Nọmbas 8 - Edo Bible (E Baibol Ẹdo) Version 1996

Ehe Ne A Viọ Ukpa Yi

¹ E Nọyaẹnmwa keghi tama e Mosis wẹẹ,

² “Tama Errọn wẹ ọ gha viọ avbe ukpa ihinrọn yan uhunmwu erhan ọmukpa, ọ ghi viọ ẹre yọ vbe ne awanwan rẹn gha na la ghe odaro.”

³ Errọn keghi ru vberriọ, ọ na viọ avbe ukpa da odaro avbe erhan ọmukpa nii.

⁴ Igoru ne a ya umọmọ dunmwu ọre a ya ru ẹe ke otọ ya sẹ ukhunmwu vbene ọ ye ighẹ ne Nọyaẹnmwa mu ma Mosis.

Akpehuan Kevbe Ayafiohan Ọghe Avbe Livai

⁵ E Nọyaẹnmwa keghi tama e Mosis wẹẹ,

⁶ “Hannọ avbe Livai ye efẹn ọkpa hin uwu ivbi Izrẹl rre ne u kpe iran huan vbenian:

⁷ sanmwẹ amẹ afọ yan iran, ne u wẹ ne iran zọ eto hin egbe iran hia rre fẹẹrẹ, ne iran vbe họ ukpọn iran. Ẹghẹ nii awua i ghi rre iran egbe.

⁸ Avbe Livai ghi mu ovbi ẹkhuia ẹmila kevbe ihaoko ọka ọghe irhuarhua ne a ye ofigbọn oliv gbe, wẹ ghi mu ẹkhuia ne ogieva ọghe izọese orukhọ mwẹ.

⁹ U ghi tie ivbi Izrẹl hia si koko, ne u viọ avbe Livai ma iran vbe odaro Owa Ukpọn Ile.

¹⁰ Ivbi Izrẹl ghi viọ obọ iran yan avbe Livai uhunmwu.

¹¹ Errọn ghi ye avbe Livai fi ohan mẹ zẹ vbe izẹọhẹ kpataki ke obọ ivbi Izrẹl rre ne iran do gha winna iwinna mwẹ.

¹² “Iyeke ọnii, avbe Livai ghi viọ obọ iran yan ekhuia ẹmila eva nii uhunmwu, a ghi ya ọkpa vbọ zọ ese orukhọ, a ghi ya nọkpa zọ ese na giẹn uan, ne a miẹn ehe na ru iruemwi akpehuan ne avbe Livai.

¹³ Ye avbe Livai fi ohan mẹ; zẹ vbe emwi ihaoko kpataki, ne u viọ Errọn kevbe ivbi ẹre ye ne ọ gha gbe aro ghe iran.

¹⁴ Wannọ avbe Livai hin uwu ẹbu ivbi Izrẹl rre vberriọ ne iran miẹn ehe na gha re ọghomwẹ.

¹⁵ U gha kpe avbe Livai huan nẹ, u na vbe ya iran fiohan mẹ, ẹghẹ nii te iran ghi kei ne ọ gha winna vbe uwu Owa Ukpọn Ile.

¹⁶ I viọ iran ye ihe emọ ọdiọn ikpia ọghe ivbi Izrẹl, ọghe imẹ ọkpa ọre iran ghi khin.

¹⁷ Ẹghẹ ne I na gbele emọ ọdiọn vbe Igipt, I keghi ya emọ ọdiọn ikpia ọghe ivbi ẹgbẹe Izrẹl fi ohan zẹ vbe ọghomwẹ, deba emọ ọdiọn ọghe aranmwẹ.

¹⁸ Banbanna nian, avbe Livai ọ re I ghi viọ ye ihe emọ ọdiọn ọghe ivbi Izrẹl.

¹⁹ Mẹ keghi viọ iran ne Errọn kevbe avbe ivbi ẹre zẹ vbe emwi izẹọhẹ ke obọ ivbi Izrẹl rre, ne iran gha ru ugamwẹ mẹ vbe uwu Owa Ukpọn Ile ne ivbi Izrẹl, kevbe ne ọ degue iran hin obọ ẹbe ne ọ gha te rruan iran vbe iran a sikẹ Ehe Ne ọ huanrẹn nii gbe.”

²⁰ Ẹre Mosis, Errọn ke ẹe kevbe emwa Izrẹl hia ghi na ye avbe Livai fi ohan zẹ vbe ne Nọyaẹnmwa tama e Mosis.

²¹ Avbe Livai keghi khuẹ egbe iran huan, iran na họ ukpọn iran, Errọn keghi ya iran fi ohan zẹ vbe izẹọhẹ kpataki ne Nọyaẹnmwa. Ọ keghi vbe ru iruemwi akpehuan ne iran.

²² Ọre avbe Livai ghi na kei vbe emwa ni gha winna vbe uwu Owa Ukpọn Ile vbene Errọn kevbe ivbi ẹre na gbe aro ghe iran.

²³ E Nọyaẹnmwa keghi tama e Mosis wẹẹ,

²⁴ “Ke ọmọ ukpo ekesọgban kpao ọre avbe Livai gha ke gha winna iwinna iran vbe uwu Owa Ukpọn Ile.

²⁵ Iran gha ghi sẹ ukpo ekigbe siyeha nẹ, iran ghi ban akpa.

²⁶ Vbe iyeke ọnii, iran sẹtin ru iyobọ ne e Livai ne ihua iran vbe iran a gha winna iwinna iran vbe uwu Owa Ukpọn, sokpan, ne iran ghẹ ghi winna iwinna rhọkpa iran ọkpa kẹkan. Erriọ u gha mwamwa iwinna avbe Livai ye ihe dọmwadẹ ọghe ọe.”