Nọmbas 5 - Edo Bible (E Baibol Ẹdo) Version 1996

Emwa Nimahuan

¹ E Nọyaẹnmwa keghi tama e Mosis wẹẹ,

² “Tama ivbi Izrẹl ne iran viọ avbe emwa ne emianmwẹ ikpakpa ne ọmwa ọvbehe na sẹtin hẹ, ra ne egbe ẹre gin amẹ, kevbe emwa hia ne awua gue rhunmwuda ighẹ ọ ya egbe kan orinmwi, hin ore agọ rre.

³ Viọ emwa ni hia ne awua gue na ladian, ne iran ghẹ ya mu awua ye agọ nii, ehe ne I na gu emwa mwẹ rrọọ.”

⁴ Ivbi Izrẹl keghi họn, iran keghi viọ ehia ladian hin agọ rre.

Osa Ne A Hae Ye Emwi Abaku Ru

⁵ E Nọyaẹnmwa keghi viọ avbe

⁶ igiodẹ na ma e Mosis ne ọ viọ ne ivbi Izrẹl. Deghẹ ọmwaikọmwa ma ru emwi ne ọ yẹ Nọyaẹnmwa vbe ekpa ne ọ na ru emwi abakuru ghe ọmwa ọvbehe.

⁷ Ọ ghi miẹn orukhọ ẹre kue, ọ ghi vbe hae osa gba deba aghae ye ihe ugie ẹre ne ọmwa nii ne ọ ba emwi ku ru ghe.

⁸ Sokpan, a deghẹ ọmwa ni wu nẹ ighẹ ẹ i vbe mwẹ ọtẹn ne ọ sikẹ ọre ne a gha ha ose na, a ghi rhie ẹre gie Nọyaẹnmwa ne ọ gha re ọghe ohẹn. Osa ne ọ hare na ghi gha re ne ọ deba ogho ne a ya ru emwi izọ ese akpehuan naẹn.

⁹ Erriọ vbe nọ, izẹ ọhẹ kpataki ne ivbi Izrẹl rhie gie Nọyaẹnmwa, ọ ghe ohẹn ne a viọ ẹre na nọ.

¹⁰ Dọmwadẹ ohẹn ghi gha viọ izẹọhẹ ne a hẹ gie ẹe.

¹¹ E Nọyaẹnmwa keghi tama e Mosis wẹẹ,

^12-14 ne ọ rhie igiodẹ na ma ivbi Izrẹl. A deghẹ okpia mu idandan wẹ amwẹ irẹn ghẹ ga irẹn ighẹ awua gu ẹe, rhunmwuda ighẹ ọ lovbiẹ ke okpia ọvbehe. Sokpan deghẹ aro ọdọ ẹre ma da ẹe rhunmwuda ighẹ okhuo ni rhie ẹre lẹre, osẹe i rrọọ, a ma vbe mu ẹẹn ginna ẹn vbe ọ ru ẹe. Ra ne a kha wẹ okpia mu idandan vbe egbe amwẹ ọnrẹn, a gha rhe miẹn wẹ okhuo ni ma ghẹ.

¹⁵ Ne ọ rhirhi gha khin vbe iran eva, okpia ni ghi rhie amwẹ ọnrẹn bu ohẹn gha khian ọ ghi vbe viọ emwi ihaoko ne a mwa yọ mwẹ, uwan irhuarhua eva, sokpan ne ọ ghẹ sa ofigbọn oliv yọ ra ne ọ rhie eturari yọ, rhunmwuda ẹmwẹ a mu idandan vbe emwi ọ na khin, ne a miẹn ehe na rẹn ẹmwata ne ọ rrọọ.

¹⁶ Ohẹn ghi rhie okhuo nii ladian, ọ ghi rhie ẹre mudia ye odaro e Nọyaẹnmwa.

¹⁷ Ohẹn ghi sa amẹ iruemwi ye uwawa, ọ ghi zẹ vbe ekẹn ni rre uwu Owa Ukpọn Ile ye uwu amẹ nii.

¹⁸ Iyeke ọnii, ọ ghi rhan okhuo ni eto, ọ ghi mu irhuarhua ne a ya ha oko nii ye ọre obọ. Ohẹn ghi mu ọkpan ne amẹ nọ rriara ne ọ fi emwi unu, mwẹ obọ.

¹⁹ Ohẹn ghi ya okhuo ni vẹn ihẹn vbenian, “A deghẹ uma ru oghẹ, wẹ ne amẹ unu, ne amẹ na ya ne emwa, ghẹ ruẹ emwi rhọkpa.

²⁰ Sokpan a deghẹ u ghẹre.

²¹ Te Nọyaẹnmwa gha ya eni ruẹn khian ne a fi ẹre unu vbe uwu ẹbu avbe emwa, te ọ gha gie ẹgẹn ruẹn kpero ne ẹko ruẹ hue ladian.

²² Te amẹ na gha la ruẹ ẹko, ne ọ ya ẹe hue ladian ne ọ vbe gie ẹgẹn ruẹn kpero.” Okhuo ni ghi wanniẹn wẹẹ, “I khuẹn niẹn yọ, te Nọyaẹnmwa gha ru ẹe vberriọ.”

²³ Ohẹn ghi gbẹnnẹ ihẹn na ye emwi, ọ ghi ya amẹ kpẹe mu ye ọkpan amẹ orriara nii.

²⁴ Vbe ohẹn te wẹ ne okhuo nii wọn amẹ nii, ne ọ miẹn ehe na la ẹre egbe ya si obalọ ne ọ rriara ye ọre egbe,

²⁵ ọ ghi ka mu irhuarhua ne a ya haoko rre nii hin okhuo nii obọ rre, ọ ghi tọn ẹn mu ghe odukhunmwu ya fi ohan ne Nọyaẹnmwa, ọ ghi ya ẹe zẹ ọhẹ ye aka.

²⁶ Ọ ghi zẹ uguobọ ọkpa vbọ zẹ vbe ihanna ọghe ihaoko, ọ ghi giẹn ọnrẹn uan vbe aka, vbe okiekie ehia, ọ ghi mu amẹ nii ne okhuo nii wọn.

²⁷ A deghẹ okhuo nii gele ghẹ, amẹ nii gha si obalọ orriara, ye ọre egbe, ẹko ẹre ghi hue, ẹgẹn ọnrẹn ghi kpero, eni ẹnrẹn ghi khian ne a ya tie ihẹn vbe ẹbu emwa rẹn.

²⁸ Sokpan, a deghẹ ọ ma rẹn ọkpa ọ ma rẹn eva, emwi rhọkpa i ru ẹe, ọ ghi yevbe sẹtin gha biẹlẹ.

^29-30 Uhi ne ọ rrọọ vbe okpia a gha mu ohu ighẹ ọ vbe mu idandan ighẹ amwẹ irẹn ghẹ, ọre ọ na khin. A ghi do rhie okhuo ni mudia ye odaro e Nọyaẹnmwa, ohẹn ghi vbe ru emwi ne a ru yọ vberriọ.

³¹ Ọdọ ẹre imwẹ abe ne a gha rhie nẹ, sokpan okhuo nii gha rri abe, a ghi rri ọre oya.