munọ iran.

³ Ọmwa dan ya emwi dan ne ọ khọnrẹn ghagha. Ọmwa uzuanmwẹ kpa unu ghe Osanobua, ọ keghi vbe he ẹe ye otọ.

⁴ Ọmwa dan i vbe zẹ ye Nọyaẹnmwa re vbe uwu itengbe mu ẹnrẹn, ọ rorẹe wẹ, Osanobua imwẹ asa ne ọ khin.

⁵ Ọmwa dan wa miẹn ọ dunnaẹn vbe emwi ne ọ ru hia, ẹi sẹtin rẹn otọ ibuohiẹn Osanobua. Te ọ ghe avbe eghian rẹn, silaa.

⁶ Rẹn ghi tama egbe ẹre wẹẹ, “Mẹ i gbekuẹn ẹdẹ, mẹ i miẹn ọlọghọmwa ẹdẹ.”

⁷ Ihẹn ne a tie, ọ re ẹmwẹ ne ọ ta hia khin, kevbe ohoghe deba ne a na yan gie ọmwa. Obọ wa kẹ ọre vbe ẹmwẹ ikhuiwu dan ne a ta.

⁸ Ọ ghi ya lẹre ye uwu igue ọ ghi gha khọ emwa ne ọ ma rriabe ne ọ gha gbe ua. Ọ ghi gha baba ivbi ẹrrẹe, ne obọ ẹre ghi vba.

⁹ Ọ ghi rhuẹ ye ehe ne ọ lẹre yi zẹ vbe oduma, Ọ ghi lẹre khẹ ovbiogue. Ọ gha ghi ya ifi ẹre munọ iran nẹ, ọ ghi silo iran gha rriẹ.

¹⁰ Ivbiẹrrẹe ne obọ ẹre vbare, ghi rẹnkhẹn uan ye otọ vba. Ẹtin akuọkan ọ re ọ ya gbele iran kua.

¹¹ Ọmwa dan ghi tama egbe ẹre wẹẹ, “Osanobua i zẹ yọ! Ọ mimi aro ẹre nẹ, ẹi bẹghe mwẹ!”

¹² E Nọyaẹnmwa, rri avbe emwa dan na oya. Ye avbe emwa ne oya re rre.

¹³ Vbọzẹ ne ọmwa dan gha na gha zan Osanobua yi, ọ ghi gha kha wẹẹ, “Ẹi ru mwẹ emwirhọkpa”?

¹⁴ Sokpan, wẹ bẹghe ẹre, wẹ vbe zẹ ye ọlọghọmwa kevbe oya ne emwa re, u vbe mu egbe ne u ya ru iyobọ ẹghẹ hia. Wẹ, ọ re ọmwa ne ne ẹi mwẹ iyobọ lẹgbinna, wẹ ọ re ọ ye ne ẹi mwẹ iyobọ obọ, ke otọ gha dee.

¹⁵ Guọghọ ẹtin emwa dan ni zẹ iba, rri iran oya ye emwi dan ne iran ru, iran te do dobọ ẹre yi.

¹⁶ E Nọyaẹnmwa ọrọre ọba ẹdẹ kevbe ẹdẹdẹmwẹdẹ. A gha ho iran ni ga ẹbọ bẹkun, vbe otọ Osanobua

¹⁷ E Nọyaẹnmwa, wẹ gha họn erhunmwu avbe ọmẹhẹ, u gha rhie igiẹdu ne iran.

¹⁸ U gha họn, utumwẹ iran ne a zẹ kpokpo, kevbe emọ ne ẹi mwẹ erha. U gha bu ohiẹn ne iran, ne ọmwa ne ọ vbe sẹtin wu, ghẹ ghi zẹ afianma ye ọmwa egbe ọvbehe.