Nọmbas 31 - Edo Bible (E Baibol Ẹdo) Version 1996

Okuo Ne Ọ Huanrẹn Ne A Gu E Midian Khọn

¹ E Nọyaẹnmwa keghi tama Mosis wẹẹ,

² “Rria emwa Midian ikhi ye emwi ne iran ru ivbi Izrẹl re. U gha ghi ru onii nẹ, u ghi wu.”

³ Ẹre Mosis na tama emwa nii wẹẹ, “Wa mu egbe okuo ne uwa miẹn ehe na dekun emwa Midian, ne uwa rria iran ikhi ye emwi ne iran ru e Nọyaẹnmwa re.

⁴ Wa gie arhin arriaisẹn ke ẹwae ọkpọkpa ọghe Izrẹl gha rrie okuo.”

⁵ Ọre iran na zẹ arhin arriaisẹn vbe ẹwae ọkpọkpa, ehia keghi do gha re arhin arriaisẹn iweva (12,000) ni mu egbe okuo.

⁶ E Mosis keghi gie iran gha rrie okuo, ọ na gie Finihaz ne ovbi Eliaza ohẹn ke odaro ne ọ gha wa iran ye okuo, kevbe ne ọ viọ avbe emwi iruemwi ni huanrẹn mwẹ deba a vbe okpe ne a ya gue egbe guan.

⁷ Iran keghi dekun e Midian zẹ vbene Nọyaẹnmwa tama e Mosis, iran na gbele ikpia ni rrọọ hia.

⁸ Kevbe avbe ọba Midian isẹn ni re Evi, Rekẹm, Zọ, Họ kevbe Reba. Iran keghi vbe gbe Balam ne ovbi Beọ.

⁹ Ivbi Izrẹl keghi munọ ikhuo kevbe ibiẹka ni rre Midian oghunmwu, iran keghi munọ emwirri iran hia, iran na fu emwi iran hia viọ.

¹⁰ Iran keghi giẹn ẹvbo iran kevbe agọ iran hia a.

¹¹ Iran keghi viọ emwi iran ne iran furu hia, avbe oghunmwu kevbe emwirri.

¹² Iran na viọ iran bu e Mosis kevbe Eliaza kevbe emwa Izrẹl gha dee, emwa ni rre agọ vbe otọe ne ọ rrie ọghe Moab vbe a gha fian Jọdan rra vbe Jẹriko.

Ivbiyokuo Dọlegbe Rre

¹³ E Mosis, Eliaza kevbe avbe ekaolotu ọvbehe hia ni rre uwu ẹbu emwa nii, keghi kpao vbe agọ khian bu avbe ivbiyokuo.

¹⁴ Ohu avbe ekaolotu mu e Mosis, avbe iran ni kha yan arriaisẹn kevbe otu otu ọghe iwinna vbe okuo, ni ke okuo nii rre.

¹⁵ Ọ keghi nọ iran wẹẹ, “Vbọzẹ ne uwa na gie avbe ikhuo ni rrọ hia gha rre agbọn yi?

¹⁶ Wa yerre wẹ, avbe ikhuo ọre ọ ru vbene Balam khare, iran na kpikpi emwa ni ru emwi ni ma kei ghe Nọyaẹnmwa vbe Peọ. Ọnii ọ re ọ mu egboghogbogho la uwu ẹbu emwa e Nọyaẹnmwa.

¹⁷ Rhunmwuda ọnii nian, gbele ibiẹka ikpia hia, kevbe ikhuo hia ni rẹn okpia nẹ.

¹⁸ Sokpan, wa sẹ avbe ikhuo ni ma he rẹn okpia rae zẹ vbe ọghe uwa.

¹⁹ Sokpan, wa hia ne obọ ẹre vba ọmwa ya gbe, kevbe ni ya obọ kan orinmwi, wa ghi mudia vbe ore, wa ghẹ la agọ ọ te sẹ ikpẹdẹ ihinrọn. Wa ghi họnmwẹ egbe kevbe avbe ikhuo ne uwa khọn mu vbe ikpẹdẹ ne ogieha kevbe ne ogihinrọn.

²⁰ Wa ghi họnmwẹ ukpọn kevbe emwi hia ne a ya ohian ru ra eto ẹwe ra erhan.”

²¹ Eliaza ne ohẹn keghi tama emwa ni ke okuo rre wẹẹ, “Emwamwa ne Nọyaẹnmwa rhie ne Mosis ọre ena khin.

^22-23 Emwikemwi ne ẹ i giẹn vbe erhẹn zẹ vbene igoru ye, esiliva, oze, ematọn ra ẹrọnmwọ, a ghi mu ẹẹn la erhẹn gberra ne a ya rarae họnmwẹ ọẹn ruan. Emwi ni ghi dekẹ hia, a ghi ye amẹ ne a ya họnmwẹ emwi họnmwẹ ruan.

²⁴ Ọ gha sẹ ikpẹdẹ ne ogihinrọn, wa ghi họ ukpọn uwa, ẹghẹ ni, wa ghi do gha re ne ẹ i mwẹ awua, a ghi gie uwa la uwu agọ.”

Vbene A Ghae Emwi Ne Iran Furu Hẹ

²⁵ E Nọyaẹnmwa keghi tama e Mosis wẹẹ,

²⁶ “Wẹ vbe Eliaza kevbe avbe ekaolotu emwa nii, wa ghi ka avbe emwi ne obọ vbare vbe okuo, kevbe avbe oghunmwu kevbe aranmwẹ.

²⁷ U ghi ghae avbe emwi ne obọ vbare na ye ihe eva umwọmwẹ, obọ ọkpa ọghe avbe ikpia ni ye okuo, kevbe obọ nọkpa ọghe emwa ni dekẹe.

²⁸ U ghi rhie ọkpa vbe uwu oghunmwu iyisẹn isẹn ye otọ vbe avbe ne ọ sẹ avbe ivbiyokuo obọ, zẹ vbe igho uhunmwu ne a zẹ gie Nọyaẹnmwa, erriọ u gha vbe ru avbe ẹmila, ekẹtẹkẹtẹ, ohuan kevbe ẹwe.

²⁹ Viọ iran ne Eliaza ne ohẹn zẹ vbe emwi ihaoko kpataki gie Nọyaẹnmwa.

³⁰ U ghi rhie oghunmwu ọkpọkpa vbe uwu ekigbe siyeha vbe emwi ne a ghae gie emwa nii, erriọ vbe nọ vbe ẹmila, ekẹtẹkẹtẹ, ohuan ke ẹwe. U ghi viọ iran ne avbe Livai ni gbe aro ghe Owa Ukpọn Ile ọghe Nọyaẹnmwa.”

³¹ E Mosis kevbe Eliaza keghi ru vbene Nọyaẹnmwa khare.

^32-35 Avbe emwi ne obọ ivbiyokuo vbare vbe okuo ọre ena khin, deba avbe emwi ne iran viọ hin rre zẹ vbe ọghe obọ iran. Ohuan kevbe ẹwe, arriaisẹn isẹn irrọvbe iyenẹ yan arriaeha (675,000), ẹmila, arriaisẹn eva yan ekigbe siyenẹ (72,000), ekẹtẹkẹtẹ, arriaisẹn ọkpa yan iyeha (61,000), ivbialeke, arriaisẹn eva yan ọgban (32,000).

^36-40 Obọ ne a viọ ne ivbiyokuo vbe a wa ẹre ye ihe eva nẹ kevbe gha re ohuan kevbe ẹwe iyisẹn yan arriaeva ọ ya yan arriaisẹn eha irrọvbe ikiọkhọe yan uri (337,500), igho uhunmwu gie Nọyaẹnmwa kevbe gha re isẹn irrọvbe iyenẹ yan arriaeha (675), ẹmila avbe ivbiyokuo keghi gha re arriaisẹn enẹ irrọvbe iyeva (36,000), igho uhunmwu gie Nọyaẹnmwa kevbe gha re eva yan ekigbesiyenẹ (72), ekẹtẹkẹtẹ avbe ivbiyokuo kevbe gha re iyisẹn yan arriaeva ọ ya yan arriaisẹn ọgban (30,500), igho uhunmwu gie Nọyaẹnmwa keghi re ọkpa yan iyeha (61), ivbialeke arriaisẹn enẹ irrọvbe ugie (16,000) keghi gha re ọghe avbe iyokuo, eva yan ọgban (32) keghi gha re ọghe igho uhunmwu gie Nọyaẹnmwa.

⁴¹ Ẹre Mosis na viọ ọghe igho uhunmwu ni gie Eliaza zẹ vbene Nọyaẹnmwa khare.

^42-46 Emwi umwọmwẹ ọre ọ sẹ emwa nii kevbe ivbiyokuo obọ, ohuan iyisẹn yan arriaeva ọ ya yan arriaisẹn eha irrọvbe ikiọkhọe yan uri (337,500) ẹwe kevbe ohuan arriaisẹn enẹ irrọvbe iyeva (36,000), ekẹtẹkẹtẹ iyisẹn yan arriaeva ọ ya yan arriaisẹn ọgban (30,500), ivbialeke arriaisẹn enẹ irrọvbugie (16,000).

⁴⁷ E Mosis keghi viọ avbe oghunmwu kevbe emwi irri ọkpa vbe uwu ekigbe siyeha vbe ne ọ sẹ emwa ni obọ na, ọ na viọ ne avbe Livai ni gbearoghe Owa Ukpọn Ile ọghe Nọyaẹnmwa zẹ vbene Nọyaẹnmwa khare.

⁴⁸ Avbe ọkaolotu ni gha re ọkaokuo vbe okuo keghi bu e Mosis gha khian, iran tama rẹn wẹẹ,

⁴⁹ “Enọwanrẹn, ma kevbe avbe ivbiyokuo ni rre ototọ ima nẹ, ọkpa kẹkan ne a ma miẹn, ẹ i rrọ.

⁵⁰ Rhunmwuda ọnii, ma ra viọ avbe emwitegbe ọghe igoru, emwiobọ, emwiurhu, oroka, emwiehọ kevbe eghan urhu ne dọmwadẹ ọghe ọe vbe uwu ima viọre rre. Ma ya ẹe zẹ ọhẹ gie Nọyaẹnmwa zẹ vbe emwi ne a ya ne Osanobua ye ne ima na miẹn uhunmwu, ne ọ miẹn ehe na gha degue ima khian.”

⁵¹ E Mosis kevbe Eliaza keghi miẹn iran avbe igoru nii, ehia keghi gha re ọghe emwi itegbe.

⁵² Emwi ne avbe ekaolotu na hia hẹ rre keghi gbe uwan ne ọ gberra arriaeva.

⁵³ Iran ne ẹ i re ọkaolotu keghi viọ avbe emwa ne obọ iran vbare vbe okuo.

⁵⁴ Ẹre Mosis kevbe Eliaza na viọ avbe igoru nii gha rrie Owa Ukpọn Ile ne Nọyaẹnmwa miẹn ehe na gha degue ivbi Izrẹl.