Nọmbas 4 - Edo Bible (E Baibol Ẹdo) Version 1996

Iwinna Ẹwae Ọghe Kohat Ne Livai

¹ E Nọyaẹnmwa keghi tama e Mosis wẹẹ,

² ne ọ ka ẹwae Kohat ni rre uwu avbe Livai uniẹn kevbe ẹgbẹe.

³ Ne ọ gbẹnnẹ eni avbe ikpia hia ke ukpo ọgban ya sẹ ekigbesiyeha, emwa ni kere ni gha winna vbe uwu Owa Ukpọn Ile.

⁴ Iwinna iran ke dekan emwi Nihuansẹ Ehia.

⁵ E Nọyaẹnmwa keghi ru igiodẹ na ma e Mosis wẹẹ, “Ọ gha sẹ ẹghẹ ne a ya si kpao vbe agọ rre, Errọn kevbe ivbi ẹre ghi la uwu Owa Ukpọn, iran ghi kie ukpọn onurho ne ọ rre odaro Ẹkpẹti Ile, iran ghi ya ẹe gue ẹkpẹti nii.

⁶ Iran ghi mu ohian ne mose rhu ẹe, iran ghi mu ukpọn ne raghoragho rhuẹe ẹre odukhunmwu, wa ghi bannọ avbe ọkpọ ne a ya mu ẹẹn yọ.

⁷ “Iran ghi mu ukpọn ne raghoragho rhu eteburu ọghe ebrẹd ne a ya zẹ ọhẹ gie Nọyaẹnmwa a ghi viọ avbe ọkpan yan rẹn, kevbe ọkpan ọghe eturari, avbe ọkpan izẹhẹ kevbe esago ayọn ne a ya zẹ ọhẹ.

⁸ Iran ghi mu ukpọn nọbaa rhu ena hia, a ghi vbe mu ohian nọ mose rhu ẹe a ghi do baba ọkpọ ne a ya muẹn yọ.

⁹ “Iran ghi rhie ukpọn ne raghoragho rhu erhan ọmukpa ke ẹe kevbe avbe ukpa ni rrọọ, kevbe awan, kevbe ekpamaku ne a ya wan erhẹn mu ofigbọn oliv yi.

¹⁰ Iran ghi ya ohian ne mose vbuẹ ọre kevbe emwi hia ne a lo ba ẹre mu yan edọnmwẹ ne a ya muẹn.

¹¹ “Vbe iyekọni, iran ghi wa ukpọn ne raghoragho yan aka igoru, iran ghi mu ohian ne mose ya gue ẹre, a ghi vbe baba ọkpọ ne a ya mu ẹẹn yọ.

¹² Iran ghi viọ ọkpan ne a lo vbe uwu Ehe Ne ọ huanrẹn, a ghi ya ukpọn ne raghoragho gue ẹre, a ghi mu ohian ne mose rhu ẹe, a ghi mu ẹẹn yan edọnmwẹ ne a ya mu ẹẹn.

¹³ “Iran ghi kpolo emuẹn ne lọkọlọkọ nii hin aka rre, a ghi mu ukpọn ododo rhu ẹe.

¹⁴ A ghi do viọ emwi hia ne a ya ru ugamwẹ vbe aka yọ: ọkpan iwaẹnrhẹn, adẹn, ovbẹvbẹ kevbe avbe ọkpan, iran ghi do mu ohian ne mose rhu ẹe iran ghi baba ọkpọ ne a ya muẹn yọ.

¹⁵ Ọ gha sẹ ẹghẹ ne a ya si kpao vbe agọ, ivbi e Kohat ghi do viọ avbe emwi nihuanrẹn nii, iyeke vbe avbe ivbi ẹre a ghi ya emwi gue ehia kevbe emwi ne a lo ba iran fo nẹ. Wẹ ne ivbi e Kohat ghẹ ye obọ kan emwi nihuanrẹn ni ne iran ghẹ wulo. “Iwinna ne ọ kan ivbi e Kohat vbe ẹghẹ ne a rhirhi ya si vbe agọ ọre ena khin.

¹⁶ Eliaza ne ovbi Errọn ne ohẹn ọ re ọ gha gbearoghe Owa Ukpọn hia kev be ofigbọn ne a sa ye ukpa, eturari, izẹọhẹ avbe ọka, ofigbọn ne a nọnọ ye uhunmwu kevbe emwi ọvbehe hia ne a ghi ya fiohan ne Nọyaẹnmwa ne vbe uwu Owa Ukpọn.”

¹⁷ E Nọyaẹnmwa keghi tama e Mosis kevbe Errọn wẹẹ,

¹⁸ “Wa ghẹ gia gbele ivbi e Kohat ua,

¹⁹ rhunmwuda ighẹ iran sikẹ emwi iruemwi gbe. Ne ọna ghẹ miẹn ehe na sunu, Errọn kevbe ivbi ẹre ghi la owa ya gha wa iwinna ne iran, ọ ghi tama rẹn emwi ne ọ gha mu.

²⁰ Sokpan deghẹ ivbi e Kohat la Owa Ukpọn iran na ya miẹn vbe avbe ohẹn gbalọ avbe emwi ni huanrẹn vbe ne a ra na si kpao, iran gha wulo.”

Iwinna Ẹwae Gẹsiọn

²¹ E Nọyaẹnmwa keghi tama e Mosis,

²² ne ọ ka avbe Livai ni rre ivbi ẹwae Gẹsiọn, uniẹn kevbe ẹgbẹe.

²³ Ne ọ vbe gbẹnnẹ eni ikpia ke ukpo ọgban ya sẹ ekigbesiyeha, iran ni kere ni gha winna vbe uwu Owa Ukpọn Ile.

²⁴ Iran ọre ọ gha munọ avbe emwi na.

²⁵ Owa Ukpọn Ile, emwi ne a ya gue ẹre vbe uwu ẹre, emwi ne a ya gue ẹre vbe odieke, ohian ne a ya gue ẹre odukhunmwu, ukpọn onurho ne ọ rre ehe ne a la larọ.

²⁶ Ukpọn onurho kevbe okun ni rre ọlẹga Owa Ukpọn kevbe aka, ukpọn onurho ne ọ rre ehe ne a la la ọlẹga, kevbe emwi hia ne a ya tan avbe emwi na hia. Iran ọ khian gha winna iwinna hia ni dekan avbe emwi na.

²⁷ E Mosis kevbe Errọn ghi gia miẹn wẹ ivbi Gẹsiọn winna avbe iwinnna na hia, iran ghi munọ emwi hia ne Errọn kevbe ivbi ẹre wa ne iran.

²⁸ Ena ọrọre iwinna ni kan ivbi e Gẹsiọn vbe uwu Owa Ukpọn Ile. Itama, ne ovbi Errọn ne ohẹn ọ re ọ gha giodẹ ma iran vbene iran gha ru ẹe hẹ.

Iwinna Ẹwae Merari

²⁹ E Nọyaẹnmwa keghi tama e Mosis ne ọka ẹwae Merari ni re Livai uniẹn kevbe ẹgbẹe.

³⁰ Kevbe ne ọ vbe gbẹnnẹ eni ikpia ni rre ukpo ọgban ya sẹ ekigbe siyeha ye ebe, iran ni kere ni gha winna vbe uwu Owa Ukpọn Ile.

³¹ Iran ọ re ọ gha yan iwinna ne a mu edọnmwẹ, ogha, ọkpọ kevbe ẹzi Owa Ukpọn,

³² deba ọkpọ, ẹzi ogba kevbe okun ọghe ọlẹga Owa Ukpọn nii, kevbe emwi hia ne a ghi ya mu ẹẹn mudia, a ghi ya eni dọmwadẹ ọghe ọe gha emwi ne ọ gha mu nẹ.

³³ Enena ọrọre iwinna ni re ọghe ẹwae Merari vbe ugamwẹ iran vbe uwu Owa Ukpọn Ile; Itama ne ovbi Errọn ne ohẹn ọre ọ gha gie odẹ ma iran vbene iran gha ru ẹe hẹ.

Inu Ne Avbe Livai Khin

^34-48 E Mosis, Errọn kevbe avbe olotu emwa Izrẹl keghi ka ẹwae avbe Livai eheha, e Kohat, e Gẹsiọn kevbe Merari vbe ẹgbẹe ọkpọkpa, zẹ vbene Nọyaẹnmwa tama iran, ọ keghi gbẹnnẹ eni ikpia ni rre ukpo ọgban ya sẹ ekigbe siyeha, emwa ni kere ni gha winna vbe Owa Ukpọn Ile, vbe nian: Ikpẹdẹ Ẹwae E Kohat ekigbesiyeha irrọvbe uri enẹ yan arriaisẹn eva (2,750) E Gẹsiọn ọgban yan uri eha yan arriaisẹn eva (2,630) E Marari uri yan arriaisẹn eha (3,200). Ehia kegha re ugie-irrọvbe arria eha ya arriaisẹn erẹnrẹn (8,580)

Ikpẹdẹ Ẹwae

⁴⁹ A keghi vbe gbẹnnẹ eni dọmwadẹ ọghọe ye ebe zẹ vbene Nọyaẹnmwa tama e Mosis. A keghi wa iwinna ne dọmwadẹ ọghọe, ne ọ gha ru ugamwẹ ra ne ọ gha mu emwi zẹ vbene Nọyaẹnmwa gie Mosis.