Nọmbas 34 - Edo Bible (E Baibol Ẹdo) Version 1996

Ehe Ne Otọe Ni Lae

¹ E Nọyaẹnmwa keghi ru avbe igiodẹ na ne Mosis.

² Ne ọ ma avbe ivbi Izrẹl re: “Wa gha la otọ Kenan, otọe ne I mu ne uwa, eke ne ọ gha re uwu otọe uwa ọre ena khin.

³ Odẹ ekẹn ne ọ rrọọ ghi ke ẹgbo e Zin lele ehe ne otọe Idọm lae gha dee. Ọ ghi suẹn vbe odẹ ekẹn ọghe okun nọwu.

⁴ Ọ ghi la ghe igọgọ ekẹn gha rrie odẹ Akrabim Pas, ọ ghi ye gha khian ya sẹ Zin vbe odẹ ekẹn gban-an ya sẹ Kedẹs Banian. Ọ ghi ke evba rhie uhunmwu da odẹ okuọ ya sẹ Haza Ada gha rrie Azmọn.

⁵ Ọ ghi ke evba rhie uhunmwu da odẹ ẹzẹ vbe Igipt, ọ ghi ya fo vbe Meditẹrrenian.

⁶ “Ehe ne ọ ra sẹ vbe odẹ orrie ọrọre Okun Meditẹrrenian.

⁷ “Ehe ne ọ ra lele vbe odẹ okuọ ghi la uviẹn Meditẹrrenian ya sẹ Oke Họ, ọ ghi ke evba gha rrie Hamat Pas.

⁸ Ọ ghi ye ya sẹ Zẹdad.

⁹ Ke Zifọn, ọ ghi ya fo vbe Haza Enan.

¹⁰ “Odẹ ahọ vbọ ghi lele uviẹn ke Haza Enan kpao ya sẹ Siefan.

¹¹ Ọ ghi gban egbe ghe odẹ ekẹn ya sẹ Habẹl, odẹ ahọ ya Ain, ọ ghi lele evba ya sẹ oke ne ọ rre odẹ ahọ ọghe ikpogho Okun Galili.

¹² Ọ ghi laghe odẹ ekẹn kevbe Ẹzẹ Jọdan ya sẹ Okun Nọwu. “Ena ọ gha re ehe ne otọe uwa sẹe vbe igienenẹ.”

¹³ Ẹre Mosis na tama ivbi Izrẹl wẹẹ, “Otọe ne uwa ra yan uta yi ya ghae ọre ọna khin, otọe ne Nọyaẹnmwa ya ne ẹwae ihinrin vbe ukhiọnmwẹ.

¹⁴ Ẹwae ọghe Riubẹn kevbe Gad kevbe obọkpa ne ọ laghe odẹ ahọ ọghe Manasẹ, ọghe iran sẹ obọ nẹ, ne a ghae ne iran zẹ vbe dọmwadẹ ẹgbẹe.

¹⁵ Vbe odẹ ahọ ọghe Jọdan, ehe ne ọ na mu aro da e Jẹriko!”

Avbe Ọkaolotu Ne A Mu Ẹmwẹ Otọ Ne A Ghae Na

¹⁶ E Nọyaẹnmwa keghi tama e Mosis wẹẹ,

¹⁷ “Eliaza ne ohẹn ne ovbi e Errọn gha guẹ ghae avbe otọe nii kevbe e Jọsua ne ovbi e Nọn.

¹⁸ U ghi vbe rhie ọkaolotu ọkpọkpa vbe dọmwadẹ ẹwae ni rrọọ ne iran vbe gu iran gha ẹre.”

^19-28 Vbe nia: Ẹwae Olotu E Juda E Kelẹb ne ovbi Jefunẹ E Simiọn E Sielumiẹl ne ovbi Amihub E Bẹnjamin Elidad ne ovbi Kislọn E Dan E Buki ne ovbi Jogli E Manasẹ E Hanniẹl ne ovbi Ẹfọd Ifreim E Kemuẹl ne ovbi e Siftan E Zẹbulọn Eliazafan ne ovbi Panak Isaaka E Patiẹl ne ovbi Azan Asia Ahihud ne ovbi Sielomi E Naftali E Pẹdahẹl ne ovbi Amihud

Ẹwae Olotu

²⁹ Iran na ọrọre emwa ne Nọyaẹnmwa zẹe ne iran gha ghae emwi ne ivbi Izrẹl vbe otọe Kenan.