Nọmbas 36 - Edo Bible (E Baibol Ẹdo) Version 1996

Ukhu Ikhuo Ni Mwẹ Ọdọ

¹ Avbe ọkaẹgbẹe ni rre ẹwae Giliad, ovbi Makia, kevbe eyẹ Manasẹ ne ovbi e Josẹf keghi bu e Mosis kevbe avbe ọkaolotu nekpa.

² Iran keghi kha wẹẹ, “E Nọyaẹnmwa tama uwa ne uwa yan uta ya gha otọ ne ivbi Izrẹl, ọ ke vbe wẹ ne uwa viọ emwi ọtẹn mwa ighẹ Zẹlofehad ne avbe ivbi ẹre ni ikhuo.

³ Sokpan, yerre wẹ, iran gha ya rọnmwẹ ọdọ vbe ẹwae ọvbehe, avbe emwi nii ghi khian ọghe ẹwae nii, emwi ne a te ghae si ima obọ ghi gha dibu.

⁴ Ọ gha ghi sẹ ukpo ne a viọ emwi ne a te khian nẹ werriegbe ne enarẹn, emwi ivbi Zẹlofehad ni ikhuo ghi khian ne a ghi mu ba ọghe ẹwae ne iran na rọnmwẹ ọdọ fẹẹrẹ: ọ ghi fe ẹwae ima fua.”

⁵ Ẹre Mosis na ta ẹmwẹ ne Nọyaẹnmwa tama rẹn ma ivbi Izrẹl. Ọ wẹẹ, “Ẹmwata ọre ẹwae Manasẹ tae.

⁶ Rhunmwuda ọnii nian, ivbi e Zẹlofehad sẹtin rọnmwẹ ọdọ ne ọ ye iran, sokpan, ọ kere ne ọ gha re ivbi ẹwae ọghe iran.

⁷ Emwi ne ivbi Izrẹl mwẹ hia, ẹwae iran ọ re ọ kere na ọ gha ye.

⁸ Okhuo ne ọ rhirhi rri ukhu vbe ẹwae Izrẹl, uwu ẹwae nii ọre ọ gha na vbe gha zẹ ọdọ ne ọ ogha rọnmwẹ. Odẹ vbe nian; iybi Izrẹl gha sẹtin gha rriukhu avbe erha iran odede.

⁹ Avbe emwi i ghi ra kpao vbe obọ ẹwae ọkpa la ọvbehe. Dọmwadẹ ẹwae ghi gha re ne ọ yan emwi ẹnrẹn.”

^10-11 Ẹre Mala, Taza, Hogla, Milka kevbe Noa ne ivbi Zẹlofehad ni ikhuo na ru zẹ vbene Nọyaẹnmwa tama e Mosis, iran rọnmwẹ avbe emwa ne iran gba re eyeyẹ.

¹² Iran keghi rọnmwẹ ọdọ vbe uniẹn Manasẹ ne ovbi e Josẹf, emwi iran kegha rre obọ ẹwae erha iran.

¹³ Enena ọrọre emwamwa kevbe ilele ne Nọyaẹnmwa viọ ne Mosis viọ ne ivbi Izrẹl vbe avbe otọe ne ọ rriẹe ọghe Moab vbe a la Jẹriko fian Ẹzẹ Jọdan rra.