Nọmbas 35 - Edo Bible (E Baibol Ẹdo) Version 1996

Avbe Ẹvbo Ne A Viọ Ne Avbe Livai

¹ A ghi sẹ otọe nọ rriẹe ọghe Moab vbe iyeke Jọdan vbe a gha ke Jẹriko fian ẹn rra, e Nọyaẹnmwa keghi tama e Mosis wẹẹ,

² “Tama ivbi Izrẹl wẹ ne iran mu ẹvbo eso ne avbe Livai dia deba otọ ne aranmwẹ na rria eso lẹga ẹvbo nii.

³ Avbe ẹvbo na ghi do khian ọghe avbe Livai, iran ghi gha yin ẹnrẹn. Ehe ne aranmwẹ na rria nii ghi gha re ne avbe ẹmila iran kevbe avbe aranmwẹ ọvbehe gha na gha rria.

⁴ Otọe erria nii ghi wa ke ekẹn ne a gbe lẹga ẹvbo kpao, ọ ghi gha re ibata arriaeva vbe iyisẹn lẹga egbe.

⁵ A ghi mwa rẹn vbe ne a gha na miẹn wẹ umwọmwẹ nọ vbe igienenẹ, ibata arriaisẹn vbe ehe ne a rhirhi mu aro da vbọ vbe ne ẹvbo nii gha na gha rre adesẹneva.

⁶ Wa ghi mu ẹvbo ehan ne a gha lẹ fi ne avbe Livai, ehe ne ọmwa gha sẹtin lẹ gha rrie a deghẹ ọ gbe ọmwa ran vbe ne ẹi na re ẹmwẹ ọnrẹn, wa ghi vbe mu ẹvbo eva yan iyeva ọvbehe ba iran ẹre.

⁷ Ehia ghi do gha re eva irrọvbe kigbesiyeha (48) kẹe kevbe ehe ne avbe aranmwẹ na rria ni rrọ.

⁸ Vbene ẹwae kpọlọ ọre a gha ya gha ta ẹvbo ne a gha mu ne avbe Livai.”

Avbe Ẹvbo Ne A Le Fi

⁹ E Nọyaẹnmwa keghi tama e Mosis wẹ ne ọ,

¹⁰ tama ivbi Izrẹl wẹẹ: “Wa ghẹ ghi fian Jọdan rra nẹ, wa na la otọe Kenan,

¹¹ wa ghi zẹlẹ ẹvbo ne ọmwa gha a lẹfi a deghẹ ọ gbe ọmwa ran vbe nẹ i na re ẹmwẹ ọnrẹn.

¹² Evba ọre ọ gha na miẹn uhunmwu vbe obọ etẹn ọmwa ne ọ wu nii, ni ho ne iran rria ikhi. A ghẹ ghe ọmwa ne a ba ẹre ifi ẹzọ izigha rua vbe ẹi re te a gui ẹzọ ẹre nẹ vbe sirra emwa hia.

¹³ “Wa zẹlẹ ẹvbo ehan.

¹⁴ Eha vbe odẹ ekẹn Jọdan kevbe eha vbe otọ Kenan.

¹⁵ Ena ghi gha re ehe ne a na lẹfe ne ivbi Izrẹl ra avbe orhunmwuyẹn ni do yin ẹvbo nii vbe ovbi ẹghẹ kherhe ra te ọ wa do yin ọghe etẹbitẹ. Ọmwa ne ọ gbe ọmwa ran vbe ne ẹi na re ẹmwẹ ọnrẹn, sẹtin lẹ gha rrie ọkpa vbọ.

^16-18 Sokpan, a deghẹ ọmwa ya emwi igbinna gbe ọmwa ran, a deghẹ ematọn nọ ra okuta ra erhan, ọ rriabe izigha, te a gha gbẹe rua.

¹⁹ Ọtẹn ọmwa ne ọ wu nii, ne ọ ghi sikẹ ọre sẹ ọ re ọ bi ye ọre egbe ne ọ gbe ọmwa ne ọ de izigha nii uan. Ọ gha miẹn ọẹn, ọ ghi gbẹe.

²⁰ “A deghẹ ohu ọmwa mu ọmwa, ọ na gbe ẹe rua, ọ re te ọ sua ẹre gbotọ nọ ra te ọ fi emwi gbe ẹe.

²¹ Te ọ gbe ẹre ekpa, te ọ de izigha, a ghi gbe ẹe rua. Ọtẹn ọmwa ne ọ wu nii ne ọ ghi sikẹ ọre sẹ, ọ re ọ bi ye ọre egbe ne ọ ghi gbe ẹe rua, ighẹ izigha nii, ehe ne ọ rhirhi na miẹn ọẹn, ọ ghi gbẹe rua.

²² Sokpan, gia kha ghẹ ọmwa ghe ọmwa ne iran i gba mwẹ egbe ẹzọ rua, ọ re te ọ sua ẹre gbe otọ ra te ọ fi emwi gbe ẹe.

²³ Ra ne a kha wẹẹ, te ọmwa fi okuta gbe ọmwa ran vbe ne ọ ma na bẹghe ẹre, ra vbe ne ọ ma na zẹ iro ikuan egbe ghe ẹre, ra ọmwa ne ẹ i re oghian rẹn.

²⁴ Ọ gha ye vberriọ, ẹvbo ghi bu ohiẹn ne ọmwa ne ọ gbe ọmwa nii uan, i ghẹ ẹ i re etẹn ọmwa nọ wu nii, ni ho ne iran rria ikhi.

²⁵ Ẹvbo ghi wọlọ ọmwa ne ọ de izigha ọyẹvbu nii hin obọ etẹn ọmwa nọwu nii rre, a ghi gie ẹre werriegbe gha rrie ẹvbo ne a lẹgbinna nii, ehe ne ọ lẹ gha rrie. Ọ ghi gha rre evba ogie ohẹn ne ọ rrọọ vbe ẹghẹ nii te do wu.

²⁶ “A deghẹ ọmwa ne ọ de izigha ọyẹvbu nii kpao hin ẹvbo ne ọ lẹ gha rrie,

²⁷ ọ re etẹn ọmwa nọwu nii na miẹn ọẹn, iran na gbẹe rua, egbe irria ikhi vberriọ a i tie ẹre izigha.

²⁸ Ọmwa ne ọ de izigha ọyẹvbu nii ghi gha rre ẹvbo ne a lẹgbinna ne ọ ye, ogie ohẹn ne ọ rrọ te do wu, sokpan vbe iyeke ọnii, ọ sẹtin dọlegbe gha die owa.

²⁹ Uhi na dekun uwa kevbe avbe ivbi uwa, eheikehe ne uwa a rhirhi gha ye.

³⁰ “A gha ba ọmwa ifi ẹzọ izigha, a ghẹ bu ohiẹn uwu gbẹe vbe i re te a mi osẹe eva ra ni bu sẹ ọnii, osẹe arhiọnkpa ma sẹ ne a gha ya bu ohiẹn izigha.

³¹ Te a gha gbe izigha rua. Ẹ i sẹtin zẹ igho ya fan egbe ẹre fua vbọ.

³² A ghẹ gie ọmwa ne ọ lẹ gha rrie ẹvbo ne a lẹgbinna zẹ igho ne ọ miẹn ehe na gha die owa ogie ohẹn ne ọ rrọọ te do wu.

³³ Wa gha ru ẹe vberriọ, wa gha mu awua ye otọ ne uwa ye. Te izigha si awua rrie ẹvbo, odẹ ne a la họnmwẹ otọ ne a na de izigha ne awua lahin rre irrọọ gberra ne a gbe izigha ni uan.”

³⁴ Wa ghẹ mu awua ye otọ ne uwa ye, rhunmwuda mẹ ne Nọyaẹnmwa deba ẹre, te imẹ rre uwu ẹbu ivbi Izrẹl.