Nọmbas 32 - Edo Bible (E Baibol Ẹdo) Version 1996

Ẹvbo Ni Rre Odẹ Aho Ọghe Jọdan

¹ Ẹwae ọghe Riubẹn kevbe Gad keghi wa gha mwẹ ẹmila ni bun ẹsẹse. Ugbẹn vbe iran ghi miẹn vbene otọe Jazẹ kevbe Giliad maa ne avbe ẹmila hẹ,

² iran keghi bu e Mosis, Eliaza kevbe avbe ekaolotu nekpa ọghe avbe emwa nii, iran tama iran wẹẹ,

^3-4 “Otọe ne Nọyaẹnmwa mu ne ivbi Izrẹl ne iran yin ẹnrẹn, ighẹ avbe ẹvbo Atarọt, Dibọn, Jazẹ, Nimra, Hesbọn, Elielẹ, Seban, Nebo kevbe Biọn, otọe ne ọ maa ẹmila wa nọ, ma keghi vbe mwẹ ẹmila ni bun.

⁵ Lahọ, mu otọ na ne ima ne ọ gha re ọghe ima, ghẹ viọ ima gberra ẹzẹ Jọdan ne ima ya yin odọ.”

⁶ E Mosis keghi wanniẹn wẹẹ, “Te uwa ho ne uwa yakọ vbe emwa vbe ivbi Izrẹl ne ihua uwa rrie okuo ra?

⁷ Vbe uwa a ghi ra na gie ekhọe ivbi Izrẹl lahin rre hẹ yi ne iran ghẹ ghi fian Jọdan rra ne iran ya yin otọ ne Nọyaẹnmwa mu ne iran?

⁸ Erriọ avbe erha uwa vbe ru ẹghẹ ne I na gie iran ke Kedẹs Bania gha khian ne iran ya ghe otọe nii ghe.

⁹ Iran khian sẹ Iya Ẹskọl, iran na miẹn otọe nii, sokpan iran ghi dọlegbe rre, iran keghi kpọzọe rua ne iran ghẹ yo otọe nii ne Nọyaẹnmwa mu ne iran.

¹⁰ Ohu keghi mu e Nọyaẹnmwa ẹdẹ nẹdẹrriọ, ọ keghi yan wẹẹ:

¹¹ ‘Rhunmwuda ne iran ma na guobọ mwẹ, avbe emwa hia ni rre ukpo ugie, kevbe ni wan sẹ ọnii, vbe iran kpao hin Igipt rre, ne ọ gha sẹ otọ ne ne I ve Ebraham, Aizik kevbe Jekọb re, ẹ i rrọ.’

¹² Emwa hia ọre ọ na wa kan sokpan Kelẹb ne ovbi e Jefunẹ ne ọmwa Keni kevbe Jọsua ne ovbi e Nọn rhunmwuda, iran nii wa guobọ Nọyaẹnmwa.

¹³ Ohu emwa nii keghi mu e Nọyaẹnmwa, ọ keghi ya iran gha zozo la uwu ato khian la ukpo iyeva, a te do miẹn wẹ orre nii hia ni ya ohu mu ẹẹn, wulo fo fẹẹrẹ.

¹⁴ Banbanna nian, wa vbe rhie ihe erha uwa, orre ọgbọn ọ ghe emwa orukhọ, emwa ni wa vbe mu egbe ne iran vbe tie okuosu e Nọyaẹnmwa dọlegbe yan Izrẹl uhunmwu.

¹⁵ A deghẹ wa ne emwa Riubẹn kevbe Gad ma vbe lele ẹe nian, ọ ghi vbe dọlegbe fi iyeke gbe emwa na hia vbe adesẹ ẹgbo, urhu uwa ọre ọ fuan ọghe iran ra gha ye.”

¹⁶ Iran keghi bu e Mosis gha khian, iran tama rẹn wẹẹ, “Gie ima ka ya okuta gba ogba lẹga avbe ohuan ima vbe emwa na zẹ ke ẹvbo ne a gbe ekẹn ga ne ibiẹka ima.

¹⁷ Ẹghẹ nii, ma gha mu egbe ne ima lele ivbi Izrẹl ne iho mwa gha rrie okuo, ma ghi vbe ke odaro vbe okuo nii a te do miẹn wẹ ma viọ iran sẹ otọe nii ne ọ gha re ọghe iran. Vbe ọghe banbanna, ibiẹka ima sẹtin gha rre ẹvbo ne a gbe ekẹn ga na, ehe ne obọ emwa ẹvbo na i ra na vba iran.

¹⁸ Ma i ra werriegbe gha die owa ima, a te do miẹn wẹ ivbi Izrẹl hia gele yan avbe otọe nii ne a ghae ne iran.

¹⁹ Ma i ra yan emwikemwi vbe uwu emwi ewe ni rre iyeke Jọdan, rhunmwuda ọghe ima sẹ ima obọ nẹ vbe emwa vbe odẹ ahọ ọghe Jọdan.”

²⁰ E Mosis keghi wanniẹn wẹẹ, “A deghẹ te uwa mu ẹmwẹ ne uwa tae na sẹ, wa wa mu egbe nian vbe odaro e Nọyaẹnmwa ne uwa gha rrie okuo.

²¹ Emwa uwa ni sẹtin gbinna hia ghi mu egbe ne iran fian Jọdan rra ne iran ya gbinna vbe ne Nọyaẹnmwa gha na gha re ọkaokuo uwa, wa ghi gu avbe eghian gbinna.

²² Ne uwa mu otọe nii ya khian ọwua, iyeke ọnii, wa sẹtin werriegbe gha dee rhunmwuda wa ru e nọ kan e Nọyaẹnmwa ke emwa Izrẹl ne ihua uwa nẹ. Ẹghẹ nii Nọyaẹnmwa gha ya obọ yọ wẹ otọe na vbe odẹ ahọ ọghe Jọdan, ọwua nọ.

²³ Sokpan deghẹ wa na mu eyan uwa sẹ, ne I gie uwa rẹn nian wẹ wa gha rukhọ ghe Nọyaẹnmwa, wa ghi vbe rẹn nian wẹẹ a gha vbe rri uwa oya ye orukhọ uwa.

²⁴ Rhunmwuda ọnii nian, wa bọlọ ẹvbo uwa ke ogba ne avbe ohuan uwa, sokpan, wa ghi mu eyan uwa sẹ!”

²⁵ Emwa Gad kevbe Riubẹn keghi kha wẹẹ, “Enọwanrẹn, ma gha ru vbene u khare.

²⁶ Avbe amwẹ ima kevbe ivbi ima, kevbe ẹmila kevbe ohuan gha mudia vbe avbe ẹvbo Giliad.

²⁷ Sokpan ma hia mu egbe ne a ya gha rrie okuo vbene Nọyaẹnmwa na re ọkaokuo. Ma gha fian Jọdan rra ne a ya khọn zẹ vbene u khare.”

²⁸ Ẹre Mosis ghi na khama Eliaza, e Jọsua kevbe avbe ekaolotu ivbi Izrẹl nekpa wẹẹ,

²⁹ “A deghẹ emwa Gad kevbe Riubẹn fian Jọdan rra, vbe ne iran na mu egbe ne iran ya khọn vbe okuo nii ne Nọyaẹnmwa na re ọkaokuo, a na ghi vbe miẹn wẹ vbe ekpa iyobọ iran ọre uwa na sẹtin khọn miẹn otọe nii, wa ghi mu otọ Giliad ne iran ne ọ gha re ọghe iran.

³⁰ Sokpan, adeghẹ iran ma fian Jọdan rra ne iran lele uwa gha rrie okuo, a ghi rhie ne ọ sẹ iran egbe ne iran vbe emwi ni rre otọ Kenan zẹ vbene uwa vbe ye.”

³¹ Emwa Gad kevbe Riubẹn keghi wanniẹn wẹẹ, “Enọwanrẹn, ma gha ru vbene Nọyaẹnmwa kha re.

³² Vbene irẹn na re ọkaokuo, ma gha khian la otọe Kenan ne a ya khọn okuo ne emwi ni rre odẹ ahọ ọghe Jọdan na miẹn ehe na khian ọghomwa.”

³³ Ẹre Mosis na mu otọe ọba Saihọn ọghe Amọri kevbe ọba Ọg ọghe Basian kevbe avbe ẹvbo ni lẹga ẹre hia ne ẹwae Gad kevbe Riubẹn kevbe a gha wa ẹwae Manasẹ ye ihe eva.

³⁴ Ẹwae ọghe Gad keghi dọlegbe bọlọ avbe ẹvbo ne a gbe odin khinkhian ighẹ Dibọn.

³⁵ Ata rọt, Aroẹ, Atrọt, Siofan, Jasa Jogbeha.

³⁶ Bẹt Nimra kevbe Bẹt Haran.

³⁷ Ẹwae Riubẹn keghi dọlegbe bọlọ Hesbọn, Eliala, kirriatam.

³⁸ Nebo, Bal Miọn (te a fi eni na werriẹ) kevbe Sibma. Iran munọ eni ughughan ne ẹvbo ne iran dọlegbe bọlọ.

³⁹ Uniẹn ọghe Makia ne ovbi e Manasẹ keghi mu okuo gha rrie otọe Giliad, ọ keghi yin ẹnrẹn, ọ keghi khulo avbe emwa Amọri ni te rre evba kua.

⁴⁰ Ẹre Mosis na mu Giliad ne ẹwae Makia ne iran gha rre evba.

⁴¹ Jea ne ovbi ẹwae Manasẹ na ya khọn avbe igue eso, ọ na gha tie iran Igue Jea.

⁴² E Noba keghi dekun Kenat kevbe igue ni rrọọ, ọ na he ẹre Noba zẹ vbe ne a tie irẹn.