Obedaia 1 - Edo Bible (E Baibol Ẹdo) Version 1996

¹ Ẹmwẹ akhasẹ ne Obedaia miẹn ọre ọna khin ẹmwẹ ne Nọyaẹnmwa ne Udazi tae vbe ekpa Idọm. E Nọyaẹnmwa gie ukọ ẹre gha rrie avbe uhunmwu ẹvbo nẹ, ma vbe họn uhunmwu ne a gie iran re wẹẹ: “Wa mu egbe! Wa gie ima mu okuo gha rrie Idọm!”

E Nọyaẹnmwa Gha Rri Idọm Oya

² E Nọyaẹnmwa khama Idọm wẹẹ: “I gha ya uwẹ khian ne mitan mitan; emwa hia gha zan ruẹn.

³ Uhiomwẹ ruẹn ọ re ọ rẹrẹ ọ. Igiogbẹ ẹvbo ruẹ, ẹvbo ne a ya okuta ne ọ wegbe gbe odin ga nọ; owa ruẹ yo vbe uhunmwu oke nọkhua wẹ keghi rhunmwuda ọnii tama egbe ruẹ wẹẹ, ‘De ọmwa ne ọ gha sẹtin si mwẹ gbotọ?’

⁴ Ọ gha khọn ruẹn ne u bọ owa ruẹ ye ehe ne ọ yo zẹ vbe oko oghohọn ne ọ ghi na do gha yevbe ne ọ rre ehe ne avbe orhọnmwẹ ye, Sevba te I ra siọ sẹ otọ.

⁵ “Avbe oyi gha rre vbe asọn, emwi ne iran ho ọkpa ọ re iran viọ. Emwa gha kọlọ alimo ayọn, te iran ye sẹ ekherhe rae yọ. Sokpan, te avbe eghian ruẹn ra wa ya ruẹ obọ sin otọ fẹẹrẹ.

⁶ Wa ne ivbi uniẹn Isọ, iran fu ẹfe ruẹ hia viọ.

⁷ Iran nii ne uwa gba ye egbe khian hiẹ ruẹ. Iran khu ẹ hin ẹvbo ruẹ rre, iran ne uwa te gba rrọ kugbe vbe ọfumwegbe, ọ re ọ ghi do khọn ruẹn mu otọ. Avbe esiọ ne uwa gba rri evbare ọ re ọ ghi khuẹn ifi khẹ ruẹ. Ẹmwẹ ne iran ghi ta vbe ekpa ruẹ ọrọre: ‘Iguemwi ẹnrẹn ni hia ghi vbo yi?’

⁸ “Ẹdẹ ne I gha rri Idọm oya, I gha fuẹn emwa irẹnmwi ẹnrẹn hia a. I ghi vbe khiẹn ẹwaẹn iran hia hin rre.

⁹ Emwa ni gbinna ni rre Tẹman gha runran, a ghi vbe gbele ivbiyokuo ni rre Idọm hia a.

Emwi Ne Ọ Zẹe Ne A Na Rrii Idọm Oya

¹⁰ “Rhunmwuda, u rhare, u do izigha avbe etuẹn, ivbi uniẹn Jekọb, a gha fuẹn ruẹn uan, a ghi vbe fa rua ẹdẹdẹmwẹdẹ.

¹¹ Te u mudia gha ghe ughe vbe ẹdẹ ne avbe eghian guọghọ onurho iran kua. Te uwa wa vbe gha re emwa dan zẹ vbene avbe orhunmwuyẹn gha ye, iran ni fu ẹfe Jerusalẹm viọ gha rrie iran na ya gba ghaa ẹre.

¹² Ọ ma te kei ne u gha gbe ọvẹ ye emwi dan ne ọ rruan etuẹn ni rre Juda. Ọ ma te ke ne ẹko gha sẹ uẹ ọyẹnmwẹ vbe ẹdẹ ne iran fuan. Ọ ma te ke ne u gha giẹ iran vbe iran miẹn usẹ.

¹³ Ọ ma te kei ne u la ẹvbo emwa mwẹ ne u ya gbe ọvẹ yan iran vbe usẹ ne iran sẹ, ne u vbe do emwi ẹfe iran hẹ, vbe ẹdẹ ne emwi degbe iran.

¹⁴ Ọ ma te kei ne u ya mudia ye ada, ne u gha munọ iran ni te ra le fe. Ọ ma te kei ne u munọ iran viọ gie avbe eghian iran, vbe ẹdẹ ne iran miẹn ibaro.

Osanobua Gha Bu Ohiẹn Avbe Uhunmwu Ẹvbo

¹⁵ “Ẹdẹ bu otọ nẹ ne imẹ ne Nọyaẹnmwa gha bu ohiẹn avbe uhunmwu ẹvbo. Idọm, vbene u ru emwa ọ re a ra vbe ruẹ. Emwi ne u ya ru ẹse ọ re a gha vbe rhie ne uẹn.

¹⁶ Emwa mwẹ wọọn nẹ vbe ukpu orriara ọghe irrioya. Sokpan, avbe ẹvbo ni lẹga iran gha wọn ukpu ne ọ rriara sẹẹ ọnii ẹsẹse ọghe irrioya, iran gha wọn ehia, a ghi ho iran hia bẹkun.

Akhọnmiotọ Izrẹl

¹⁷ “Sokpan, eso gha lẹ fe vbe Oke Zaiọn ọ ghi gha re ehe nọhuanrẹn. Ivbi uniẹn e Jekọb gha dọlegbe yan otọe ne ọ re ọghe obọ iran.

¹⁸ Ivbi e Jekọb kevbe Josẹf gha ye vbe erhẹn, iran gha fuẹn ivbi Isọ ua. Vbene erhẹn giẹn ebe ne ọ kakae, ọkpa ne ọ gha miẹn uhunmwu i rre ivbi Isọ. Mẹ ne Nọyaẹnmwa ọ re ọ taa ẹe.

¹⁹ Emwa ni ke odẹ ekẹn e Juda rre gha mu Idọm, iran ni ke ototọ oke odẹ orrie rre gha mu e Filistia, ivbi Izrẹl gha yan iwewe Ifreim kevbe Sameria; ivbi e Bẹnjamin gha mu e Giliad.

²⁰ Ivbiyokuo iran ne a viọ ke odẹ okuọ Izrẹl gha rrie iwe, gha werriegbe rre do khọn mu Fonisia ya sẹ Zarefat vbe odẹ okuọ. Iran ne a ke Jerusalẹm viọ gha rrie iwe ni rre Sadis, gha khọn mu avbe ẹvbo ni rre odẹ ekẹn Juda.

²¹ Emwa ni khọnmiotọ vbe Jerusalẹm gha khọn mu Idọm, iran ghi vbe gha kha yan rẹn. E Nọyaẹnmwa tobọ ẹre ọre ọ khian gha re ọba.”